Таисия Олейникова - Помощь небесных покровителей. Полный сборник молитв на каждый день года (молитвы общие)

Господи Боже наш, приими молитву нашу о церкви Твоей святей приносимую, о всех людех Твоих, ихже искупил еси честною Твоею кровию. Приими молитву сию о благоверных царех и царицах, князех и княгинях, епископех и священницех, монасех и бельцех, воинех и младенцех, за веру и царство православныя подвизавшихся, наипаче же от жидов и инех клеврет сатанинских умученных, и молитвами их сокруши и разори жертву беззаконную, на земли российстей бесовом приносимую, и даруй нам на последняя времена царя православнаго и самодержавное царство русское в щит и ограждение и сохранение и спасение Церкви Твоей святей. Помяни ны и вся люди Твоя, отцы и братию нашу, о возстановлении царства православнаго подвизающихся, и укрепи силою Духа Твоего Святаго во брани до конца претерпети и устояти, и венцев небесных сподобитися. Твое бо есть еже миловати и спасати ны, Боже наш, и Тебе славу возсылаем, Отцу и Сыну и Святому Духу, ныне и присно, и во веки веков. Аминь.

Пречистому Твоему образу покланяемся, Благий, просяще прощения прегрешений наших, Христе Боже: волею бо благоволил еси плотию взыти на Крест, да избавиши, яже создал еси, от работы вражия. Тем благодарственно вопием Ти: радости исполнил еси вся, Спасе наш, пришедый спасти мир.

С вышних призирая, убогия приемля, посети ны, озлобленныя грехи, Владыко Всемилостиве, молитвами Богородицы даруй душам нашим велию милость.

Возбранный Воеводо и Господи, ада победителю, яко избавлься от вечныя смерти, похвальная восписую Ти, создание и раб Твой, но яко имеяй милосердие неизреченное, от всяких мя бед свободи, зовуща: Иисусе Сыне Божий, помилуй мя.

Неизреченнаго и Божественнаго Твоего к человеком смотрения, неописанное Слово Отчее, и образ, неписанный и Богописанный победителен ведуще неложнаго Твоего воплощения, почитаем того лобызающе.

Избави от бед рабы Твоя, Многомилостиве Господи, яко мы усердно к Тебе прибегаем, к милостивому Избавителю всех Владыце Господу Иисусу.

Господи щедре и милостиве, долготерпеливе и многомилостиве, внуши молитву нашу и вонми гласу моления нашего, сотвори с нами знамение во благо, настави нас на путь Твой, еже ходити во истине Твоей, возвесели сердца наша, во еже боятися имени Твоего святаго. Зане велий еси Ты и творяй чудеса, Ты еси Бог Един, и несть подобен Тебе в бозех, Господи, силен в милости и благ в крепости, во еже помогати и утешати и спасати вся уповающия на имя святое Твое. Яко Бог милости и щедрот и человеколюбия еси, и Тебе славу возсылаем со Безначальным Твоим Отцем, и с Пресвятым и Благим и Животворящим Твоим Духом, ныне и присно и во веки веков. Аминь.

К Богородице прилежно ныне притецем, грешнии и смиреннии, и припадем, в покаянии зовуще из глубины души: Владычице, помози, на ны милосердовавши, потщися, погибаем от множества прегрешений, не отврати Твоя рабы тщи, Тя бо и едину надежду имамы.

Не умолчим никогда, Богородице, силы Твоя глаголати недостойнии: аще бо Ты не бы предстояла молящи, кто бы нас избавил от толиких бед? Кто же бы сохранил до ныне свободны? Не отступим, Владычице, от Тебе: Твоя бо рабы спасаеши присно от всяких лютых.

Моление теплое и стена необоримая, милости источниче, мирови прибежище, прилежно вопием Ти: Богородице Владычице, предвари, и от бед избави нас, едина вскоре предстательствующая.

Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти: ускори на молитву, и потщися на умоление, предстательствующи присно, Богородице, чтущих Тя.

Не имамы иныя помощи, не имамы иныя надежды, разве Тебе, Владычице: Ты нам помози, на Тебе надеемся, и Тобою хвалимся: Твои бо есмы раби, да не постыдимся.

Взбранной Воеводе победительная, яко избавльшеся от злых, благодарственная восписуем Ти раби Твои, Богородице, но яко имущая державу непобедимую, от всяких нас бед свободи, да зовем Ти: радуйся, Невесто Неневестная.

Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству. Призри благосердием, Всепетая Богородице, на мое лютое телесе озлобление, и исцели души моея болезнь.

Достойно есть величати Тя, Богородице, честнейшую херувим и славнейшую без сравнения серафим.

Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Царице моя преблагая, надеждо моя пресвятая, прибежище сирым и странным заступнице, бедствующих помоще и озлобляемых покрове, зриши мою напасть, зриши мою скорбь: отвсюду искушением одержим есмь, а заступающаго несть у мене. Ты убо Сама помози ми яко немощну, направи мя яко странна, настави яко заблуждша, уврачуй и спаси яко безнадежна. Не имам бо иныя помощи, ни инаго предстательства, ни утешения, токмо Тебе, о Мати всех скорбящих и обремененных! Призри убо на мя грешнаго и во озлоблении сущаго, и покрый мя пресвятым омофором Твоим, да избавлен буду от зол, мя обышедших, и восхвалю всегда препетое имя Твое. Аминь.

Небесных воинств архистратизи, молим вас присно мы недостойнии, да вашими молитвами оградите нас кровом крил невещественныя вашея славы, сохраняюще ны припадающия прилежно, и вопиющия: от бед избавите ны, яко чиноначальницы вышних сил.

Архистратизи Божии, служителие Божественныя славы, ангелов начальницы и человеков наставницы, полезное нам просите и велию милость, яко бесплотных архистратизи.

Величаем вас, архангели и ангели и вся воинства, херувими и серафими, славящия Господа.

Величаем вас, архангели, ангели, начала, власти, престоли, господствия, силы, херувими и страшныя серафими, прославляющия Господа.