Коллектив авторов - Праздничная Минея (на цсл., гражданский шрифт, с ударениями)

Евангелие от Матфея, зачало 57 (Мф 14:1–13).

Во вре́мя о́но, услы́шав И́род четвертовла́стник слух Иису́сов, рече́ отроко́м свои́м: Сей есть Иоа́нн Крести́тель, той воскре́се от ме́ртвых, и сего́ ра́ди си́лы де́ются о нем. И́род бо есмь Иоа́нна, связа́ его́, и всади́ в темни́цу, Иродиа́ды ра́ди жены́ Фили́ппа бра́та своего́. Глаго́лаше бо ему Иоа́нн: не досто́ит ти име́ти ея́. И хотя́ше его́ уби́ти, убоя́ся наро́да, зане́ я́ко проро́ка его́ име́яху. Дни́ же бы́вшу рождества́ И́родова, пляса́ дщи́ Иродиа́дина посреде́, и угоди́ И́родови. Те́мже и с кля́твою изрече́ ей да́ти, его́же а́ще воспро́сит. Она́ же нава́ждена ма́терию свое́ю, даждь ми, рече́, зде на блю́де главу́ Иоа́нна Крести́теля. И печа́лен бысть царь: кля́твы же ра́ди, и за возлежа́щих с ним, повеле́ да́ти ей. И посла́в усе́кну Иоа́нна в темни́це. И принесо́ша главу́ его́ на блю́де, и да́ша деви́це, и отнесе́ ма́тери свое́й. И присту́пльше ученицы́ его́, взя́ша те́ло его́, и погребо́ша е́, и прише́дше возвести́ша Иису́сови. И слы́шав Иису́с оты́де отту́ду в корабли́, в пу́сто ме́сто еди́н. И слы́шавше наро́ди, по Нем идо́ша пе́ши от градо́в.

По 50-м псалме.

Слава:Моли́твами свята́го сла́внаго Проро́ка, Предте́чи и Крести́теля Госпо́дня Иоа́нна, / Ми́лостиве, очи́сти / мно́жества согреше́ний на́ших.

И ныне:Моли́твами Богоро́дицы, / Ми́лостиве, очи́сти / мно́жества согреше́ний на́ших.

Таже, глас 6: Поми́луй мя, Бо́же, / по вели́цей ми́лости Твое́й / и по мно́жеству щедро́т Твои́х / очи́сти беззако́ние мое́.

И стихира, глас 6: Пляса́ учени́ца вселука́ваго диа́вола / и главу́ твою́, Предте́че, мзду взят. / О, пи́ра, испо́лнена крове́й! / Лу́чше бе не кля́тися, И́роде беззако́нне, лжи вну́че. / А́ще ли же и кля́лся еси́, / но не о добре́ кля́лся: / лу́чше бе солга́вшу жизнь получи́ти, / не́же и́стинствовавшу главу́ Предте́чеву усе́кнути. / Но мы Крести́теля, я́ко в рожде́нных жена́ми бо́льша, / досто́йно чту́ще, ублажа́ем.

Канона два, первый со ирмосом на 8. Иоанна монаха, глас 8.

Песнь 1

Ирмос: Во́ду проше́д, я́ко су́шу, / и еги́петскаго зла избежа́в, / изра́ильтянин вопия́ше: / Изба́вителю и Бо́гу на́шему пои́м.

Припев: Святы́й вели́кий Иоа́нне, Предте́че и Крести́телю Госпо́день, моли́ Бо́га о на́с.

От утро́бы непло́дныя я́вльшася проро́ка / в ложесна́х Деви́ческих, во чре́ве Носи́мому неизрече́нно, / свяще́ннаго воспое́м Предте́чу.

Преде́лы естества́ превозше́д, пра́вды соблю́л еси́ зако́ны, / беззако́нное смеше́ние облича́я, не убоя́вся царе́ва суровства́.

Зако́нным млеко́м воспита́вся, законоположе́ние совокупле́ния зако́ннаго, / я́ко зако́на печа́ть запеча́тствуя, / сопроти́вился еси́ ме́рзкому прелюбодея́нию.

Богородичен: Чи́ни Тя А́нгел и челове́к, Безневе́стная Ма́ти, восхваля́ют непреста́нно: / Зижди́теля бо сих я́ко Младе́нца на объя́тиих Твои́х носи́ла еси́.

Другий канон на 6. Кир Андрея Критскаго, глас тойже.

Ирмос: Истря́сшему в мо́ри мучи́тельство фарао́не / и Изра́иля су́шею наста́вльшему / пои́м Христу́, / я́ко просла́вися во ве́ки.

Припев: Святы́й вели́кий Иоа́нне, Предте́че и Крести́телю Госпо́день, моли́ Бо́га о на́с.

Пусты́ни кра́сное овча́, / Заха́риин плод и Елисаве́тино па́че наде́жди прозябе́ние, / предповелева́ет ве́рным торжествова́ти честну́ю его́ па́мять.

О, рожде́ния, испо́лнена кро́ве! / О, пи́ра ме́рзка! / Уби́йством бо пия́нство И́род раствори́, / трапе́за же его́ скверноуби́йства го́рькаго испо́лнися.

Слава:Обличи́вшаго И́рода беззако́ннующа, ве́рнии, / и отсече́ние главы́ претерпе́вша, воспои́м Крести́теля, / я́ко за ре́вность Бо́жию умерщвле́на.

И ныне, Богородичен: Неопи́саннаго Бо́га Сло́ва, всего́ все́льшася в Тя, / родила́ еси́, Чи́стая Богороди́тельнице, / сугу́ба Того́, я́ко еди́на су́ща Сы́на, / воплоще́нна из Тебе́ неизрече́нно.

Катавасия: Крест начерта́в, Моисе́й / впря́мо жезло́м Чермно́е пресече́, / Изра́илю пешеходя́щу; / то́же обра́тно фарао́новым колесни́цам, / уда́рив, совокупи́, / вопреки́ написа́в непобеди́мое ору́жие. / Тем Христу́ пои́м, Бо́гу на́шему, я́ко просла́вися.

Песнь 3

Ирмос: Небе́снаго кру́га Верхотво́рче, Го́споди, / и Це́ркве Зижди́телю, / Ты мене́ утверди́ в любви́ Твое́й, / жела́ний кра́ю, ве́рных утвержде́ние, / Еди́не Человеколю́бче.

Припев: Святы́й вели́кий Иоа́нне, Предте́че и Крести́телю Госпо́день, моли́ Бо́га о на́с.

Дре́вних я́ко хода́тай и но́вых, Предте́че, Ева́нгельских пропове́даний / ты, предста́в, смеше́ние беззако́нное мучи́тельское обличи́л еси́, / сла́вную смерть, ра́дуяся, прия́л еси́.

От ма́тере беззако́нныя преднаучена́ отрокови́ца, / обюроде́вшу пия́нством И́родови рече́: / даждь на блю́де главу́ Иоа́ннову, / ма́тери да пода́м дар возжеле́нен.

Обличе́ния не терпя́ безсту́дный мучи́тель / богоно́снаго твоего́ язы́ка, сла́вне Предте́че, / отрокови́це предае́т, же́нским пляса́нием, честну́ю твою́ страда́льную главу́, пресла́вне.

Богородичен: Всели́вся в Де́ву теле́сне, Го́споди, / яви́лся еси́ челове́ком, я́коже подоба́ше ви́дети Тя, / Ю́же и показа́л еси́ я́ко и́стинную Богоро́дицу и ве́рным по́мощь, / Еди́не Человеколю́бче.

Ин. Ирмос: Несть свят, я́ко Госпо́дь, / и несть пра́веден, я́ко Бог наш, / Его́же пое́т вся тварь: / несть пра́веден, па́че, Тебе́, Го́споди.

Припев: Святы́й вели́кий Иоа́нне, Предте́че и Крести́телю Госпо́день, моли́ Бо́га о на́с.

Бо́лий не воста́ в рожде́нных жена́ми Иоа́нна, взыва́ше Христо́с И́стина: / во утро́бе бо позна́ созда́ние Созда́вшаго, / пропове́даше ма́терним гла́сом.

Пе́рстом, пе́рвее, показа́в А́гнца / и язы́ком, второ́е, И́рода обличи́л еси́, / главо́ю же, тре́тие, источа́еши чудеса́ от зда́нна сосу́да нам.

Слава:Рожде́ние сла́вно, Крести́телю Христо́в, и житие́ твое́ непоро́чно, / и предизше́ствие че́стно, и показа́ние стра́нно, / смерть честна́ и погребе́ние сла́вно.

И ныне, Богородичен: Бог Сый, Сам Себе́ истощи́л еси́, Единоро́дне, / да спасе́ши, я́же созда́л еси́, / и́хже ра́ди вочелове́чился еси́, вопло́щся от Де́вы, / и, все мое́ премени́в естество́, приве́л еси́ Твоему́ Роди́телю.

Катавасия: Жезл во о́браз та́йны прие́млется, / прозябе́нием бо предразсужда́ет свяще́нника; / неплодя́щей же пре́жде Це́ркви, / ны́не процвете́ Дре́во Креста́, / в держа́ву и утвержде́ние.

Седален, глас 8. Подобен:Прему́дрости:

От непло́дове просия́в судо́м Бо́жиим и у́зы разреши́в язы́ка о́тча, / показа́л еси́ со́лнце, денни́цу озаря́ющее, / и лю́дем в пусты́ни Зижди́теля пропове́дал еси́, А́гнца, взе́млющаго мíра грехи́. / Те́мже ре́вностию царя́ обличи́л еси́, / в пресла́вную главу́ твою́ усе́чен быв, приснопа́мятне, Иоа́нне всехва́льне, / моли́ся Христу́ Бо́гу согреше́ний оставле́ние дарова́ти / пра́зднующим любо́вию святу́ю па́мять твою́. Дважды.