Сборник - Акафистник

Ангел множество, с Предтечею, Богословом, и многих святых чинным собранием, в церкви предсташа Царице своей, и умиленныя моления Ея о всем мире слышавше, удивлыиеся же милосердному Ея к нам заступлению, со страхом возопиша таковая:

Радуйся, Отца Безначальнаго благоволение: Радуйся, Сына превечнаго вместилище. Радуйся, Духа Святаго жилище: Радуйся, земле вожделенная. Радуйся, предрагое царское одеяние: Радуйся, скиптре Давидов. Радуйся, Еяже ради пришествия, Ангели радуются:

Радуйся, Юже на воздусе сретают херувими. Радуйся, Ейже похвалная приносят серафими: Радуйся, вышних чинов удивительное веселие. Радуйся, Еяже пришествием вси осеняемся: Радуйся, Еяже покрову благодарно покланяемся.

Радуйся, Радосте наша, покрый нас от всякаго зла, честным Твоим омофором.

Видевше Тя святый Андрей с Епифанием в церкви на воздусе за христианы Богу молящуюся, Царице Небесная, познаша яко Матерь еси вознесшагося на небо Христа Бога нашего: и припадше на землю радостно покланяхуся покрову Твоему, зовуще: Аллилуиа.

Разум недоразуменен еси, Богородице, в защищении людей православных, обаче: врази наши не познают, яко Ты еси нам благих ходатаица, не помышляют, яко сильна есть молитва Божия Матере: мы же о Твоем защищении добре ведуще, сице к Тебе с умилением, о Мати, зовем:

Радуйся, молитвы о нас Богу приносящая, нас же утешающая:

Радуйся, свобождающая очи наши от вечнаго рыдания.

Радуйся, матерними слезами Сына и Бога на милость вечнаго радования приклоняющая:

Радуйся, праведный гнев Божий Твоим молением скоро утоляющая.

Радуйся, слезами Твоими грехи наша омывающая:

Радуйся, страсти наша Твоим предстательством укрощающая.

Радуйся, Еяже слезы суть честнейшы паче всякаго приношения:

Радуйся, вином сладости Ангелов наполняющая.

Радуйся, Еяже ради ад стенет:

Радуйся, геенны вечныя избавление. Радуйся, непостыдное наше спасение: Радуйся, непрестаннаго веселия ходатаице. Радуйся, Радосте наша, покрый нас от всякаго зла, честным Твоим омофором.

Сила Вышняго осенит с верою и благоговением прибегающих к Твоему честному покрову: единей бо токмо Тебе Пресвятей, и Пречистей Богоматери, дар дадеся, да всякое Твое прошение исполнися, Едина бо Ты можеши елика хощеши. Тем же всяк возраст верных славословит Тя, и Сына Твоего, зовуще: Аллилуиа.

Имеющи богатство милосердия неоскудное, всем концем земли простиравши руку помощи: болящим бо исцеление, страждущим ослабу, слепым прозрение, и всем вся, по коегождо потребе подавши, благодарно вопиющим:

Радуйся, Едина Мати милосердия: Радуйся, милости сокровище многоценное.

Радуйся, бесчисленных щедрот подательнице:

Радуйся, слово премудрости дарующая.

Радуйся, твердая крепосте немощных:

Радуйся, совершенный разуме младенцев.

Радуйся, дарование исцелений требующим:

Радуйся, ветхаго и новаго завета печате.

Радуйся, девства сокровище, в церкви явленное:

Радуйся, деннице от Отца прежде Денницы возсиявшая.

Радуйся, праведных всегдашнее наслаждение:

Радуйся, падших известное возстание.

Радуйся, Радосте наша, покрый нас от всякаго зла, честным Твоим омофором.

Бурею многих бед одержимым нам, помогавши Богородице, стоиши бо пред лицем олтаря Господня, воздвигши руце Твои и молишися: яко да на нашу молитву призрит Господь, Царь славы, и послушает прошения призывающих имя Твое святое, к Сыну же Твоему зовущих: Аллилуиа.

Слыша Господь Бог Иисуса Навина молящася, и повелевающа солнцу стати, дондеже отмстит врагом, слышит и Твоя ныне Иисус Господь моления, избранная палато Духа Святаго: видяй Тя красну, яко луну, пред собою стоящу: темже и мы грешнии на Твоя надеющеся моления, Тебе яко Божией Матери глаголати дерзаем:

Радуйся, от солнца мысленнаго озаренная:

Радуйся, светом немерцающим просвещенная.

Радуйся, сиянием души землю просветившая:

Радуйся, чистотою тела Твоего небо возвеселившая.

Радуйся, всем сердцем Бога возлюбившая:

Радуйся, сердце любовию распаленное Сыну показующая.

Радуйся, сердце Твое о нас Христу в жертву принесшая:

Радуйся, все Твое помышление к Богу обратившая.

Радуйся, вся житейская ни во что же вменившая:

Радуйся, Едина Богу избранная.

Радуйся, всею крепостию Богу угождающая:

Радуйся, паче всех, Едина Богу возлюбленная.

Радуйся, Радосте наша, покрый нас от всякаго зла, честным Твоим омофором.

Боговидец Моисей в ополчении иногда на Амалика, егда руце воздвизаше Израиль одолеваше, егдаже низпущаше, тогда Амалик побеждаше: поддержащими же его укреплен, победи врага. Ты же Богомати воздевши руце Твои на умоление, всегда побеждавши враги христианския: одолевавши бо всем супостатом. И нам щит еси непобедим, вопиющим: Аллилуиа.

Видевше Тя ученицы Христовы, от земли на небо восходящу, жалостными слезами лица обливаху. Ныне же узревше Тя на воздусе в церкви Влахернстей, молебне руце простирающую, радостно со Ангелы, святители и пророки вси прославляют: мы же крепчайшима, паче Моисеевых рук, дланьма Твоима укрепляеми, умильно вопием:

Радуйся, Еяже руце поддержит едина любовь и милосердие:

Радуйся, руце на враги, аки непобедимое оружие, вознесшая.

Радуйся, крепость вражию победившая:

Радуйся, Едина в руце наше защищение приемшая.

Радуйся, руце Твои в поручение о нас Богу приносящая:

Радуйся, Еяже десница прославися в крепости.

Радуйся, всю крепость нашу Христа, рукама носящая:

Радуйся, Еяже руце на побеждение супостат уготоване.

Радуйся, рукама Твоима приношение наше исполняющая:

Радуйся, огнь божественный неопально держащая:

Радуйся, христиан к благодеянию тем воспламеняющая.

Радуйся, Радосте наша, покрый нас от всякаго зла честным Твоим омофором.

Проповедник скорый Твоея благодати, явися Роман сладкопевец, егда во сне от Тебе, в снедь прия свиток книжный: тем бо умудрен, нача разумно пети Тебе, святым же писати похвальная, и от сего разумев Тя истинную быти Матерь, премудрость Божию, взываше: Аллилуиа.

Возсияла еси от истиннаго Солнца Правды заря, Дево Отроковице, просвещающая всех, и всех в познание приводящая, Ты бо Пречистая Дево, премудростию Божиею вразумлявши верных угодников Твоих, зовущих:

Радуйся, премудрости Соломоновой высшая:

Радуйся, тайная и неудобь предвиденная знающая.

Радуйся, избытия словес и решения гаданий сказующая:

Радуйся, зерцало непорочное Божия деяния.

Радуйся, богатство всего мира безценное:

Радуйся, древняя и будущая прорицающая.