Коллектив авторов - Праздничная Минея (на цсл., гражданский шрифт, с ударениями)

Преве́чное Сло́во О́тчее,/ Иже во о́бразе Бо́жии сый/ и соста́вивый тварь из не су́щаго во еже бы́ти,/ времена́ и ле́та в Свое́й вла́сти положи́вый,/ благослови́ вене́ц ле́та бла́гости Твоея́,/ да́руя мир це́рквам Твои́м/ и побе́ды правосла́вным христиа́ном,/ благопло́дие же земли́ и нам ве́лию ми́лость.

Глас 4. Того́же: Ца́рствие Твое́, Христе́ Бо́же,/ ца́рство всех веко́в,/ и влады́чество Твое́ во вся́ком ро́де и ро́де,/ вся бо му́дростию сотвори́л еси́,/ времена́ и ле́та нам предложи́в./ Те́мже, благодаря́ще о всех и за вся́, вопие́м:/ благослови́ вене́ц ле́та бла́гости Твоея́/ и сподо́би нас неосужде́нно вопи́ти Тебе́:// Го́споди, сла́ва Тебе́.

Андре́я Пи́рскаго: Ше́ствия Твоя́, Бо́же,/ ше́ствия ве́лия и чу́дна:/ тем строе́ния Твоего́ си́лу велича́ем,/ я́ко Свет от Све́та прише́л еси́ во окая́нный мíр Твой/ и пе́рвую погуби́л еси́ кля́тву ветхаго Ада́ма,/ я́ко благоволи́л еси́, Сло́ве,/ и нам му́дростию времена́ и ле́та положи́л еси́,/ е́же сла́вити вседе́тельную Твою́ бла́гость:/ Го́споди, сла́ва Тебе́.

Святы́х жен, глас 2. Ге́рманова: Егда́ стра́стию Твое́ю, Го́споди,/ вселе́нную утверди́л еси́,/ тогда́ и немощству́ющии препоя́сашася си́лою,/ жены́ му́жествоваша на горча́йшаго мучи́теля/ и, побежде́ние ма́тернее испра́вивше,/ па́ки в сла́дости ра́йстей бы́ша,/ в сла́ву Твою́, ро́ждшагося от Жены́/ и спа́сшаго род челове́ческий.

Сла́ва, преподо́бнаго, глас тойже:

От ко́рене блага́го благи́й прозябе́ плод,/ и́же от младе́нства, свяще́нный Симео́н,/ благода́тию па́че не́же млеко́м воспита́н,/ и, на ка́мень те́ло возвы́сив,/ к Бо́гу же превозвы́сив ра́зум,/ Небе́сное созда́ доброде́тельми жили́ще,/ и, с боже́ственными Си́лами лико́вне ше́ствуя,/ Христа́ бысть жили́ще,/ Бо́га и Спа́са душ на́ших.

И ны́не, инди́кта. Глас 8. Ге́рманово:

Неизрече́нною му́дростию/ соста́вивый вся́ческая, Сло́ве, Христе́ Бо́же,/ времена́ и ле́та нам предложи́вый,/ дела́ рук Твои́х благослови́/ и ве́рныя лю́ди Твоя́ си́лою Твое́ю возвесели́,/ подая́ им кре́пость, я́ко Еди́н Благ и Человеколю́бец.

Славосло́вие вели́кое. И по Трисвято́м:

Тропа́рь инди́кта: Всея́ тва́ри Соде́телю,/ времена́ и ле́та во Свое́й вла́сти положи́вый,/ благослови́ вене́ц ле́та бла́гости Твоей, Го́споди,/ сохраня́я в ми́ре лю́ди и град Твой,/ моли́твами Богоро́дицы, и спаси́ ны.

Сла́ва, преподобнаго, глас 1:

Терпе́ния столп был еси́,/ ревнова́вый пра́отцем, преподо́бне,/ И́ову во страсте́х, Ио́сифу во искуше́ниих,/ и беспло́тных жи́тельству, сый в телеси́,/ Симео́не, о́тче наш,/ моли́ Христа́ Бо́га спасти́ся душа́м на́шим.

И ныне́, Богоро́дицы, глас то́йже:

Ра́дуйся, обра́дованная Богоро́дице Де́во,/ приста́нище и предста́тельство ро́да челове́ческаго,/ из Тебе́ бо воплоти́ся Изба́витель мíра,/ еди́на бо еси́ Ма́ти и Де́ва,/ присноблагослове́нная и препрославленная,/ моли́ Христа́ Бо́га мир дарова́ти всей вселе́нней.

Ектении́, и отпу́ст, и час 1-й.

На 1-м часе́ тропа́рь инди́кта. Сла́ва , святаго. И ны́не , Богоро́дичен часо́в. По Трисвято́м конда́к инди́кта и святаго глаго́лем пременя́юще. И про́чая, и соверше́нный отпу́ст.

Блаже́нны от кано́на инди́кта, песнь 3-я на 4, и преподо́бнаго, песнь 6-я на 4.

По вхо́де тропарь, пре́жде инди́кта и Богоро́дицы, и преподо́бнаго. Сла́ва , конда́к святаго, И ны́не , конда́к инди́кта. (Аще же храм Богоро́дицы: И ны́не , хра́ма Богоро́дицы, инди́кта же конда́к глаго́ли в нача́ле.)

Тропарь инди́кта, глас 2: Всея́ тва́ри Соде́телю,/ времена́ и ле́та во Свое́й вла́сти положи́вый,/ благослови́ вене́ц ле́та бла́гости Твоей, Го́споди,/ сохраня́я в ми́ре лю́ди и град Твой,/ моли́твами Богоро́дицы, и спаси́ ны . Дважды.

Тропарь Богоро́дицы, глас 1: Ра́дуйся, обра́дованная Богоро́дице Де́во,/ приста́нище и предста́тельство ро́да челове́ческаго,/ из Тебе́ бо воплоти́ся Изба́витель мíра,/ еди́на бо еси́ Ма́ти и Де́ва,/ присноблагослове́нная и препрославленная,/ моли́ Христа́ Бо́га мир дарова́ти всей вселе́нней.

Тропарь, преподобнаго, глас тойже: Терпе́ния столп был еси́,/ ревнова́вый пра́отцем, преподо́бне,/ И́ову во страсте́х, Ио́сифу во искуше́ниих,/ и беспло́тных жи́тельству, сый в телеси́,/ Симео́не, о́тче наш,/ моли́ Христа́ Бо́га спасти́ся душа́м на́шим.

Конда́к инди́кта, глас 2: В Вы́шних живы́й, Христе́ Царю́,/ всех ви́димых и неви́димых Тво́рче и Зижди́телю./ И́же дни и но́щи, времена́ и ле́та сотвори́вый,/ благослови́ ны́не вене́ц ле́та,/ соблюди́ и сохрани́ в ми́ре град и лю́ди Твоя́,// Многоми́лостиве.

Конда́к преподобного, глас тойже: Вы́шних ища́й, вы́шним совокупля́яйся/ и колесни́цу о́гненную столп соде́лавый,/ тем собесе́дник А́нгелом был еси́, преподо́бне,/ с ни́ми Христу́ Бо́гу/ моля́ся непреста́нно о всех нас.

Проки́мен инди́кта, глас 3: Ве́лий Госпо́дь наш, и ве́лия кре́пость Его́,// и ра́зума Его́ несть числа́.

Стих: Хвали́те Го́спода, я́ко благ псало́м: Бо́гови нашему да услади́тся хвале́ние.

И преподо́бнаго проки́мен, глас 7: Честна́ пред Го́сподем// смерть преподо́бных Его́.

Апо́стол к Тимофе́ю, зача́ло 282 (1 Тим 2:1–7): [4]

Ча́до Тимофе́е, молю́ пре́жде всех твори́ти моли́твы, моле́ния, проше́ния, благодаре́ния за вся челове́ки, за царя́ и за вся, и́же во вла́сти суть, да ти́хое и безмо́лвное житие́ поживе́м во вся́ком благоче́стии и чистоте́. Сие́ бо добро́ и прия́тно пред Спаси́телем на́шим Бо́гом, И́же всем челове́ком хо́щет спасти́ся и в ра́зум и́стины приити́. Еди́н бо есть Бог, и еди́н хода́тай Бо́га и челове́ков, челове́к Христо́с Иису́с, да́вый Себе́ избавле́ние за всех, свиде́тельство времены́ свои́ми, в не́же поста́влен бых аз пропове́дник и Апо́стол, и́стину глаго́лю о Христе́, не лгу, учи́тель язы́ков в ве́ре и и́стине.

И преподо́бнаго, к Колосса́ем, зача́ло 258 (Кол 3:12–16):

Бра́тие, облецы́теся у́бо, я́коже избра́ннии Бо́жии, свя́ти и возлю́бленни, во утро́бы щедро́т, бла́гость, смиреному́дрие, кро́тость и долготерпе́ние, прие́млюще друг дру́га и проща́юще себе́, а́ще кто на кого́ и́мать порече́ние, я́коже и Христо́с прости́л есть вам, та́ко и вы. Над все́ми же си́ми стяжи́те любо́вь, я́же есть соу́з соверше́нства. И мир Бо́жий да водворя́ется в сердца́х ва́ших, во́ньже и зва́ни бы́сте во еди́ном те́ле, и благода́рни быва́йте. Сло́во Христо́во да вселя́ется в вас бога́тно, во вся́кой прему́дрости, уча́ще и вразумля́юще себе́ саме́х во псалме́х и пе́ниих и пе́снех духо́вных, во благода́ти пою́ще в сердца́х ва́ших Го́сподеви.