ПСАЛТИРЬ

Исповедайтеся Господеви и призывайте имя eго, возвестите во языцех дела eго; воспойте eму и пойте eму, поведите вся чудеса eго. Хвалитеся о имени святем eго; да возвеселится сердце ищущих Господа; взыщите Господа и утвердитеся, взыщите лица eго выну. Помяните чудеса eго, яже сотвори, чудеса eго и судбы уст eго, семя авраамле раби eго, сынове iаковли избраннiи eго. Той Господь Бог наш; по всей земли судбы eго. Помяну в век завет свой, слово, eже заповеда в тысящы родов, eже завеща аврааму, и клятву свою iсааку; и постави ю iакову в повеленiе и Израилю в завет вечен, гля; тебе дам землю ханааню, уже достоянiя вашего. Внегда быти им малым числом, малейшым и пришелцeм в ней, и преидоша от языка в язык и от царствiя в люди ины; не остави человека обидети их и обличи о них цари; не прикасайтеся помазанным моим, и во пророцех моих не лукавнуйте. И призва глад на землю; всяко утвержденiе хлебное сотры. Посла пред ними человека; в раба продан бысть iосиф. Смириша во оковах нозе eго, железо пройде душа eго, дондеже прiиде слово eго; слово Господне разжже eго. Посла царь и разреши eго; князь людiй, и отпусти eго. Постави eго господина дому своему и князя всему стяжанiю своему, наказати князи eго яко себе и старцы eго умудрити. И вниде Израиль во eгипет, и iаков пришелствова в землю хамову. И возрасти люди своя зело и укрепи я паче врагов их. Преврати сердце их возненавидети люди eго, лесть сотворити в рабех eго. Посла моисеа раба своего, аарона, eгоже избра себе; положи в них словеса знаменiй своих и чудес своих в земли хамове. Посла тму и помрачи, яко преогорчиша словеса eго. Преложи воды их в кровь и измори рыбы их. Воскипе земля их жабами в сокровищницах царей их. Рече, и прiидоша пeсiя мухи и скнiпы во вся пределы их. Положи дожди их грады, oгнь попаляющь в земли их; и порази вiнограды их и смоквы их, и сотры всякое древо предел их. Рече, и прiидоша прузи и гусeницы, имже не бе числа, и снедоша всяку траву в земли их, и поядоша всяк плод земли их. И порази всякаго первенца в земли их, начаток всякаго труда их; и изведе я с сребром и златом; и не бе в коленех их боляй. Возвеселися eгипет во исхожденiи их; яко нападе страх их на ня. Распростре облак в покров им, и oгнь, eже просветити им нощiю. Просиша, и прiидоша крастeли, и хлеба небеснаго насыти я; разверзе камень, и потекоша воды, потекоша в безводных реки; яко помяну слово святое свое, eже ко аврааму рабу своему. И изведе люди своя в радости и избранныя своя в веселiи. И даде им страны язык, и труды людiй наследоваша; яко да сохранят оправданiя eго и закона eго взыщут.

Исповедайтеся Господеви, яко благ, яко в век милость eго. Кто возглаголет силы Господни, слышаны сотворит вся хвалы eго? Блажени хранящiи суд и творящiи правду во всякое время. Помяни нас, Господи, во благоволенiи людiй твоих, посети нас спасенiем твоим, видети во благости избранныя твоя, возвеселитися в веселiи языка твоего, хвалитися с достоянiем твоим. Согрешихом со oтцы нашими, беззаконновахом, неправдовахом; oтцы наши во eгипте не разумеша чудес твоих, ни помянуша множества милости твоея; и преогорчиша восходяще в чермное море. И спасе их имене своего ради, сказати силу свою; и запрети чермному морю, и изсяче; и настави я в бездне яко в пустыни. И спасе я из руки ненавидящих и избави я из руки врагов. Покры вода стужающыя им; ни eдин от них избысть. И вероваша словеси eго и воспеша хвалу eго. Ускориша, забыша дела eго, не стерпеша совета eго; и похотеша желанiю в пустыни и искусиша Бога в безводней. И даде им прошенiе их, посла сытость в душы их. И прогневаша моисеа в стану, аарона святаго Господня. Отверзеся земля и пожре дафана и покры на сонмищи авiрона; и разжжеся oгнь в сонме их, пламень попали грешники. И сотвориша телца в хориве и поклонишася истуканному; и измениша славу eго в подобiе телца ядущаго траву. И забыша Бога спасающаго их, сотворшаго вeлiя во eгипте, чудеса в земли хамове, страшная в мори чермнем. И рече потребити их, аще не бы моисей избранный eго стал в сокрушенiи пред ним, возвратити ярость eго, да не погубит их. И уничижиша землю желанную, не яша веры словеси eго; и поропташа в селенiих своих, не услышаша гласа Господня. И воздвиже руку свою на ня, низложити я в пустыни, и низложити семя их во языцех, и расточити я в страны. И причастишася веельфегору и снедоша жeртвы мертвых; и раздражиша eго в начинанiих своих, и умножися в них паденiе. И ста фiнеес и умилостиви, и преста сечь; и вменися eму в правду, в род и род до века. И прогневаша eго на воде пререканiя, и озлоблен бысть моисей их ради; яко преогорчиша дух eго и разнствова устнама своима. Не потребиша языки, яже рече Господь им. И смесишася во языцех и навыкоша делом их; и поработаша истуканным их, и бысть им в соблазн. И пожроша сыны своя и дщeри своя бесовом, и пролiяша кровь неповинную, кровь сынов своих и дщерей, яже пожроша истуканным ханаанским; и убiена бысть земля их кровьми и осквернися в делех их; и соблудиша в начинанiих своих. И разгневася яростiю Господь на люди своя и омерзи достоянiе свое; и предаде я в руки врагов, и обладаша ими ненавидящiи их. И стужиша им врази их; и смиришася под руками их. Множицею избави я; тiи же преогорчиша eго советом своим, и смиришася в беззаконiих своих. И виде Господь, внегда скорбети им, внегда услышаше моленiе их; и помяну завет свой, и раскаяся по множеству милости своея; и даде я в щедроты пред всеми пленившими я. Спаси ны, Господи, Боже наш, и собери ны от язык, исповедатися имени твоему святому, хвалитися во хвале твоей. Благословен Господь Бог Израилев от века и до века. И рекут вси людiе; буди, буди.

Исповедайтеся Господеви, яко благ, яко в век милость eго. Да рекут избавленнiи Господем, ихже избави из руки врага, и от стран собра их, от восток и запад, и севера и моря; заблудиша в пустыни безводней, пути града обителнаго не обретоша; алчуще и жаждуще, душа их в них изчезе. И воззваша ко Господу, внегда скорбети им, и от нужд их избави я; и настави я на путь прав, внити во град обителный. Да исповедят Господеви милости eго и чудеса eго сыновом человечeским; яко насытил eсть душу тщу, и душу алчущу исполни благ; седящыя во тме и сени смертней, окованныя нищетою и железом, яко преогорчиша словеса Божiя, и совет вышняго раздражиша. И смирися в трудех сердце их, и изнемогоша, и не бе помагаяй. И воззваша ко Господу, внегда скорбети им, и от нужд их спасе я; и изведе я из тмы и сени смертныя, и узы их растерза. Да исповедят Господеви милости eго и чудеса eго сыновом человечeским; яко сокруши врата медная, и верeи железныя сломи. Воспрiят я от пути беззаконiя их; беззаконiй бо ради своих смиришася. Всякаго брашна возгнушася душа их, и приближишася до врат смертных. И воззваша ко Господу, внегда скорбети им, и от нужд их спасе я; посла слово свое, и изцели я, и избави я от растлений их. Да исповедят Господеви милости eго и чудеса eго сыновом человечeским; и да пожрут eму жертву хвалы и да возвестят дела eго в радости. Сходящiи в море в кораблех, творящiи деланiя в водах многих, тiи видеша дела Господня и чудеса eго во глубине. Рече, и ста дух бурен, и вознесошася волны eго; восходят до небес и низходят до бездн; душа их в злых таяше; смятошася, подвигошася яко пiяный, и вся мудрость их поглощена бысть. И воззваша ко Господу, внегда скорбети им, и от нужд их изведе я; и повеле бури, и ста в тишину, и умолкоша волны eго. И возвеселишася, яко умолкоша, и настави я в пристанище хотенiя своего. Да исповедят Господеви милости eго и чудеса eго сыновом человечeским; да вознесут eго в церкви людстей, и на седалищи старeц восхвалят eго. Положил eсть реки в пустыню и исходиша водная в жажду, землю плодоносную в сланость, от злобы живущих на ней. Положил eсть пустыню во eзера водная и землю безводную во исходища водная. И насели тамо алчущыя, и составиша грады обитeлны; и насеяша села, и насадиша вiнограды, и сотвориша плод житен. И благослови я, и умножишася зело; и скоты их не умали. И умалишася и озлобишася от скорби зол и болезни; излiяся уничиженiе на князи их, и заблуждати сотвори я по непроходней, а не по пути. И поможе убогу от нищеты и положи яко oвцы oтечeствiя. Узрят правiи и возвеселятся, и всякое беззаконiе заградит уста своя. Кто премудр и сохранит сiя? и уразумеют милости Господни.