авва Дорофей Array - Аскетика. Том I

Вопрос 700.Случается, мне беседующу с некиим, внезапу парити умом, якоже мнети и вне себе быти, и предлежащаго забывати слова, не преносящуся уму во ино нечто, но изступающу из себе самаго. Что убо есть сие, отче? И что мне подобает творити? Зело бо скорблю.

Ответ.Сие брань есть диавольска хотящи посрамити человека того пред сущими. Аще же со свободою явиши им вещь ону, глаголя: простите мне, парити сотвори мя диавол; посрамится и престанет брань сия; и прочее с трезвением беседуй. Непщуется же ничтоже быти сие. Не разумевающему же мног стыд творить. Память же имене Божия вся совершенно злая упразднит и укрепит немощь нашу. Аминь.

Вопрос 701.Муж некий, христолюбец, воздержлив сый зело, и о своей пекийся душе, посла, вопрошая тогожде старца: что есть полезно творити кому, то ли, еже тому мнится благо, или с вопросом отцев?

Ответ.Аще кто от себе помышляет некое добро творити, а не с вопросом отцев, сей несть законен, и законно ничтоже сотвори. Аще ли же кто с вопросом творит, сей исполняет закон и пророки. Смирения бо знамение есть, еже вопрошати: и Христа, Смирившаго Себе и до раба, подражатель таковый. Муж бо безсоветен, сам себе враг. Глаголет бо: «с советом вся твори» (Сир. 32, 21). И Иоанн Колов глаголет: «Аще видиши юна, своею волею восходяща на небо, удержи его за ногу, и верзи долу». Полезнее есть смиренно вопрошати, нежели своим хотением шествовати. Бог бо есть, влагаяй во уста вопрошаемаго, что да речет, за смирение сердца и правоту вопрошающаго.

Вопрос 702.Аще сежу со отцы, и стязаются о вере с некиим от неправомудрствующих: должен ли есмь и аз стязатися, или ни? Глаголет бо ми помысл: яко аще молчиши, предаеши веру. Аще ли же и тонкая беседа будет в них о догматех, возглаголю ли яже вем, или премолчу? Аще ли же и вопрошен буду, что сотворю?

Ответ.Никогда же да стязаешися о вере: не ищет бо от тебе Бог сего; но точию веровати право, и приял еси от Церкве Святыя на крещении и еже творити заповеди Его. Сия убо сохрани, и спасешися. Беседовати же о догматех не подобает: превосходят бо тебе сия. Но молися Богови о своих согрешениих, и в сих ум твой да упражняется. Блюди же, да не осудиши в сердце твоем беседующих сия: не веси бо аще право они беседуют, или ни, — и яко Бог судит дело то. Аще же вопрошен будеши, рцы, яко сия превосходят мя, и, простите мя отцы святии.

Вопрос 703.Аще же, стязаяся еретик свяжет словом своим православнаго: еда несть добро помощи мне ему, елико могу, да не побежден быв, вредится в православной вере?

Ответ.Аще влагаеши себе побеседовати, то и пред Богом беседуеши, и пред человеки, и обретается, аки учительство. Аще же кто учит, не имый силы, вероятно слово его не бывает, но безплодно. Егда же ничтоже пользуеши, то кая потреба и беседовати? Аще ли же всяко помощи хощеши, возглаголи в сердце твоем Богу, тайная Ведущему и Могущему сотворити паче, яже просим у Него, и Той, по воле Своей, сотворит со стязающимися. А ты смирение обрящеши в деле сем. Якоже бо аще ввержет кто в темницу кого не праведно по власти. Другий же, зря бываемое и не могущ противорещи, или снабдети человека того, отшед тайно, речет некоему сильнейшему, и той, послав своею властию, возмет его, ввергшему смущающуся, не знающу же, кто есть возвестивый. Тако и зде, да приступим ко Богу о вере, и о братиях наших, в молении сердца, и Той, иже клятся Собою, яко всем человеком хощет спастися и приити в познание жизни, сотворит и с ними по воли Своей.

Вопрос 704.Еда должен есмь искати поне разсуждаемая, да известно та увем и не стязаюся?

Ответ.Ничтоже ищи от тех, ихже Бог не взыскует от тебе, ниже да внесеши прибедственна словеса: но буди доволен, якоже рех, исповеданием правыя веры, и ничтоже сего множае любопытствуй.

Вопрос 705.Аще убо от Писаний будет беседа, премолчу ли, или возглаголю? Аще ли же и случится им сумневатися о нечесом, еже аз вем, еда добре есть, да реку, или ни?

Ответ.Молчание лучшо есть. Аще же сумнятся, и веси тое, за еже решену быти сумнению, рцы со смирением, еже вси. Аще же не веси, ничтоже да речеши, аки от своего помысла: безумие бо есть.

Вопрос 706.Аще о вещах будет беседа, не имущих вреда душевнаго, премолчу ли, или возглаголю?

Ответ.Прежде вопрошения несть добро возглаголати. Аще ли же и вопрошен будеши, рцы, еже веси, со смирением и страхом Божиим. Ниже возвышался, аще приято будет слово твое, — ниже скорбя, аще не приято будет: сей бо есть путь Божий. И да не вменишися быти молчалив, рцы от себе и нечто в разуме, и сократи, и избавишися многословия и суетнаго мнения.

Вопрос 707.Аще кто речет ми прокляти Нестория и подобныя ему еретики: проклену ли, или ни?

Ответ.Яко убо Несторий и иже по нем, еретицы под анафемою суть, яве есть: ты же не приходи на проклинание кого отнюд. Имеяй бо себе грешна, плакати должен есть грехов своих, и ничтоже ино. Но ниже судити подобает проклинающия кого. Кийждо же себе да искушает.

Вопрос 708.Аще же кто от сего непщует, яко и аз онаго мудрствую: что реку ему?

Ответ.Рцы ему: аще и яве есть, яко они достойни суть проклинания, но аз грешнейший есмь паче всякаго человека: и боюся, да не како, инаго осуждая, себе осуждаю. Ибо и самаго сатану аще прокляну, понеже творю дело его, то себе проклинаю. Господь бо рече: «аще любите Мя, заповеди Моя соблюдите» (Ин. 14, 15). И апостол глаголет: «аще кто не любит Господа, проклят да будет» (1 Кор. 16, 22). Убо, не творяй заповеди Его, не любит Его: и не любяй Его, под клятвою есть. И како таковый иных может проклинати? Сия рцы ему: и аще пребудет в техжде, совести его ради, прокляни (яко) еретика.

Вопрос 709.Аще ли же не вем, яко есть еретик, егоже глаголет ми проклясти: что сотворю?

Ответ.Рцы ему: брате, аз, како мудрствует, о немже глаголеши ми, не вем: проклята убо, егоже не вем, мнится мне во осуждение. Сие же глаголю тебе: яко кроме веры оныя святых трех сот осминадесяти отцев иныя не вем. И иже вне сея мудрствует, вверже сам себе во анафему.

Вопрос 710.Аще будет гонение, что сотворю? Пребуду ли или отыду?

Ответ.Вопроси духовных отцев, и, якоже глаголют та, сотвори. И да не последуеши своему разсуждению, да не в неразумии беду приимеши.

Вопрос 711.И аще не обретаю отцев в час нужды, к нимже имам извещение, да вопрошу их о сем, что сотворю? Пребуду ли, да не явлюся предал веру, или отыду, бояся побеждения?

Ответ.Стани на молитве, и помолися человеколюбцу Богу всем сердцем, глаголя: Владыко, помилуй мя благости ради Твоея, и да не попустиши мя заблудити от воли Твоея, ниже, да предаси мя предлежащему искушению в погибель. И сие сотвори до трех крат, якоже и Спас в час предания. И по сих аще видиши себе имуща усердие несумненно пребыти, и вся претерпети Божиею благодатию находящая лютая, даже и до самыя смерти, тогда пребуди. Аще ли же видиши боязнь в сердце твоем, отыди. И да не вознепщуеши в сем предавати веру: не истязует бо Бог, яже суть выше силы. Аще бо имея страх пребудеши: случается, не могущу стерпети наводимых скорбей и мук, предателю истины быти, и себе восприяти вечную муку.