Таисия Олейникова - Помощь небесных покровителей. Полный сборник молитв на каждый день года (молитвы общие)

К вам, о святии вси, яко путеводным светильникам, деяньми своими осветившим путь небеснаго восхода, аз многогрешный смиренно колена сердца моего преклоняю и из глубины души взываю: умолите о мне Человеколюбца Бога, да не попустит ми еще блуждати по распутиям греха, но да просветит мой ум и сердце светом благодати Своея, яко да тою озаряем и подкрепляем, возмогу прочее время земнаго жития правою стезею непреткновенно преити и ходатайством вашим к Преблагому Господу сподоблюся, поне вмале причастник быти духовныя вашея трапезы в небесном чертозе Царя славы. Емуже со Безначальным Его Отцем и Пресвятым, Благим и Животворящим Духом буди слава, честь и поклонение во веки веков. Аминь.

Всеблаженнии и пресветлии дуси, Архангелов, Ангелов и всех небесных сил пречестнии чинове, выну предстоящии Пресвятей и Пребожественней Троице, и светом присносущныя славы озаряемии, непрестанно славословящии имя Ея! К вам прибегаем с молитвою и молением: предстательствуйте за нас у престола Господа Вседержителя, и яко служителие благодати, всем хотящим наследовати спасение вспомоществующии, и о единем грешнице кающемся веселящиися, споспешествуйте нам в благочестном провождении временнаго жития нашего и утвердите стопы наша на пути спасения. Преславнии и богосветлии дуси праведных, святии Божии, на земли во плоти богоугодне жительствовавшии, и ныне на небеси со Ангелы ликовствующии, честнии пророцы, предвозвестившии дни избавления нашего, Предтече Господень, проповедавший Агнца Божия, вземлющаго грех мира, и сподобивыйся крестити Источника святыни во струях Иорданских: апостоли Христовы, богоутвержденнии столпи Церкве, весь мир спасительным учением Христовым просветившии, и богомудрыми и священными законы Церковь Христову неподвижно утвердившии: святителие и пастырие стада Христова, молитвами и священнодействием святых и божественных Таин верныя вся очистившии и путем заповедей Господних ходити я научившии: страстотерпцы Христовы и мученицы, пред владыки и цари Христа Бога благодерзновенно исповедавшии и честную кровь свою за Него пролиявшии: преподобнии и праведнии, тесным и скорбным путем течение свое совершившии, и умерщвлением плоти и страстей Христу сраспявшиися, молим вас, присноблаженнии: испросите нам у Христа Бога нашего оставление грехов, исправление жития и вся благая, к временной и вечной жизни потребная. О, пречестный и преславный соборе святых Божиих, безплотнии Ангели и во плоти пожившии и Богу угодившии, предстателие наши и молитвенницы, боголюбезно воззрите на ны и на земную юдоль нашу, помяните нас странствующих и пришельствующих и дарованною вам от Бога благодатию и силою руководите нас к Небесному Отечеству, укрепите нашу немощь, оградите нас от искушений и соблазнов, сохраните от грехопадений, возбудите в нас святую любовь ко Господу и ревность о спасении нашем, насадите в сердцах наших страх Божественный, направите стопы наша к деланию заповедей Христовых и к исполнению воли Божией благой и совершенней. Сотворите, святии Божии, еже жити и нам целомудренно и праведно и благочестно в нынешнем веце; присно же памятовати час смертный и страшное второе пришествие Господа Бога и Спаса нашего Иисуса Христа, да благодатию и человеколюбием Его соблюдаеми и спасаеми и мы грешнии и недостойнии сподобимся в Небесном Царствии купно с вами покланятися престолу Божию, и благодарно и всерадостно славословити Пресвятую, Животворящую и Нераздельную Троицу, Отца и Сына, и Святаго Духа во веки веков. Аминь.

Боже Вышний, Боже Превечный, Боже Безсмертный, Егоже велико и крепко царство, власть безконечна, милость в роды и роды, Еяже не оставляеши от людей Твоих, Авраама ради возлюбленнаго от Тебе, и Исаака раба Твоего, и Иоиля святаго Твоего, и всех избранных от создания мира угодников Твоих праведных! Сих всех на умоление Тебе Премилостиваго Владыки аз, земля сый и пепел, призываю, да их ради возмогу получити милость Твою, во спасение окаянныя души моея. Аще бо много может молитва единаго праведнаго поспешествуема, кольми паче много может молитва тьмы тем праведных всех святых Твоих, престол величествия Твоего окружающих: очи бо Твои, Господи, на праведныя, и уши Твои в молитву их. Имже вопию сице:

О святии достохвальнии патриарси, верою угодившии Богу и всем верным отцы сущии! Воистину блажени вы и преблажени есте, седите бо на трапезе блаженнаго обеда во Царствии Божии. Аз же, веруяй в Бога, молю вы, яко отцы: порадите и мне, аки чаду вашему, поне от крупиц падающих от трапезы вашея.

Святии великоименитии пророцы! Вси вы пророчествовасте, от части разумевше, и видесте Христа Господа яко в зерцале и гадании, ныне же разумеете Его совершенне и видите лицем к лицу. Молитеся, да и аз грешный, зде от части Его разумевая, сподоблюся тамо с вами видети Его якоже есть.

Святии апостоли Христовы! Вы есте сосуди, в честь освящени и благопотребни Владыце, на всякое дело благое уготовани, изобильно же исполнени благодати Божия. Молю, да от исполнения вашего и аз недостойный прияти сподоблюся.

Святии прехвальнии мученицы Господни! Вси вы блажени есте, претерпевше искушение, зане, искушени бывше, приясте венец жизни. Помозите и мне грешному, яко да пребуду в терпении совершен и всецел и ни в чемже лишен, и да искушение веры моея в различных напастех обрящется в похвалу и честь и славу во откровении Иисус Христове.

Святии иерарси, пастырие, священнослужителие и наставницы! Вси вы свет миру есте и светильницы, поставлени на свещнице во храме вышнем нерукотвореннем. Вы осветите мя, да исправлю стопы моя к деланию заповедей Господних, и да не будет путь мой тьма и ползок, но да наставлен буду на путь правый, внити ми во град обительный.

Святии преподобнии отцы, совершившии труды ваша благия ради Христа Господа, иже бе во трудех от юности своея! Вси вы совершенную мзду трудов ваших восприясте, да вашим многотрудным угождением и аз окаянный, аще и во единонадесятый час пришедый, прияти сподоблюся пенязь от Преблагаго Человеколюбца Бога.

Святии девственницы, обрученнии единому Жениху Христу! Вси вы внидосте в чертог небесный с мудрыми девами. Помолитеся и о мне недостойнем, яко да и аз тогожде чертога небеснаго не лишен буду.

Святии пустинницы, постницы, исповедницы, чудотворцы и вси всякаго чина праведницы, ихже нарещи и исчести за велие множество яко звезд небесных невозможно есть, кроме Самаго Бога, множество звезд исчитающаго, Имже и имена ваша написана суть в книгу животную от сложения мира! Аз немощный помощь вашу, еяже от вас мнози бывают причастни, исповедати и призывати смиренно дерзаю: молите Спаса нашего, да подаст и мне, паче всех человек на земли грешну сущу, вышних искати, идеже есть Христос одесную Бога Отца седя.