Виктория Карпухина - Православные старцы. Просите, и дано будет!

Радуйся, от младенческих лет Христа возлюбившая;

Радуйся, Богом Данная нареченная;

Радуйся, на подвиг терпения страданий призванная;

Радуйся, с верой и трудолюбием понесшая крест твой;

Радуйся, с младенческих лет чудесами Христовыми укрепляемая;

Радуйся, молитвеннице и страдалице наша пред Богом;

Радуйся, блаженная старице, мати Макарие, молящаяся Христу Богу о спасении душ наших.

Видя Господь смирение благаго твоего сердца в подвиге смирения и терпения страданий, из младенческих лет дарова тебе Небеснаго покровителя. Молитвами твоими наши сердца верою и любовию к Богу воспламени, творяще Ему ангельскую песнь: Аллилуия.

Разумом свыше просвещаемая, блаженная мати Макарие, с младенчества сподобилася еси явления преподобнаго Тихона Калужского, избранного Господом твоим Небесным покровителем, укрепляющим тя своими святыми молитвами. Мы же с любовию взываем ти сице:

Радуйся, благодатию Божиею измлада наделенная;

Радуйся, богодухновенным словам Святого Евангелия внимавшая;

Радуйся, явления святого преподобнаго Тихона Калужского сподобившаяся;

Радуйся, молитвенному подвигу им научаемая;

Радуйся, из детства всеми обижаемая;

Радуйся, Царицею Небесною укрепляемая;

Радуйся, блаженная старице, мати Макарие, молящаяся Христу Богу о спасении душ наших.

Силою божественною укрепляемая, духом Его Святым питаемая, яко древле Царица Небесная удостоилася пребывания в олтаре у Престола Божия, тако и ты, блаженная старице, еще в раннем отрочестве лишенная возможности ходити, терпя за сие обиду и поругание, была допущена Господом на пребывание в олтаре храма. Мы же, чудящеся таковому Божественному произволению, поем Ему: Аллилуия.

Имуще от Бога дар прозорливости и молитвенности, даром сим Божественным страдания других утоляющая, терпела за сие обиды и поругания, от Бога же любовь и укрепление. Мы же, вернии, таковому к тебе Божию произволению дивящеся, с любовию глаголем:

Радуйся, пророческим даром от Бога наделенная;

Радуйся, в олтаре храма у Престола быть удостоенная;

Радуйся, Духом Его Святым питаемая;

Радуйся, Словом Его поучаемая;

Радуйся, невестою Христовою нареченная;

Радуйся, на служение людям сотворенная;

Радуйся, блаженная старице, мати Макарие, молящаяся Христу Богу о спасении душ наших.

Буря радости и недоумения обыде мя: како возмогу пети житие блаженныя праведницы, Материю Божиею измлада матушкой называемой, Небесной Стражей охраняемой, духом же Святым Престола Божиего сподобляемой, святым Симеоном Богоприимцем от язв исцеляемой. Дивящиеся таковому Божию к тебе произволению, поем Ему: Аллилуия.

Слышавше от Господа о твоих, мати Макарие, особых небесных дарованиях, и о твоем избранничестве, отец Иоанн, осеняемый произволением Божиим, внесе тя во олтарь, на удивление в храме находящихся. Мы же терпению и смирению твоему покланяемся. Сего ради, приими от нас, недостойных, похвалы сия:

Радуйся, в церкви иереем Божиим встречаемая;

Радуйся, им во олтарь вносимая;

Радуйся, Материю Божиею молитвам обучаемая;

Радуйся, Богородицею матушкой измлада нереченная;

Радуйся, Небесной Стражей охраняемая;

Радуйся, угодником Божиим Симеоном Богоприимцем исцеляемая;

Радуйся, блаженная старице, мати Макарие, молящаяся Христу Богу о спасении душ наших.

Благодать Божия просия на тебе, блаженная мати Макарие, когда восьми лет сущи, ты уснула еси на четыренадесят дни, и в сем сне Божественнем сподобилася видения Ангела Хранителя и райских обителей. Мы же, радующеся таковому Божию о тебе произволению, благодарственно зовем Богу: Аллилуия.

Видевши обилие чудес, на тя от Господа и Царицы Небесныя истекающия, послужила еси Ему постом и молитвою, и к страждущим явила еси велию любовь и милосердие. Мы же, почитающе подвиги и страдания твоя во младости волю Христа ради подъятые, умиленно вопием ти:

Радуйся, лицезрения Райских обителей Богом удостоенная;

Радуйся, Ангелом Хранителем по тем светлым обителем пронесенная;

Радуйся, Чертог самого Христа узревшая;

Радуйся, видения Архангелов Божиих сподобившаяся;

Радуйся, Материю Божиею мученицей нареченная;

Радуйся, от Бога наслаждения миром невидимым одаренная;

Радуйся, блаженная старице, мати Макарие, молящаяся Христу Богу о спасени душ наших.

Верою одержими помышлений нечестивых, ближнии твои оставиша тебе, о блаженная мати Макарие, умирать едину. Жители же места того, уповая на Волю Божию, приведоша тебе малыя чада своя. Ты же, благодатиею Божией осеняемая, упасла еси всех, их же даде тебе Господь на сохранение. Таяжде сила Божия осени тя ко благочестию и научи тя славити Единого Бога, и воспевати Ему: Аллилуия.

Имея неоскудное милосердие ко всякому человеку, наипаче же к болящим и сирым, блаженная мати Макарие, отроковицею сущи, явилася еси додбрая матерь чадом Божиим, оставленным на твое попечение; помози и нам, блаженная, прейти сие земное поприще во благом делании, да величая поем ти:

Радуйся, блаженная мати Макарие, мученице Христова;

Радуйся, обращение людей в веру Православную совершавшая;

Радуйся, жестокосердными покинутая;

Радуйся, Царицею Небесною не оставленная;

Радуйся, всех чад Божиих тебе врученных сохранившая;

Радуйся, страданиями своими духовно возросшая;

Радуйся, блаженная старице, мати Макарие, молящаяся Христу Богу о спасении душ наших.

Богосветлою звездою явилася еси, блаженная мати Макарие, когда в Боготканную одежду послушницы Христовы со именем Тихона облеклася еси, духовно укрепльшеся, прилепилася еси всем сердцем твоим к единому Богу. Тем же и мы, вернии, поем Ему: Аллилуия.

Новое чудо показа Господь, когда облече тя, блаженная мати Макарие, во одежду невесты Христовы, и дарова ти благодать и силу болезни врачевати, духов злобы изгоняти, немощствующих укрепляти, подвизая к постническому и подвижническому подвигу Его ради. Тем же и нас, грешных, твоею молитвою исцели, да благодарственно воспоем ти:

Радуйся, праведница от Бога нам низпосланная;

Радуйся, в Боготканную одежду облеченная;

Радуйся, всем сердцем к Богу прилепившаяся;

Радуйся, от страстей земных благодатиею Божией освободившаяся;

Радуйся, Словесам Божиим Царицею Небесною поучаемая;

Радуйся, Материю Божиею охраняемая;

Радуйся, блаженная старице, мати Макарие, молящаяся Христу Богу о спасении душ наших.

Хотящая от мира сего отрещися, смиренномудрием и состраданием побуждаемая, возсияла еси яко новое светило в земли Российстей, когда прияла, о блаженная мати Макарие, великий Ангельский чин – схиму, неся скорбящим утешение; болящим исцеление; немощствующим от духов злобы избавление. Мы же, стремящиеся к тебе, яко источнику чудес с благодарностию возопием Богу: Аллилуия.