ПСАЛТИРЬ

Услыши, Господи, правду мою, вонми моленiю моему, внуши молитву мою не во устнах льстивых. От лица твоего судба моя изыдет; oчи мои да видита правоты. Искусил eси сердце мое, посетил eси нощiю; искусил мя eси, и не обретеся во мне неправда. Яко да не возглаголют уста моя дел человеческих, за словеса устен твоих аз сохраних пути жестоки. Соверши стопы моя во стезях твоих, да не подвижутся стопы моя. Аз воззвах, яко услышал мя eси, Боже; приклони ухо твое мне и услыши глаголы моя. Удиви млти твоя, спасаяй уповающыя на тя от противящихся деснице твоей; сохрани мя, Господи, яко зеницу oка; в крове крилу твоeю покрыеши мя от лица нечестивых обидящих мя; врази мои душу мою одержаша тук свой затвориша, уста их глаголаша гордыню. Изгонящiи мя ныне обыдоша мя, oчи свои возложиша уклонити на землю. Обяша мя яко лев готов на лов и яко скимен обитаяй в тайных. Воскресни, Господи, предвари я и запни им; избави душу мою от нечестиваго, oружiе твое от враг руки твоея, Господи, от малых от земли; раздели я в животе их, и сокровенных твоих исполнися чрево их; насытишася сынов, и оставиша останки младенцeм своим. Аз же правдою явлюся лицу твоему, насыщуся, внегда явитимися славе твоей.

Возлюблю тя, Господи, крепосте моя; Господь утвержденiе мое, и прибежище мое, и избавитель мой, Бог мой, помощник мой, и уповаю на него; защититель мой, и рог спасенiя моего, и заступник мой. Хваля призову Господа и от враг моих спасуся. Одержаша мя болезни смeртныя, и потоцы беззаконiя смятоша мя; болезни адовы обыдоша мя, предвариша мя сети смeртныя. И внегда скорбети ми, призвах Господа и к Богу моему воззвах; услыша от храма святаго своего глас мой, и вопль мой пред ним внидет во ушы eго. И подвижеся и трепетна бысть земля, и основанiя гор смятошася и подвигошася, яко прогневася на ня Бог. Взыде дым гневом eго, и oгнь от лица eго воспламенится; углiе возгореся от него. И приклони небеса и сниде, и мрак под ногама eго. И взыде на херувiмы и лете, лете на крилу ветрeню. И положи тму закров свой; окрест eго селенiе eго; темна вода во облацех воздушных. От облистанiя пред ним облацы проидоша, град и углiе oгненное. И возгреме с небесе Господь, и вышнiй даде глас свой. Низпосла стрелы и разгна я, и молнiи умножи и смяте я. И явишася источницы воднiи, и открышася основанiя вселенныя от запрещенiя твоего, Господи, от дохновенiя духа гнева твоего. Низпосла с высоты и прiят мя, воспрiят мя от вод многих. Избавит мя от врагов моих сильных и от ненавидящих мя; яко утвердишася паче менe. Предвариша мя в день озлобленiя моего; и бысть Господь утвержденiе мое. И изведе мя на широту; избавит мя, яко восхоте мя. И воздаст ми Господь по правде моей, и по чистоте руку моeю воздаст ми, яко сохраних пути Господни и не нечествовах от Бога моего. Яко вся судьбы eго предо мною, и оправданiя eго не отступиша от менe. И буду непорочен с ним и сохранюся от беззаконiя моего. И воздаст ми Господь по правде моей и по чистоте руку моeю пред oчима eго. С преподобным преподобен будеши, и с мужем неповинным неповинен будеши, и со избранным избран будеши, и со строптивым развратишися. Яко ты люди смирeнныя спасеши и oчи гордых смириши. Яко ты просветиши светилник мой, Господи; Боже мой, просветиши тму мою. Яко тобою избавлюся от искушенiя, и Богом моим прейду стену. Бог мой, непорочен путь eго; словеса Господня разжжeна. Защититель eсть всех уповающих на него. Яко кто Бог, разве Господа? или кто Бог, разве Бога нашего? Бог препоясуяй мя силою, и положи непорочен путь мой; совершаяй нозе мои яко eлени, и на высоких поставляяй мя; научаяй руце мои на брань, и положил eси лук медян мышца моя; и дал ми eси защищенiе спасенiя, и десница твоя воспрiят мя; и наказанiе твое исправит мя в конец, и наказанiе твое то мя научит. Уширил eси стопы моя подо мною, и не изнемогосте плесне мои. Пожену враги моя, и постигну я, и не возвращуся, дондеже скончаются; оскорблю их, и не возмогут стати, падут под ногама моима. И препоясал мя eси силою на брань, спял eси вся востающыя на мя под мя. И врагов моих дал ми eси хребет и ненавидящыя мя потребил eси. Воззваша, и не бе спасаяй; ко Господу, и не услыша их. И истню я яко прах пред лицем ветра, яко бренiе путiй поглажду я. Избавиши мя от пререканiя людiй; поставиши мя во главу языков; людiе, ихже не ведех, работаша ми, в слух уха послушаша мя. Сынове чуждiи солгаша ми, сынове чуждiи обетшаша и охромоша от стезь своих. Жив Господь, и благословен Бог, и да вознесется Бог спасенiя моего, Бог даяй отмщенiе мне и покоривый люди под мя, избавитель мой от враг моих гневливых; от востающих на мя вознесеши мя, от мужа неправедна избавиши мя. Сего ради исповемся тебе во языцех, Господи, и имени твоему пою; величаяй спасeнiя царeва и творяй милость хрiсту своему Давиду и семени eго до века.

Небеса поведают славу Божiю, творенiе же руку eго возвещает твердь. День дни отрыгает глагол, и нощь нощи возвещает разум. Не суть речи, ниже словеса, ихже не слышатся гласи их. Во всю землю изыде вещанiе их, и в концы вселенныя глаголы их; в солнце положи селенiе свое; и той яко жених исходяй от чертога своего, возрадуется яко исполин тещи путь. От края небесе исход eго, и сретенiе eго до края небесе; и несть, иже укрыется теплоты eго. Закон Господень непорочен, обращаяй душы; свидетелство Господне верно, умудряющее младенцы. Оправданiя Господня права, веселящая сердце; заповедь Господня светла, просвещающая oчи. Страх Господень чист, пребываяй в век века; судбы Господни истинны, оправданны вкупе, вожделенны паче злата и камене честна многа, и слаждшя паче меда и сота. Ибо раб твой хранит я; внегда сохранити я, воздаянiе много. Грехопадeнiя кто разумеет? от тайных моих очти мя, и от чуждих пощади раба твоего; аще не обладают мною, тогда непорочен буду, и очищуся от греха велика. И будут во благоволенiе словеса уст моих, и поученiе сердца моего пред тобою выну, Господи, помощниче мой и избавителю мой.

Услышит тя Господь в день печали, защитит тя имя Бога iаковля. Послет ти помощь от святаго, и от Сiона заступит тя. Помянет всяку жертву твою, и всесожженiе твое тучно буди. Даст ти Господь по сердцу твоему, и весь совет твой исполнит. Возрадуемся о спасенiи твоем, и во имя Господа Бога нашего возвеличимся; исполнит Господь вся прошeнiя твоя. Ныне познах, яко спасе Господь хрiста своего; услышит eго с небесе святаго своего; в силах спасенiе десницы eго. Сiи на колесницах, и сiи на конех; мы же во имя Господа Бога нашего призовем. Тiи спяти быша и падоша; мы же востахом и исправихомся. Господи, спаси царя, и услыши ны, в oньже аще день призовем тя.

Господи, силою твоею возвеселится царь, и о спасенiи твоем возрадуется зело. Желанiе сердца eго дал eси eму, и хотенiя устну eго неси лишил eго. Яко предварил eси eго благвенiем благостынным, положил eси на главе eго венец от камене честна. Живота просил eсть у тебe, и дал eси eму долготу днiй во век века. Велiя слава eго спасенiем твоим; славу и велелепiе возложиши на него. Яко даси eму благвенiе во век века; возвеселиши eго радостiю с лицем твоим. Яко царь уповает на Господа, и милостiю вышняго не подвижится. Да обрящется рука твоя всем врагом твоим, десница твоя да обрящет вся ненавидящыя тебе. Яко положиши их яко пещь oгненную во время лица твоего; Господь гневом своим смятет я, и снесть их oгнь. Плод их от земли погубиши, и семя их от сынов человеческих. Яко уклониша на тя злая, помыслиша советы, ихже не возмогут составити. Яко положиши я хребет; во избытцех твоих уготовиши лице их. Вознесися, Господи, силою твоею; воспоем и поем силы твоя.