Коллектив авторов - Триодь Постная (на цсл., гражданский шрифт)

По 6-й песни мученичен:

Крестом вооружившеся, страстотерпцы Твои победиша козни началозлобнаго врага, Христе Боже наш, возсияша, яко светила, человеки наставляюще, дают исцеления верою просящим. Тех молитвами спаси души наша.

В ПЯТНИЦУ НА УТРЕНИ, по 1-м стихословии седальны крестны:

На Кресте Тя пригвоздиша иудеи, Спасе, имже нас от язык призвал еси, Человеколюбче Господи, простерл еси длани на нем волею Твоею; копием же ребра Твоя пробости изволил еси. Множеству щедрот Твоих слава, Долготерпеливе.

Стих: Возносите Господа Бога нашего, и покланяйтеся подножию ногу Его, яко свято есть.

Свет душ наших ныне зряще, Христе, Крест Твой пречистый, и покланяющеся тому, светло вопием Ти: слава Тебе, на сем вознестися восхотевый; слава Тебе, тем всю тварь просветивый; имже Тя непрестанно песньми славим.

Слава, и ныне, Крестобогородичен :На Кресте Тя вознесена яко виде, Пречистая Мати Твоя, Слове Божий, матерски рыдающи вещаше: что новое и странное сие, Сыне Мой, чудо? Како, Жизнь всех, вкушаеши смерти, оживити умершия хотя, яко Благоутробен?

По 6-й песни мученичен:

Честное страстотерпцев торжество, небо Церковь показа, и с человеки ликуют Ангели; тех молитвами, Христе Боже, спаси души наша.

В ПОНЕДЕЛЬНИК НА УТРЕНИ, по 1-м стихословии седальны умилительны:

Судий седящу, и Ангелом стоящим, трубе гласящей, и пламени горящу, что сотвориши, душе моя, ведома на суд? Тогда бо лютая твоя предстанут, и тайная обличатся согрешения. Темже прежде конца возопий Христу Богу: Сердцеведче, согреших, помилуй мя.

Стих: Господи, да не яростию Твоею обличиши мене, ниже гневом Твоим накажеши мене.

Душе, яже зде привременна, тамо же вечна. Зрю судилище, и на престоле Судию, и трепещу изречения. Прочее, душе, обратися, суд непрощаемь.

Слава, и ныне, Богородичен :Со Ангелы небесная, с человеки земная, гласом радования, Богородице, вопием Ти: радуйся, врата небес ширшая. Радуйся, едина земнородных спасение. Радуйся, Чистая. Радуйся, Благодатная, рождшая Бога воплощенна.

По 6-й песни мученичен:

Господи, чаши страсти Твоей, страстотерпцы Твой поревновавше, оставиша житейскую красоту, и быша Ангелом сопричастницы. Тех мольбами подаждь душам нашим очищение и велию милость.

ВО ВТОРНИК НА УТРЕНИ, по 1-м стихословии седальны умилительны:

На ложи лежа грехов многих, окрадаюся надеждею спасения моего: сон бо лености моей ходатайствует души моей мучение. Темже пощади мя, Христе Боже, яко един Человеколюбец.

Стих: Господи, да не яростию Твоею обличиши мене, ниже гневом Твоим накажеши мене.

Вси побдим, и Христа усрящим со множеством елея, и свещами светлыми, яко да чертога внутрь сподобимся: иже бо вне дверей постигнувый, бездельне Богови воззовет: помилуй мя.

Слава, и ныне, Богородичен :Странное Девы таинство, миру показася спасительное: от Ней бо родился еси без семене, и плотию показался еси без истления, всех радосте, Господи, слава Тебе.

По 6-й песни мученичен:

Чудеса святых Твоих мученик, стену необориму нам даровавый, Христе Боже: тех молитвами советы языков разори, верныя люди укрепи, яко един Благ и Человеколюбец.

В СРЕДУ НА УТРЕНИ, по 1-м стихословии, седальны крестны:

Распеншагося Спаса и Избавителя нашего, волею яко весть, и якоже благоизволи, воспоим вернии и прославим: яко пригвозди на Кресте грехи человеков, избавляя от лести род человеческий, и Царствия сподобил есть.

Стих: Возносите Господа Бога нашего, и покланяйтеся подножию ногу Его, яко свято есть.

Крест претерпев Твоею волею, и от тли человеки свободил еси, Спасе: воспеваем, вернии, и покланяемся Ти, яко просветил еси нас силою крестною: и вси прославляем Тя, Человеколюбие щедрый, яко Жизнодавца и Господа.

Слава, и ныне, Крестобогородичен :Кресту Господню предстоящи, рыдающи вопияше Богородица: увы Мне, о чадо Мое! увы Мне, свете очию Моею! како простерлся еси на Кресте, прострый божественне небо яко кожу, и от моря возведый источники вод Твоим повелением.

По 6-й песни мученичен:

Страстотерпцы Твои, Господи, великия заступники показал еси, Спасе, вселенней, имиже страсти отбегают: тех молитвами спаси души наша.

В ЧЕТВЕРГ НА УТРЕНИ, по 1-м стихословии седальны апостольстии:

Яко самовидцы Слова и слуги Христовы, премудрыя апостолы похвалим в песнех духовных и пениих, вси земнии: Христа бо прилежно молят тии о нас, поющих священную их память и покланяющихся мощем.

Стих: Во всю землю изыде вещание их, и в концы вселенныя глаголы их.

Апостолы Господни согласно восхвалим, яко светила, явльшияся вселенней: языки бо благочестно уловиша и, просветивше нас, возпроповедают ясно Троицу чести Святую, соединенную убо Существом, разделенную же Ипостасьми.

Слава, и ныне, Богородичен :Неискусобрачная Невесто и Приснодево, со Ангелы непрестанно восхваляем Тя, яко сотвори нам величия Тобою Сын Твой и Бог, Иже прежде век от Отца, во утробе Твоей вместитися благоволи, свободити от прелести род наш.

По 6-й песни мученичен:

Святых мученик исправлением, Небесныя Силы преудивишася, яко в теле смертнем, безтелеснаго врага, силою Креста подвизавшеся добре, победиша невидимо; и молятся Господеви, помиловатися душам нашим.

В ПЯТНИЦУ НА УТРЕНИ, по 1-м стихословии седальны крестны:

Место лобное рай бысть: точию бо водрузися Древо Крестное, абие израсти грозд животный, Тебе, Спасе, в наше веселие, слава Тебе.

Стих: Возносите Господа Бога нашего, и покланяйтеся подножию ногу Его, яко свято есть.

Древо Креста Твоего, Спасе наш, мирови показася спасительно: на нем бо волею пригвоздивыйся, от клятвы избавил еси земнородныя, всех Радосте, Господи, слава Тебе.

Слава, и ныне, Крестобогородичен :На Кресте Тя, Христе, зрящи Мати Твоя, волею посреде разбойнику висяща, растерзающися матерски утробою, глаголаше: безгрешный Сыне, како без правды на Кресте, яко злодей, пригвоздился еси, род человеческий оживити хотя, яко Преблагий?

По 6-й песни мученичен:

Сияет днесь память страстотерпец, имать бо и от небес зарю; лик Ангельский торжествует, и человеческий род спразднует. Темже молятся Господеви, помиловатися душам нашим.

В ПОНЕДЕЛЬНИК НА УТРЕНИ, по 1-м стихословии седальны умилительны:

Помышляю день страшный, и плачуся деяний моих лукавых: како отвещаю безсмертному Царю? или коим дерзновением воззрю на Судию, блудный аз? Благоутробный Отче, Сыне Единородный, Душе Святый, помилуй мя.