Сборник - Акафистник

Стену тя тверду обрет мучитель, никиими же тя муками победиму, покусися сокрушити крепость твою зубы зверей и остриями мучилищнаго колеса, обаче и в сем ничтоже успе: сила бо Христова лютость зверей укроти, а страшное коло, на немже обращаемо бе тело твое, абие сокрушися. Тебе убо непобедимому страстотерпцу зовем:

Радуйся, честное Христово избрание:

Радуйся, непорочное Богови благоухание.

Радуйся, твердый адаманте Церкве:

Радуйся, непоколебимый столпе, досязаяй небесе.

Радуйся, звери видимыя укращаяй:

Радуйся, драконов невидимых сокрушаяй.

Радуйся, обагренный твоею за Христа кровию, срастворенную млеком:

Радуйся, неувядаемыя приемый венцы.

Радуйся, радость причинивый Ангелом и человеком:

Радуйся, прославленный Богом на небеси и на земли.

Радуйся, небожителю, ликовствуяй с мучениками:

Радуйся, насыщаяйся лицезрением Христа пресладким.

Радуйся, великомучениче и целителю Пантелеймоне.

Песнь исходную приносил твоему за Христа заколению священному, в немже вместе с кровию млеко истече от тебе, великомучениче, и маслична, под негоже усечен был еси, исполнися вся целительных плодов. Темже Христу, дивно прославляющему славящыя Его, тепле вопием: Аллилуиа.

Светозарная свеща был еси, богомудре, во тме многобожия седящим, путеводящая к Солнцу правды Христу Богу, Емуже молися, во свете заповедей Его присно пребывати и нам сицевая радостная тебе приносящим:

Радуйся, пресветлая звездо, блистающая на мысленной тверди:

Радуйся, лучу, светящий Христоименитым людем.

Радуйся, таинственно облиставаем от Солнца Христа:

Радуйся, умне землю обтекаяй. Радуйся, селение красное Пресвятаго Духа: Радуйся, сосуде пречестный, изливаяй исцеления.

Радуйся, чистоты сокровище: Радуйся, милости тезоимените. Радуйся, Царствия Небеснаго наследниче: Радуйся, вечныя славы сопричастниче. Радуйся, предстателю бедствующим в мори житейстем:

Радуйся, безсребрениче, помогаяй призывающим тя с верою.

Радуйся, великомученице и целителю Пантелеймоне.

Благодати обилие приял еси, преблаженне, по обилию любве твоея ко Христу Богу, иже и яви тя многоцелебным источником, безмездно врачующим душевныя и телесныя болезни притекающих к тебе с верою, и Богу вопиющих: Аллилуиа

Поюще многострадальныя подвиги твоя за Христа, славный страстотерпче, хвалим долготерпение твое, ублажаем мученическую кончину, почитаем и священную память твою, заступниче наш и целителю, и в похвалу сицевая тебе зовем: Радуйся, благочестия трубо благозвучная: Радуйся, мечу посекающий нечестие. Радуйся, строганный на древе за Распростершаго руце Свои на древе крестнем:

Радуйся, яко опаляем за Него, прелести пещь погасил еси.

Радуйся, язвами твоими враги уязвивый:

Радуйся, кровию твоею токи идольския крове изсушивый.

Радуйся, в кипящее олово вверженный за Христа:

Радуйся, погруженный за имя Его в водах морских.

Радуйся, промытлением Божиим неврежден в сих пребывый:

Радуйся, яко чрез огнь и воду мучений вше л еси в покой небесный.

Радуйся, изливаяй неизсякаемыя струи милости верным:

Радуйся, благострадательный врачу, исцеления благодатная подаваяй.

Радуйся, великомучениче и целителю Пантелеймоне.

О, многострадальный и предивный страстотерпче Христов и целителю наш Пантелеймоне! Милостиво прием сие малое от нас приношение, от многообразных недугов исцели ны, и предстательством твоим сохрани от враг видимых и невидимых, и вечнаго мучения избавитися нам Господа умоли, да во Царствии Его непрестанно воспеваем: Аллилуиа.

О, великий угодниче Христов, страстотерпче и врачу многомилостивый Пантелеймоне! Умилосердись надо мною грешным рабом, услыши стенание и вопль мой, умилостиви небеснаго верховнаго врача душ и телес наших, Христа Бога нашего, да дарует ми исцеление от жестокаго гнетущаго мя недуга. Приими недостойное моление грешнейшаго паче всех человек. Посети мя благодатным посещением, не возгнушайся греховных язв моих, помажи их елеем милости твоей и исцели мя: да здрав сущи душею и телом, остаток дней моих, при помощи благодати Божией, возмогу провести в покаянии и угождении Богу, и сподоблюся восприяти благий конец живота моего. Ей, угодниче Божий! Умоли Христа Бога, да дарует ми предстательством твоим здравие телу и спасение души моей. Аминь.

Избранным рабам Господа Вседержителя, Вере, Надежде и Любви, и мудрей матери Софии, похвальная вам пения умиленно возносим. Вы же, яко дерзновение ко Христу Богу имуща, молитеся за ны, во еже избавитися нам от грехов и скорбей, да благодарственно вопием вам: Радуйтеся, Веро, Надеждо и Любы, купно с Софиею, материю вашею премудрою!

Ангели на небеси радовахуся, добродетельное житие ваше зряще, еже провождасте в чтении Писаний Божественных, в трудех, посте, молитве и милостыни, материю вашею непрестанно суща поучаемы, да явитеся образи живии триех богословских добродетелей, ихже именами наречены бысте. Мы же, таковей мудрости матере вашея и совершенному благоразумию вашему дивящеся, благоговейно рцем вам:

Радуйтеся, единомысленныя сестры, трием добро детелем тезоименитыя:

Радуйтеся, в повиновении Богомудрей матери вашей на степени совершенствования вшедшыя.

Радуйтеся, аки три райския ветви, в зловернем Риме возрасшыя:

Радуйся, Софие, дщерем твоим имена добродетелей нарекшая, яже вещию исполняти научила еси.

Радуйся, Веро, верою невидимое, яко видимое, зрети нам помогающая:

Радуйся, в нетление облеченная. Радуйся, Надеждо, надеждою страдания наша во юдоли скорби ослабляющая и в горняя десницею указующая:

Радуйся, Царствие Небесное унаследовавшая. Радуйся, Любы, любовию Божественною блаженство безсмертныя жизни нам открывающая: Радуйся, благодатию Духа Святаго осиянная. Радуйся, Софие, сиесть премудрость, премудре дщери твоя воспитавшая:

Радуйся, в добродетелех веры, надежды и любве нас утверждающая.

Радуйтеся, Веро, Надеждо и Любы, купно с

Софиею, материю вашею премудрою.

Видящи мудрая София слуги, пришедша звати ю со дщерьми ко царю Адриану, и познавши вину призвания своего, ста со чады своими на молитву, помощи Бога просящи: по молитве же, емшася за руце, якоже венец уплетенный, идяху вкупе, поюща Христу Богу: Аллилуиа.

Разум несумненный имели есте, святыя, егда бо в палаты царския введены бысте, цареви Адриану предстаете с лицем светлым, очесы веселыми и сердцем мужественным. Царь же, зря честная лица ваша неустрашенна и мудрость Софии уведев, отложи на ино время суд свой и отела вы к некоей благородней жене, у неяже пребысте три дни, матери вашей премудрей Богодухновенными словесы день и нощь вас поучающей. Темже ублажающе вас, взываем сице: