Сборник - Акафистник. От недуг и горьких болезней
- Название:Акафистник. От недуг и горьких болезней
- Автор:
- Жанр:
- Издательство:Array Литагент «Белый город»
- Год:2015
- Город:Москва
- ISBN:978-5-485-00513-9
- Рейтинг:
- Избранное:Добавить в избранное
-
Отзывы:
-
Ваша оценка:
Сборник - Акафистник. От недуг и горьких болезней краткое содержание
Первые два акафиста посвящены Богородице, к помощи и заступничеству Которой мы постоянно прибегаем в своих молитвах, – это акафисты в честь икон «Целительница» и «Неупиваемая Чаша». Еще шесть акафистов обращены к святым: св. Вонифатию (ему, как и перед образом Пресвятой Богородицы «Неупиваемая Чаша», молятся о помощи людям, больным алкоголизмом), свт. Спиридону Тримифунтскому, прп. Пимену Многоболезненному, свт. Нектарию Эгинскому (к нему обращаются с просьбой об избавлении от рака), свт. Луке (Войно-Ясенецкому), архиеп. Крымскому.
Акафистник. От недуг и горьких болезней - читать онлайн бесплатно ознакомительный отрывок
Интервал:
Закладка:
Радуйся, греховныя страсти укрощающая;
радуйся, колеблющихся в вере православней укрепляющая.
Радуйся, утешение благодатное в сердца́ боголюбивая изливающая;
радуйся, надеждою небесных благ верных души услаждающая.
Радуйся, в добрых де́лех преуспевати нам помогающая;
радуйся, от видимых и невидимых враг нас защищающая.
Радуйся, благодатию Твоею падших возставляющая;
радуйся, страх Божий в сердца́ наша вселяющая.
Ра́дуйся, Благода́тная Цели́тельнице душ и теле́с на́ших.
Кондак 7
Хотя́щи явити милосердие Твое неизреченное, даровала еси нам, преблагая Богородице Дево, чудотворную икону Твою, именуемую Целительница, да вси притекающии к ней с верою от болезней свобождаются и всякаго утешения сподобляются. Сего ради вопием о Тебе Богу: Аллилу́ия.
Икос 7
Ди́вна и пресла́вна дела́ Твоя, Пренепорочная Владычице: всем бо, богатым и нищим, здравым и болящим, с прилежною молитвою к цельбоносносней иконое Твоей притекающим, вся благая по коего́ждо потребе и в меру веры и любве́ подаеши. Темже и мы не таи́м Твоих благодеяний, но, благодарственно прославляюще милости Твоя, глаголем Ти сице:
Радуйся, глухих слышание;
радуйся, слепых прозрение.
Радуйся, немых глаголание;
радуйся, хромых хождение.
Радуйся, прокаженных очищение;
радуйся, разслабленных укрепление.
Радуйся, от злых и лукавых духо́в свобождение;
радуйся, по Бо́зе наше прибежище и заступление.
Радуйся, от нужд, печалей и бед непреложное избавление;
радуйся, пристрастие к тленному богатству искореняющая.
Радуйся, искати богатство нетленное на небеси научающая;
радуйся, ум нам в го́рняя вперя́ющая.
Ра́дуйся, Благода́тная Цели́тельнице душ и теле́с на́ших.
Кондак 8
Стра́нни и пришельцы в мире сем скорбнем и многомяте́жнем суще, вечнаго Небеснаго Отечества взыску́ем и Тебе, всемо́щную Царицу Приснодеву Богородицу, смиренно просим: путево́дствуй нас по стезям спасительных заповедей Сына Твоего, Христа Бога нашего, да, избегше се́тей невидимаго врага, возможем невозбра́нно воспевати Вседержителю Богу песнь: Аллилу́ия.
Икос 8
Весь мир христианский ублажает Тя, Пренепорочная Дево, гла́сы хвалебными: всем бо верным, наипаче же болящим, уте́шительно есть взирати на всечестну́ю икону Твою, Целительницею именуемую. О Пречу́дная Госпоже́ Богородице, приими́ и наша умиленная благохвале́ния такова́я:
Радуйся, Ра́досте наша;
радуйся, добро́то несказа́нная.
Радуйся, высото́ доброде́телей;
радуйся, глубино́ смиренному́дрия.
Радуйся, неистощимый источниче милостей и щедрот;
радуйся, благоуханный Цве́те девства и чистоты.
Радуйся, веры христианския утверждение;
радуйся, нечестия обличение.
Радуйся, горних сил похвало́;
радуйся, всех праведных сла́во.
Радуйся, всех грешных упование;
радуйся, ненадеемых наде́яние.
Ра́дуйся, Благода́тная Цели́тельнице душ и теле́с на́ших.
Кондак 9
Все упование на Тя возлагаем, Мати Божия, и в ско́рбех и болезнех ко святей иконе Твоей с благоговением и верою притекаем, ча́юще от нея́ скорое утешение и исцеление получити. О Пресвятая Царице Богородице, воззри́ милостиво на нас, смиренных рабов Твоих, и ускори́ исполнити вся, яже на пользу нам, и в сей жизни и в будущей, да, прославляюще Твое благоутро́бие, воспеваем Творцу Богу: Аллилу́ия.
Икос 9
Вити́и многовеща́ннии не возмогут достойно восхвалити Тя, Пречистая Дево, честне́йшую херувим и сла́внейшую без сравнения серафим, безсеменно рождшую Спаса душ наших. Мы же, аще и не́мощни есмы́, обаче, любовию к Тебе побежда́еми, отверзаем недостойная уста своя на похвалы́ Тебе сицевы́я:
Радуйся, умы человеческими и ангелькими непостижимая та́йно;
радуйся, чистотою Ангелов превозшедшая.
Радуйся, чудес Христовых начало;
радуйся, всех пророчеств исполнение.
Радуйся, девство и рождество в себе чу́дно сочетавшая;
радуйся, в обою́ непорочно и свя́то Себе сохра́ньшая.
Радуйся, Мати Сына Божия и Бога Вышняго;
радуйся, падшему человечеству отверзшая вход в Царствие Горнее.
Радуйся, тихое пристанище от бурь плавающим по морю житейскому;
радуйся, Богом дарова́нная отра́до страждущим.
Радуйся, сияющая благодатию и славою предивных зна́мений и чудес;
радуйся, прие́млющая похваление людских словес.
Ра́дуйся, Благода́тная Цели́тельнице душ и теле́с на́ших.
Кондак 10
Спасти хотя род человеческий от беззаконий и вечныя муки, человеколюбец Господь, Тя, Матерь Свою, дарова в помощь, покров и защиту верующим в Него. Прославляюще таково́е Создателя нашего безмерное милосердие о нас, грешных, благодарственным сердцем и устны́ вопием Ему: Аллилу́ия.
Икос 10
Стена еси необори́мая и заступление крепкое, Богородице Дево, всем с молитвою к Тебе прибегающим. Темже убо и нас, недостойных, огради от лютых болезней и от всякаго злаго обстояния и подаждь во всех де́лех благовременную помощь и укрепление взывающим Ти:
Радуйся, Заступнице наша и похвало́;
радуйся, Хранительнице наша и утверждение.
Радуйся, Отрадо наша и дивное о нас попечение;
радуйся, известное прибежище наше во всех скорбных обстояниих.
Радуйся, младенцев воспитание;
радуйся, юных наставнице целомудрия.
Радуйся, супругом любовь и согласие да́рующая;
радуйся, благоговейных старцев к мирной кончине жития приводящая.
Радуйся, верных пастырей Святыя Церкве укрепляющая и вразумляющая;
радуйся, в иноческом образе подвизающимся хода́таице вечнаго ра́дования.
Радуйся, в мире благочестиво живущих не оставляющая Своим заступлением;
радуйся, всем христианом преди́вное вспоможе́ние.
Ра́дуйся, Благода́тная Цели́тельнице душ и теле́с на́ших.
Кондак 11
Пения и мольбы́ всеумиле́нныя, ныне на ми приносимыя пред цельбоносным Твоим образом, приими́, Приснодево Богородице, и сподоби до конца жизни на́шея Единому Богу воспевати: Аллилу́ия.
Икос 11
Светоза́рне сияет чудотворная икона Твоя, Мати Божия, источающи верным токи исцелений благодатных и наставляющи блуждающих во тьме грехов на светлый путь добродетелей и спасения. Сего ради вопием Ти хвалебныя песни таковыя:
Радуйся, осенением Твоея иконы силу вражию от всех прогоняющая;
радуйся, всем прибегающим в ско́рбех, нуждах и болезнех скорое утешение и исцеление подавающая.
Читать дальшеИнтервал:
Закладка: