Руслан Скрынников - Ермак

О проречении древле.О сем Кучюме сбыстся пророчество Исаино и християнским воином Ермаком со единодушною дружиною в Сибири исполнися, глаголаше им же образом, рекох: «Тако будет, и еже совеща, тако уставися. Не веселитеся, вси иноплеменные, сокруши бо ся ярем веселящаго вас: от семени бо змиина изыдут внучата аспидом, и внучата их изыдут змия летящая. И упасутся нищии Господем, и убозии человецы в мире почиют, потребит Господь гладом семя твое, аспиде, и останок твой. Возрыдают врата градов и возмут гради тверди иноплеменских всех, яко дым от севера грядет, и несть пребывати в числех его». И се завещание скончается на турках в совершенство.

Молебная сибирян.Егда же возвратишася от плена в Тоболеск августа в 23 день, от радости благосоветно общеначалные и церковницы единогласно глаголюще: «Поем, Господеви, славно бо прославися отец наших, Боже в Троицы благословен еси. Ты, Господи, сокрушил главы змием в воде, яко же и кучюмляном злым». И всенародне Святей Троице и Богоматере и всем святым молебно от сердца благодарение воздаша со звоном, и сим бусурманом наипаче ужасиша, правоверных же сердца возвеселишася, и все уповающе вседушно на Бога и на Пречистую его Богоматерь, заступницу всего мира, надежду возложиша, глаголюще вси: «Тишину и мир подати рабом своим, и милость прияти, и сущая посреде нас распри и мятежи умирити, расточити належащий на ны страх и трепет. Да ко многим благодеянием и сибирское приложим взятие». Проповедующе явление, заступление и великую милость и чюдеса от древле, 88 (1579) году ноября в 28 день, всегда и доднесь.

Благословение жизни с небеси сибиряном.Имать Сибири действия дело. И благослови Бог Ноя и сынов его, и рече им: «Раститеся и умножитеся, и исполните землю, и обладайте ею, и страх и трепет ваш да будет на всех зверех земных, и на всех скотех земных, и на всех птицах небесных, и на всех движущихся по земли, и на всех рыбах морских. И всяк гад под руки ваша дах. Яже сотворих в жизнь вся дни на земли, сеяние и жатву, зиму и зной, лето и есень, день и нощь не престанут».

Явление возсия Сибирь и прославися.Древле Сибирь идоложертвием омрачена бе, ныне же сибирская земля и страна, паче же богоспасаемый началнейший град Тоболеск, наполнися божественныя святыя славы явлении в лето 96 (1588) году самого Вседержителева образа в славу имени своего. Таже во 144 (1636) году июля в 20 день Пречистые Богородицы, заступницы всего мира, таже Иоанна Предтечи на Шамъталыке, Михаила архангела Ермаку с дружиною, святителя Николы чюдотворца во 110-м (1602) году, и в приходе Ермака — великомученик Димитрий в 89-м (1580) году ноября в 23 день. И таковым озарися светом неизреченнаго веселия сибиряном во исцеление и просветися просвещением всесвятаго и животворящаго духа во образе орли; яко орел покры гнездо свое, Сибирь, со птенцы своими и на вся веси и град даде перо славы своея, благодать возсия везде сый и вся исполняя и прославися во всех сибирских концех. Имать же в мало явлении некой ради тайности и мощи угодивших Богу святых молебники о сибирстем снабдении; еще же священством и воинством, христолюбием и братолюбием пребывает злата светлейша и света полнейше, источающе благодать духовную, концем бо наставник божественная являя, собирая пресветло православных лики союзом духовным.

Древле християне, страшни языком, и Ермак.В прежная лета везде и повсюду, аможе идут правоверныи християне, в пути своя и на войну, страшни бусурманом и протчим незнающим Бога, понежь святая наша християнская вера, возлюбленная благоверным царем и великим князем Владимером всеа росийским, егда твердыни нашей Спасителя святое Евангелие во огни не сгоре, и таковая нам, християном, оттоле даде Бог вышний власть, силу, храбрость и спех над всеми, наступати на змию, и на скорпию, и на всю силу вражию, и горы преставляти. И сицеваго ради повеления Господня един християнин гонит тысящу бусурман, а два двигнета тмы. И се быста деле благообразно сибиряном пример.

О скверных бегунах роксолянех.Сквернии роксоляне бегуны возгордешася на Бога, прияша мерзость латынскую от сатаны, а не Божию помощь, уповаша на луки оружия своего, падаше аки снопы во время жатвы с несмысленною мудростию, а не духовную, и аки неплодная смоковь отметаше пупы своя от ветра велика, движима зелно, и бежаша храбро с пыхою своенравне в зиму. И попущением за грехи мерзостей реченных, от вышняго Бога прияша казнь: един агаренин гоняще 1000, а два двигнета тмы. И се во историях их яве написано: аще праведник едва спасется, нечестивый же и грешный где явится?

Бытия воином воздаяние, с коня да в рай.О предивное чюдо! Дело великих Божиих глубоких чюдес! Древле на поли сшедшеся, хотящи языцы бранем, многочисленные полки благочестивых же християн, Христовым словом надежне дерзающих, малое стадо во обстоянии, аки овцы посреде волков. Егда же сразившеся в велией сечи со обоих стран, обои видевше в противенстве небесный рай отверзен, и бездна открыта. Егда жь час умерщвленну от бусурман Христову рабу, приемлюще душу его святии ангели с коня да в рай. Егда бусурман исчезаше, приемлюще демоны с коня да во ад к своему сатане. За се бусурманы престаша от сечи, християна же видя свое знамя, паче дерзаша за веру християнскую и за святые Божие церкви, за самодержца и за сродство свое агарен посекая, и умершвляя, и низлагая.

Пример о покорении язык християном.От плода правды сибиряном древо жизни растет. Уроженцы, творящие доброе, ищут благодать благу. Пришельцы, ищуще зла, не яко злая постигнет их, аще бы стрегли себе от приидущаго зла, но яко Адаму в раи вся тварь покарялася, тако яве и всякому християнину приятии Богу всинепорочнии путем. Корение благочестивых твердостне и не отимутся от них; сеяй правду, приимут мзду верну. Сын праведен раждается в живот, желание праведных всеблаго, неугодно праведну ничто же неправедно и лутче обрести благодать от Господа Бога, служити верно. Творяй же веру, приятен ему есть.

О мирном поставлении.О мирности упражняяся в пример словес в народ владении делнаго розговора, понеж благоухишренну мужу подобает ведати различныя обыкновения и разные сонмов уставы и законы, дабы могл лутши искуство прияти грады, и тверды, и похвалный устав о чинех установити, крест в мире, верность и ангелом радость.

Философие довлеет правду во всех делах хранити, от сего велия любовь межь всеми роды добре живет. И новых вещей не вносити, а пришлецов за рубежь высылати, обаче попечение имети должни есмы, да нашему сибирству во веки пребывати, дабы отчизна наша, когда тогда ныне требует совета и мудрости и подлинным советом здравым, а не спыльчивым что исцелити добрыми обрасцы, которыми мочно междуусобные и градские ухишрения и злобы утишити, ниже сокрушатися. От повестей не искуства смотрети подобает. Ведомо мирное поставление крепце в мире чисте, ини же не согласни, ине стоят крестопреступне, леть лесть в сердци, делаюшем злая; хранящеи мира возвеселятца. Конь познавается в день брани, от Господа же помощь.