Таисия Олейникова - Помощь небесных покровителей. Полный сборник молитв на каждый день года (молитвы общие)

Величаем тя, святителю отче ( имярек ), и чтим святую память твою, ты бо молиши за нас Христа Бога нашего.

О всехвальный святителю Христов и чудотворче ( имярек )! Приими сие малое моление от нас грешных, к тебе прибегающих, и теплым твоим предстательством умоли Господа и Бога нашего Иисуса Христа, яко да, призрев на ны милостивно, дарует нам согрешений наших вольных и невольных прощение, и по велицей Своей милости избавит нас от бед, печалей, скорби и болезней душевных и телесных, обдержащих нас; да подаст земли плодоносие, и вся, яже на пользу настоящаго жития нашего потребная, да дарует нам скончати житие сие привременное в покаянии, и да сподобит нас грешных и недостойных Небеснаго Царствия Своего, со всеми святыми славити Его безконечное милосердие, со Безначальным Его Отцем и Святым и Животворящим Его Духом во веки веков. Аминь.

О пречестная и священная главо и благодати Святаго Духа исполненная, Спасово со Отцем обиталище, великий архиерее, теплый наш заступниче, святителю ( имярек ), предстоя у престола всех Царя и наслаждаяся света Единосущныя Троицы и херувимски со ангелы возглашая песнь трисвятую, великое же и неизследованное дерзновение имея ко Всемилостивому Владыце, моли спастися паствы Христовы людем, благостояние святых церквей утверди; архиереи благолепием святительства украси; монашествующыя к подвигом добраго течения укрепи; царствующий град и вся грады страны добре сохрани и веру святую непорочну соблюсти умоли; мир весь предстательством твоим умири, от глада и пагубы избави ны, и от нападения иноплеменных сохрани, старыя утеши, юныя настави, безумныя умудри, вдовицы помилуй, сироты заступи, младенцы возрасти, плененныя возврати, немощствующия исцели, и везде тепле призывающия тя и с верою припадающия и молящияся тебе от всяких напастей и бед ходатайством твоим свободи; моли о нас Всещедраго и Человеколюбиваго Христа Бога нашего, да и в день страшнаго пришествия Его от шуияго стояния избавит нас, и радости святых причастники сотворит со всеми святыми во веки веков. Аминь.

Боже отец наших, творяй присно с нами по Твоей кротости, не отстави милость Твою от нас, но молитвами их в мире управи живот наш.

Яко добродетелей учителие и иерархов украшение, Церковь поющи вас славит. Молитвами вашими подайте чтущим вас любовию, добродетелей исправление и соблазнов избавление, яко непобедимии.

Величаем вас, святителие велиции ( имена ), и чтим святую память вашу, вы бо молите за нас Христа Бога нашего.

О священные главы, преподобнии и преблаженнии, аввы велии ( имена )! Не забудите убогих своих до конца, но поминайте нас всегда во святых своих и благоприятных молитвах к Богу. Помяните стадо свое, еже сами упасли есте, и не забудите посещати чад своих. Молите за ны, отцы священнии, за дети своя духовныя, яко имущи дерзновение к Небесному Царю; не премолчите вопити за ны ко Господу, и не презрите нас, верою и любовию чтущих вы. Поминайте нас недостойных у престола Вседержителева, и не престайте молящеся о нас ко Христу Богу, ибо дана вам благодать за ны молитися. Не мним бо вас аки мертвых, аще бо телесы и преставистеся от нас, но и по смерти живи суще пребываете. Не отступайте убо от нас духом, сохраняюще нас от стрел вражиих и от всякия прелести бесовския и козней диавольских, пастырие наши добрии. Аще бо и мощей ваших рака пред очима нашима видима суть всегда, но святыя ваша души со ангельскими воинствы, со безплотными лики, с небесными силами, у престола Вседержителева предстояща, достойно веселятся. Ведуще убо вас воистинну и по смерти живых сущих, к вам припадаем и вам молимся: молитеся о нас Всесильному Богу о пользе душ наших, и испросите нам время на покаяние, да невозбранно прейдем от земли на небо, от мытарств же горьких, бесов воздушных князей и от вечныя муки да избавимся, и Небеснаго Царствия наследницы да будем со всеми праведными, от века угодившими Господу нашему Иисусу Христу, Емуже подобает всякая слава, честь и поклонение, со Безначальным Его Отцем, и с Пресвятым и Благим и Животворящим Его Духом, ныне и присно и во веки веков. Аминь.

В тебе, отче, известно спасеся еже по образу: приим бо крест, последовал еси Христу, и дея учил еси презирати убо плоть, преходит бо, прилежати же о души, вещи безсмертней. Темже и со ангелы срадуется, преподобне ( имярек ), дух твой.

Пустынный житель, и во плоти ангел, и чудотворец явился еси, богоносне отче наш ( имярек ), постом, бдением, молитвою небесныя дарования приим, исцеляеши не дужныя и души верою приходящих ти. Слава Давшему тебе крепость, слава Венчавшему тя, слава Действующему тобою всем исцеления.

Слез твоих теченьми пустыни безплодное возделал еси, и иже из глубины воздыханьми во сто трудов уплодоносил еси, и был еси светильник вселенней, сияя чудесы ( имярек ), отче наш, моли Христа Бога спастися душам нашим.

Чистотою душевною божественно вооружився, и непрестанныя молитвы, яко копие, вручив крепко, пробол еси бесовская ополчения ( имярек ), отче наш, моли непрестанно о всех нас.

Ублажаем тя, преподобне отче ( имярек ), и чтим святую память твою, наставниче монахов и собеседниче ангелов.

Преподобне отче ( имярек )! Воззри на нас милостивно и к земли приверженных возведи к высоте небесней. Ты горе на небеси, мы на земли низу, удалены от тебе, не толико местом, елико грехми своими и беззаконии, но к тебе прибегаем и взываем: настави нас ходити путем твоим, вразуми и руководствуй. Вся твоя святая жизнь бысть зерцалом всякия добродетели. Не престани, угодниче Божий, о нас вопия ко Господу. Испроси предстательством своим у Всемилостиваго Бога нашего мир Церкви Его, под знамением креста воинствующей, согласие в вере и единомудрие, суемудрия же и расколов истребление, утверждение во благих делех, больным исцеление, печальным утешение, обиженным заступление, бедствующим помощь. Не посрами нас, к тебе с верою притекающих. Вси православнии христиане, твоими чудесы исполненныя и милостями облагодетельствованныя, исповедуют тя быти своего покровителя и заступника. Яви древния милости твоя, и ихже отцем всепомоществовал еси, не отрини и нас, чад их, стопами их к тебе шествующих. Предстояще всечестней иконе твоей, яко тебе живу сущу, припадаем и молимся: приими моления наша и вознеси их на жертвенник благоутробия Божия, да приимем тобою благодать и благовременную в нуждех наших помощь. Укрепи наше малодушие и утверди нас в вере, да несомненно уповаем получити вся благая от благосердия Владыки молитвами твоими. О, превеликий угодниче Божий! Всем нам, с верою притекающим к тебе, помози предстательством твоим ко Господу, и всех нас управи в мире и покаянии скончати живот наш и преселитися со упованием в блаженныя недра Авраамова, идеже ты радостно во трудех и подвизех ныне почиваеши, прославляя со всеми святыми Бога, в Троице славимаго, Отца и Сына и Святаго Духа, ныне и присно и во веки веков. Аминь.