Таисия Олейникова - Помощь небесных покровителей. Полный сборник молитв на каждый день года (молитвы общие)

Пресвятая Богородице, спаси нас!

О Пресвятая Госпоже, Владычице моя Богородице, Небесная Царице! Спаси и помилуй мя, грешнаго раба Твоего, от напрасныя клеветы, от всякия беды и напасти и внезапныя смерти. Помилуй мя в дневных часех и утренних и вечерних, и во всякое время сохрани мя: стоящя, седящя соблюди, и на всяком пути ходящя, и в нощных часех спящя снабди, покрый и заступи. Защити мя, Владычице Богородице, от всех враг моих видимых и невидимых и от всякаго злаго обстояния. На всяком месте и на всякое время буди ми, Мати Преблагая, стена необоримая и заступление крепкое.

О Пресвятая Госпоже, Владычице Дево Богородице! Приими недостойную молитву мою, и сохрани мя от внезапныя смерти, и даруй ми прежде конца покаяние.

Пресвятая Богородице, спаси нас!

Ты мне Хранительница жизни всея явися, Пречистая, Ты мене избави от бесов в час смерти, Ты и по смерти мене упокой.

Под Твою милость прибегаем, Богородице Дево, молений наших не презри в скорбех, но от бед избави нас, Едина Чистая и Благословенная.

Пресвятая Богородице, спаси нас!

Что Ти принесем, или что Ти воздадим, о Премилостивая Госпоже Владычице, Заступнице рода христианскаго, за вся Твоя неисчетная благодеяния, яже присно являеши всем призывающим имя Твое и Твоея помощи просящим? Кто бо притекаяй к Тебе посрамлен и неуслышан от Тебе отходит, о Премилосердая Мати? Вемы, Пречистая, яко за множество грехов и беззаконий наших, несмы достойни ниже имя Твое пресладкое нарещи, неточию песнопения от оскверненных устен Тебе приносити, и удобее есть нам молчание любити. Но да не явимся непамятливи и неблагодарни пред Тобою, дерзаем приносити Тебе сие коленопреклоненное славословие; Ты же, Премилосердая Мати, не возгнушайся прияти е, яко от избытка любящих Тя сердец возносимое. Сама Ты, Владычице, благодатию Твоею коснися сердец наших, да яко воск растаявша пролиются пред Тобою в слезных благодарениих и славословиих. Благодарим Тя, Всепетая, не таим благодеяний Твоих, но велегласно возвещаем, да вси слышащии притекают к Тебе, единей непостыдней Заступнице рода христианскаго, и да немолчно славословят Тя, Всепетую, во веки веков. Аминь.

Царице моя Преблагая, Надеждо моя Пресвятая, прибежище сирым и странным заступнице, бедствующих помоще и озлобляемых покрове! Зриши мою напасть, зриши мою скорбь, отвсюду искушением одержимь есмь, и заступающаго несть у мене. Ты убо Сама помози ми яко немощну, направи мя яко странна, настави яко заблуждша, уврачуй и спаси яко безнадежна. Не имам бо иныя помощи, ни инаго предстательства, ни утешения, токмо Тебе, о Мати всех скорбящих и обремененных! Призри убо на мя грешнаго и во озлоблении сущаго, и покрый мя пресвятым омофором Твоим, да избавлен буду от зол, мя обышедших, и восхвалю всегда препетое имя Твое. Аминь.

О Пресвятая Богородице, вышшая Херувим и честнейшая Серафим, рождшая Христа Бога нашего, агнельское великое удивление, пророчествия исполнение, Богоизбранная Отроковице, Царице Небесе и земли, всех скорбящих радосте, обидимых заступнице, алчущих питательнице, обуреваемых пристанище, больных посещение, немощных покрове и заступление, сирых покровительнице, плавающих тишино, путешествующих поспешение, труждающихся покоище, нагих одеяние, нищих богатство неистощимое, матерей тихое веселие, младенцев крепосте, всем безпомощным готовое во всем поможение, христианскаго рода нашего неложная Покровительнице! О Всемилостивая Дево Владычице Богородице! Тебе единей от Всевышняго дадеся во всем заступати нас и спасати, Ты еси верное и скорое врачевство греховных наших страстей и Молитвенница первая ко Христу Богу нашему о прощении грехов наших. О Всепетая Мати, Дево Богородице! Услыши глас молящихся раб Твоих, и чудотворней иконе Твоей предстоящих, и к ней, якоже к Тебе Самой с нами пребывающей, очи наши возводящих, и любовию от души припадающих, и сице Тебе псаломски вопиющих: слыши, Дщи, и виждь, и приклони ухо Твое, и услыши моление наше, якоже множества верных во вся времена Тобою услышани быша. Всяк бо по своей скорби просит у Тебе помощи, избавления и заступления, и Ты прошения их исполняеши, и радостию души их услаждаеши. О Милостивая Премилостивая Госпоже Царице Богородице! Ты, якоже восхощеши, вся испросити от Сына Твоего Христа Бога нашего можеши. Не отрини убо нас от Твоего заступления, подаждь свобождение от бед и скорбей наших, и избави нас, Всенепорочная, от видимых и невидимых враг и от злых человек клевещущих на ны, и не попусти глада, труса, потопа, огня и меча на грады и веси наша, буди нам помощь неотступная, и моли Сына Твоего и Бога нашего, яко да в страшный день суда одесную поставит ны, ради Твоего предстательства. Тому слава и держава, со Безначальным Его Отцем и Святым Духом, ныне и присно и во веки веков. Аминь.

Богородице Царице, Госпоже Дево Марие, Мати Бога нашего! Сын Твой и Бог всех не презре грешных прибегающих к Нему, но вся спасе и в разум истинный приведе. Аз же окаянный крещения оскверних обеты, заповедей Сына Твоего и Бога моего не сохранив. К Тебе убо, Госпоже, прибегаю, научи мя творити волю Его, да спасет мя и введет в разум истинный, и подаст благодать Пресвятаго Духа, да не обят буду сетьми вражиими. Иныя бо помощи не обретох от юности моея разве Тебе, Госпоже моя Богородице. Аще и многажды прогневах Тя, не благодарен о Твоей милости быв окаянный, но Ты не возгнушалася еси мене. Во глубину безумия впадох, ум погубих, но к Тебе непрестанно вопию: помилуй, Владычице, и воздвигни мя из пропасти греховныя, подаждь ми руку помощи долу лежащему, укрепи немощнаго, очисти сквернаго, спаси погибающаго; да вси грешнии, видевше милосердие Твое на мне недостойнем, прибегнут под кров Твой и прославят Сына Твоего, со Отцем и Святым Духом, ныне и присно и во веки веков. Аминь.

О Пресвятая Владычице наша Богородице, Небесная Царице, наша Преблагая Надеждо, преизящная Отроковице, ненадеющимся надеяние, грешным спасение, сирым прибежище, странным предстательнице, нагим одеяние, скорбящим утешение и радосте, обидимым покровительнице и всем сущим в бедах и напастех вспоможение и заступление! О Всемилостивая Госпоже Дево Богородице! Зриши наша беды, скорби и напасти, помози нам немощным, печальным и унылым, скорбным же и отчаянным, и всяку печаль отими от нас. Обиду нашу Ты веси, разреши ту, Всенепорочная, якоже волиши и можеши, не даждь нам во отчаяние впасти. Не имамы бо иныя помощи, разве Сына Твоего, Христа Бога нашего, и Тебе, о Мати Божия, о Владычице наша! Темже на Твой пречестный образ со воздыханием и сокрушением сердца взираем, и колена до земли преклоняем, взывающе: призри благосердым оком, Всепетая Богородице, и услыши нас, Преблагая, не отрини, но благоволи помиловати, не омерзи нашего воздыхания. Никтоже бо притекаяй к Тебе посрамлен от Тебе исходит, но просит благодати и приемлет дар на пользу прошения во веки веков. Аминь.