Коллектив авторов - Триодь Постная (на цсл., гражданский шрифт)

Просия́ша в ми́ре зарю́ Богоразу́мия ученцы́ твои́ Го́споди, и пре́лесть помрачи́ша прельще́ния, разо́рше омраче́ние. те́х моли́твами ще́дре, спаси́ пою́щия тя́.

Преддве́рия поста́, подвиго́в благопло́дии венча́нная прие́млют притека́ющих тре́звенно пе́сньми и пе́нии та́инственными, тща́тельно ве́рнии вси́ стеце́мся.

Умерщвле́ния ри́зы прие́м, в де́рзость невоздержа́ния облеко́хся окая́нный: но ты́ мя облецы́ Сы́не Бо́жий, оде́ждею све́тлою отрожде́ния.

Житие́ мое́ лука́вством, и вся́кою нечистото́ю сконча́ся: но к тебе́ всеще́дрому прибега́ю, предвари́в у́бо спаси́ мя Христе́ Бо́же, твое́ю благостию.

Богоро́дичен: Зачала́ еси́ па́че сло́ва, и родила́ еси́ па́че естества́ Богороди́тельнице, влады́чествующаго тва́рию. Его́же непреста́нно моли́, изба́витися на́м от вся́каго гне́ва, тебе́ ублажа́ющим.

И́ный. Гла́с 2: Прише́л еси́ от Де́вы не хода́тай, ни а́нгел, но са́м Го́споди вопло́щься, и спа́сл еси́ всего́ мя челове́ка. Те́м зову́ ти: сла́ва си́ле твое́й Го́споди.

Расточи́вше невоздержа́ния мглу́ апо́столи, уче́ний ва́ших сия́ньми, просвети́сте воздержа́нием вся́ гре́шныя и пра́ведныя, я́ко всехва́льнии.

Якоже я́снии би́серие сло́ва апо́столи, вся́ украси́сте воздержа́нием концы́, и удоботвори́вше ду́ш на́ших вои́стинну ны́не благоро́дие.

Пе́щь страсте́й росо́ю поста́ апо́столи увяди́вше, вся́ челове́ки научи́сте, гра́д се́й некра́домый и жили́ще име́ти освяще́ния.

Сла́ва:Согреши́х па́че все́х челове́ков окая́нный, и не пока́яхся, я́ко манасси́а согреши́х: нра́вы покая́ния ми́ сотвори́ Го́споди, пре́жде да́же не разреши́т мя́ сме́рть.

И ныне, Богоро́дичен: Тебе́ приста́нище спасе́ния, и сте́ну неруши́мую Богоро́дице Влады́чице, вси́ ве́рнии ве́мы: ты́ бо моли́твами твои́ми от бе́д свобожда́еши ду́ши на́ша.

Та́же, ирмо́с: Прише́л еси́ от Де́вы не хода́тай, ни а́нгел, но са́м Го́споди вопло́щься, и спа́сл еси́ всего́ мя челове́ка. Те́м зову́ ти: сла́ва си́ле твое́й Го́споди.

Пе́снь 8:

Ирмо́с: Вся́ческая Влады́ко прему́дростию соста́вил еси́, земли́ же па́ки утверди́л еси́, я́коже ве́си, дно, основа́нием водрузи́вый на вода́х безме́рных, тем вси вопие́м воспева́юще: благослови́те, дела́ Госпо́дня, непреста́нно Го́спода.

Земля́ вся́ Го́споди, твоего́ хвале́ния испо́лнися: всю́ бо обтече́ Боже́ственных ученик твои́х веща́ние Боже́ственное, из глубины́ неве́дения обраща́ющее к ра́зуму, пою́щую: благослови́те дела́ Госпо́дня Го́спода.

Благода́ть Боже́ственная покая́ния яви́ся, спасе́ние нося́щи, сея́ наслажда́ющимся, побе́д и по́двигов, по́тов и боле́зней: те́мже тецы́ душе́ моя́ ко Влады́це твоему́, мно́гих твои́х прегреше́ний и́щущи прия́ти проще́ние.

По́прище отве́рзеся Богода́ннаго воздержа́ния, све́тло усря́щем тре́бующии ми́лости: жа́ждет бо благоутро́бный на́шего спасе́ния, и е́же да́ти проще́ние простира́ется, и́щущим его́ усе́рдно, и любо́вию рабо́тающим.

Посто́м заусти́ся, ми́рствующею мы́слию, напита́й же душе́ Го́спода, благодея́нием доброде́тели, бра́шна, я́ко благово́нныя же́ртвы, принося́щи сему́, и взыва́ющи: дела́ благослови́те непреста́нно Го́спода.

Богоро́дичен: Все́ми влады́чествующая, мольбы́ прие́млющи Влады́чице рабо́в твои́х, свята́я Богоро́дице, тьмы́ мя изба́ви и огня́ негаси́маго, зо́л мои́х мно́жества очища́ющи твои́м хода́тайством, и еди́ною Боже́ственною твое́ю моли́твою.

И́ный.

Ирмо́с: Устраши́ся отроко́в благочести́вых, сообра́знаго души́ нескве́рнаго те́ла, и устрани́ся воспита́нный в безме́рном веществе́, неутружде́н о́гнь: присноживу́щу же, изувя́дшу пла́меню, ве́чнующая пе́снь воспева́шеся: Го́спода вся́ дела́ по́йте, и превозноси́те во вся́ ве́ки.

Ва́с я́коже све́т, Христо́с, в концы́ всея́ вселе́нныя апо́столы да́вый, ше́дше, рече́, научи́те во язы́цех: да в пло́ти мя́ су́ща уви́дите воздержа́нием живу́ща, и вра́жию всю́ си́лу попира́юща, и пу́ть челове́ком явля́юща пра́вый.

Яви́л еси́ гряду́щее Христе́ воздержа́ние, во очище́ние челове́ком, страсте́й же отлуче́ние: си́м бо твои́ апо́столи благоугоди́ша, и све́тлии свети́льницы на земли́ яви́шася, пропове́дающе Го́спода в тре́х ли́цех, во еди́ном же существе́, все́м воспева́ющим его́.

Язы́ком пропове́дницы вы́ по́слани бы́сте от учитля Христа́, о ученцы́, уче́ньми Боже́ственными просвеща́ти и́х помышле́ния, страсте́й же и бра́шен удержава́тися, жела́ти же воздержа́ния, и Го́спода зна́ти сего́, и созда́теля, и творца́ все́х и благоде́теля.

Благослови́м Отца́, и Сы́на, и Свята́го Ду́ха, Го́спода.

Якоже иногда́ ка́ин уби́йца, не принесо́х души́ моея́ же́ртву непоро́чную Христе́, нечи́стым ра́зумом содержи́мь. Не возгнуша́йся мене́ приходя́ща к тебе́ посто́м спа́се преблаги́й, но при́зри на да́ры, я́же любо́вию несу́ тебе́ Бо́же мо́й, во вре́мя поще́ния.

И ныне, Богоро́дичен: Блаже́нное бы́сть чре́во Богома́тере, я́ко прии́мшее сло́во, дебельство́м пло́ти от нея́ смеси́вшееся челове́ческому зра́ку, по ипоста́си: и яви́ся гра́д Бо́жий, в не́мже жи́ти вы́шний благоволи́, и Госпо́дь Бо́г. Те́мже вопие́м ти́: ра́дуйся благода́тная, чи́стая Богоро́дице.

Хва́лим, благослови́м, покланя́емся Го́сподеви, пою́ще и превознося́ще во вся ве́ки.

Ирмо́с: Устраши́ся отроко́в благочести́вых, сообра́знаго души́ нескве́рнаго те́ла, и устрани́ся воспита́нный в безме́рном веществе́, неутружде́н о́гнь: присноживу́щу же, изувя́дшу пла́меню, ве́чнующая пе́снь воспева́шеся: Го́спода вся́ дела́ по́йте, и превозноси́те во вся́ ве́ки.

И стихосло́вится Честне́йшую:

Пе́снь 9:

Ирмо́с: Я́ко сотвори́ Мне́ вели́чия Си́льный и свято и́мя Его́, и ми́лость Его́ в ро́д и ро́д боя́щимся Его́.

Я́ко пла́мень ми́ру по́слани бы́сте неле́стный, избавля́юще глубины́ грехо́в: воспева́ем ра́достию укрепи́вшаго ва́с, я́ко апо́столы своя́.

Я́ко ва́с ми́ру объюроде́вшу, дре́вле Христо́с я́ко со́ль посла́ му́дрии, вразумля́ющия его́ к позна́нию своему́, восхваля́ем ве́рно.

Я́ко мно́жество прегреше́ний обдержи́т мя́ лю́тых, со слеза́ми припа́даю ти́ Христе́, проще́ния прося́, благовре́мение ми́ пода́ти во вре́мя поста́.

Я́ко вери́гами нереши́мыми свя́зан мои́х страсте́й, стеню́ и взыва́ю ти́ спа́се: свободи́ мя, я́ко да пою́ прера́дованно благоутро́бие твое́.

Богоро́дичен: Я́ко показа́ тя Бо́г, Де́во чи́стая, по́мощь ро́ду челове́ческому, не преста́й приле́жно моля́щи его́ о на́с ве́рных.

И́ный.