Сборник - Типикон

Прежде солнечнаго захождения дне субботнаго, приходит параекклисиарх [сиречь кандиловжигатель] к предстоятелю, и творит поклонение ему, знаменуя пришествием своим время клепания. И взем благословение, изшед клеплет в малый кампан. И собравшимся братиям в притвор, творит священник начало: благословен Бог наш: И учиненный чтец глаголет: Слава тебе Боже наш, слава тебе. Таже, царю небесный: Трисвятое: И по Отче наш: Возглас от священника, и чтет чтец 9–й час по обычаю. Таже, по конце того и по отпусте входим в храм: и станет кийждо на своем месте. Аще же 9–й час глаголется в храме, тогда отпуст 9–го часа не бывает, но абие иерей начинает, глаголя: благословен Бог наш: И чтец глаголет: Приидите поклонимся: трижды, и вечерний псалом: благослови душе моя Господа: тихо и кротким гласом. По псалме же, Слава, и ныне, аллилуиа. трижды. иерей же ектении не глаголет, но чтец глаголет: Господи помилуй, трижды. Слава, и ныне: И абие, Господи воззвах: И ставим стихи 4. И поем стихиры воскресны гласа, три, повторяюще 1. Слава, и ныне, богородичен. Таже, Свете тихий: Прокимен, Господь воцарися: Стих: облечеся Господь в силу и препоясася. И паки, Господь воцарися: Таже, Сподоби Господи в вечер сей: И абие поем стиховны стихиру едину воскресну. И другия стихиры Богородицы, подобны 3, с припевы их. Слава, и ныне, богородичен их. Таже, Ныне отпущаеши: Трисвятое, и по Отче наш: Тропарь воскресн. Слава, и ныне, богородичен его. Посем глаголет иерей ектению малую: Помилуй нас Боже, по велицей милости твоей, молим ти ся услыши и помилуй. Лик: Господи помилуй, трижды. еще молимся о благочестивейшем, самодержавнейшем, великом господре нашем императоре николае александровиче, всея россии: о супруге его благочестивейшей господрне, императрице александре феодоровне: о матери его благочестивейшей господрне императрице марии феодоровне: о наследнике его, благоверном господре, цесаревиче и великом князе, алексии николаевиче, и о всем царствующем доме. Лик: Господи помилуй, трижды. еще молимся о святейшем правительствующем синоде: Лик: Господи помилуй, трижды. еще молимся за всю братию и за вся христианы. Лик: Господи помилуй, трижды. Возглас: яко милостив и человеколюбец Бог еси, и тебе славу возсылаем отцу и сыну, и святому духу, ныне и присно, и во веки веков. Таже, Слава тебе Христе Боже: [Смотри] И отпуст малый, и многолетие. И вшедше в трапезу, глаголем: ядят убозии и насытятся, и восхвалят Господа взыскающии его: жива будут сердца их в век века. Слава, и ныне: Господи помилуй, трижды. благослови. И благословляет священник трапезу. И вкушаем представленная нам полегку. да не отягчимся на бдение. По ядении же, Слава, и ныне: Бысть чрево твое святая трапеза, имущая небеснаго хлеба, Христа бога нашего, от негоже всяк ядый не умирает, якоже рече всех богородительнице питатель. И посем, честнейшую херувим: Таже, Возвеселил ны еси Господи в творениих твоих, и в делех руку твоею возрадуемся: знаменася на нас свет лица твоего Господи, дал еси веселие в сердце моем, от плода пшеницы, вина и елеа своего умножишася. в мире вкупе усну, и почию, яко ты Господи единаго на уповании вселил мя еси. Слава, и ныне: Господи помилуй, трижды. благослови. священник: С нами бог, своею благодатию и человеколюбием, всегда, ныне и присно, и во веки веков, аминь.

По еже заити солнцу мало, отходит кандиловжигатель, и творит поклон предстоятелю. Таже восходя ударяет в великий кампан не скоро, поя непорочны, или глаголя псалом 50, тихо 12–ю. И потом вшед и вжигает лампады, и уготовляет кадильницу. И тако паки изшед клеплет во вся кампаны. И возвращься в церковь, и вжег свещу в насвещнице, поставляет прямо царских врат. Таже творит поклонение иерею, егоже есть чреда. иерей же востав творит поклон предстоятелю: И отшед творит поклоны 3, пред святыми дверьми, и на оба лика: братиям же всем седящим. И вшед во святый олтарь, возлагает на ся епитрахилий, целовав крест верху его и приим кадильницу, и став пред святою трапезою, влагает фимиам: и глаголет молитву кадила тайно. И тако кадит святую трапезу крестовидно окрест, и весь жертвенник: и отворив святыя двери исходит. Кандиловжигатель же прием свещник стоящий среди церкве, возгласит велиим гласом: Востаните! держа свещник в руце со свещею возжженною, всем же воставшим. И изшед священник святыми дверьми, и творит крест кадилом пред святыми дверьми, возводя праве и преки: и идет и кадит поряду святыя иконы, яже на десней стране, таже на левей, посем предстоятеля, и оба лика по чину их: параекклисиарху же предходящу ему со свещником. егда же иерей сотворит крест кадилом, покланяяся мало, покланяется с ним и параекклисиарх. Исходит же и в притвор, и кадит по чину и тамо сущую братию: и паки возвращься в церковь, и став посреди обою лику знаменует кадилом крест, зря к востоком, и возглашает велегласно: Господи благослови. И абие кадит образ спаса Христа, и Богородицы, и предстоятеля на месте его: и вшед во святый олтарь, и став пред святою трапезою, знаменует кадилом крест, трижды. И потом возглашает сице: Слава святей, и единосущней, и животворящей и нераздельней Троице, всегда, ныне и присно, и во веки веков. И начинает предстоятель, или екклисиарх: Аминь. Приидите поклонимся цареви нашему Богу. низким и тихим гласом. Таже второе мало повышше: Приидите поклонимся и припадем христу, цареви нашему Богу. Паки третие вышшим гласом, сице: Приидите поклонимся и припадем самому христу цареви и Богу нашему. Таже особне: Приидите, поклонимся, и припадем ему. И абие начинает вышшим гласом предстоятель, или екклисиарх, на глас осмый: благослови душе моя Господа: не скоро, и со сладкопением, споющей и прочей братии. И припев: благословен еси Господи. Таже вторый певец праваго лика: Господи Боже мой, возвеличился еси зело: благословен еси Господи: легко со гласом соглашающим и прочим братиям с ними. иерей же с параекклисиархом, изшед из святаго олтаря, и сотворше поклоны три пред святыми дверьми, и обращшеся творят поклон предстоятелю: Таже на оба лика по единому: И идут и станут на своих им местех.

В соборных же и приходских храмех действует священник сия в фелоне, диакон же в стихаре.

егда же начнут пети: Вся премудростию сотворил еси: и, Слава ти Господи, сотворившему вся. Тогда иерей приходит пред царския двери во епитрахилии, и откровенною главою стоя, глаголет молитвы светильничныя. Скончавшуся же псалму, глаголет ектению великую: Миром господу помолимся. И по ектении возглас: яко подобает тебе: Таже стихологисуем псалтир на глас 8, первую кафисму: блажен муж, первый антифон: вторый же и третий антифон поем на глас дне.