Татьяна Лагутина - Молитвы о помощи

Иже в законней благодати праведни бывше, Младенца Богоданнаго породиша нам Иоакиме и Анна. Темже днесь светло торжествует, весело празднующи, Божественная церковь честную вашу память, славящи и Бога воздвигшаго рог спасения нам в дому Давидове.

Праведных Твоих, Господи, память празднующе, теми молим Тя, спаси души наша.

О, пречудный священномучениче Харалампие, страстотерпче непреодоленный, священниче Божий, о всем мире ходатайствуяй! Призри на моление нас, почитающих святую память твою: испроси нам у Господа Бога прощение грехов наших, да не до конца прогневается на нас Господь: согрешйхом бо и недостойни явихомся милосердия Божия: моли о нас Господа Бога, да низпослет мир на грады и веси нашя, да избавит нас от нашествия иноплеменников, междоусобныя брани и всяких раздоров и нестроении: утверди, священномучениче, веру и благочестие во всех чадех православныя христианския церкве, и да избавит нас Господь Бог от ересей, расколов и всякаго суеверия. О милосердый мучениче! Молися за ны ко Господу, да сохранит от глада и всяких болезней, и да подаст нам изобилие плодов земных, скотов умножение на потребу человеком и вся нам полезная: наипаче же да сподобимся, молитвами твоими, небеснаго царствия Христа Бога нашего, Емуже честь и поклонение подобает, со безначальным Его Отцем и пресвятым Духом, ныне и присно и во веки веков.

Святая невесто Христова, многострадальная мученице Параскево! Вемы, яко от юности твоея ты всею душею твоею и всем сердцем твоим возлюбила еси Царя славы, Христа Спасителя и Ему единому уневестилася еси, раздавши имения твоя неимущим и бедным. Ты силою благочестия твоего, твоим целомудрием и праведностию, яко лучами солнечными, просияла еси, живши свято среди неверных и безбоязненно проповедавши им Христа Бога. Ты, от дней юности твоея, наученная твоими родителями, всегда благоговейно чествовала дни искупительных страстей Господа нашего Иисуса Христа, Егоже ради и сама добровольно пострадала еси. Ты, десницею ангела Божия от неисцельных ран дивно исцеленная и восприявшая неизреченную светлость, изумила еси неверных мучителей. Ты, именем Господа нашего Иисуса Христа и силою молитвы твоею в капище языческом всех идолов долу повергши, в прах сокрушила еси я. Ты, опаляемая свещами, единою молитвою твоею ко всесильному Господу угасила еси огнь естественный, и тем же пламенем, чудесне возжженным чрез ангела Божия, попаливши неистовых беззаконников, мног народ привела еси к познанию истиннаго Бога. Ты, во славу Господа приявши мечное главы твоея усечение от мучителей, доблественно скончала еси страдальческий твой подвиг, возшедши душею твоею на небеса, в чертог вожделеннаго твоего Жениха Христа Царя Славы, радостно сретшаго тя сим небесным гласом: «Радуйтеся, праведнии, яко мученица Параскева увенчася!» Темже и мы днесь приветствуем тя, многострадальная, и, взирающе на святую твою икону, с умилением вопием ти: всечестная Параскево! Вемы, яко велие имаши дерзновение ко Господу: умоли убо Его Человеколюбца и о нас с предстоящих и молящихся ти, да подаст Он и нам, якоже тебе, терпение и благодушие в бедах и скорбных обстояниях; да дарует Он, ходатайством твоим и заступлением, радостное, благоденственное и мирное житие, здравие же и спасение, и во всем благое поспешание возлюбленному нашему отечеству, да ниспослет святое Свое благословение и мир, и всем православным христианам да подаст твоими святыми молитвами утверждение в вере, благочестии и святости, преспеяние же в христианской любви и всякой добродетели: да очистит нас грешных от всякий скверны и порока, да оградит нас святыми Своими ангелами, да заступит, сохранит и помилует всех святою Своею благодатию и соделает наследниками и причастниками Небеснаго Своего Царствия. И тако улучивше спасения твоими святыми молитвами, предстательством и заступлением, всеславная невесто Христова Параскево, прославим все пречистое и великолепое имя дивнаго во святых Своих истиннаго Бога, Отца и Сына и Святаго Духа, всегда, ныне и присно и во веки веков. Аминь.

Премудрая и всехвальная Христова мученица Параскева, мужескую крепость приемши, женскую же немощь отвергши, диавола победи, и мучителя посрами, вопиющи и глаголющи: приидите, тело мое мечем ссецыте, и огнем сожгите, аз бо радующися иду ко Христу, Жениху моему. Тоя молитвами, Христе Боже, спаси души наша.

Всесвятое и непорочное мучение принесши, яко вено пречестное Безсмертному Жениху Христу, ангельское ликостояние возвеселила еси, и победила еси демонския козни: сего ради тя честно верою чтим, мученице Параскево, многострадальная.

Величаем тя, страстотерпице Христова Параскево, и чтим честное страдание твое, еже за Христа претерпела еси.

Крестителю Христов, проповедниче покаяния, кающагося не презри мене, но совокупляяся с вой небесными, молися ко Владыце за мене недостойнаго, унылаго, немощнаго и печальнаго, во многия беды впадшаго, утружденнаго бурными помыслы ума моего: аз бо есмь вертеп злых дел, отнюдь не имеяй конца греховному обычаю; пригвожден бо есть ум мой земным вещем. Что сотворю, не вем, и к кому прибегну, да спасена будет душа моя? Токмо к тебе, святый Иоанне, благодати тезоимените, яко тя пред Господем, по Богородице, вем больша быти рожденных всех, ибо ты сподобился есй коснутися верху Царя Христа, вземлющаго грехи мира, Агнца Божия: Егоже моли за грешную мою душу, да поне отныне, в первыйнадесять час, понесу тяготу благую и прииму мзду с последними. Ей, Крестителю Христов, честный Предтече, крайний пророче, первый во благодати мучениче, постников и пустынников наставниче, чистоты учителю и ближний друже Христов, тя молю, к тебе прибегаю, не отрини мене от твоего заступления, но возстави мя, падшагося многими грехи; обнови душу мою покаянием, яко вторым крещением, понеже обоего начальник еси: крещением омываяй грех, покаяние же проповедуяй во очищение коегождо дел скверных; очисти мя грехми оскверненнаго и понуди внити, аможе ничтоже скверно входит, во Царствие Небесное. Аминь.

Преблаженне и приснопамятне священномучениче Власие, дивный страдальче и предстателю наш теплый, по отшествии твоем в жизнь вечную призывающим твое святое имя пособствовати, и во всяких прошениих услышанным быти обещавый! Се ныне к тебе угоднику Божию, яко ко истинному ходатаю спасения, притекаем и смиренно молимся: предстани нам в помощь, узами грехов связанных, подвигнися на всемощные твоя к Богу молитвы и помолися о нас грешных: тя бо недостойнии, призывати на заступление дерзаем, и желаем от всех грехов наших тобою свобождение получити. О святче Божий Власие! В сокрушении и смирении сердца нашего пред тобою припадаем и молимся: осияй нас, омраченных наветы вражиими, светом благодати свыше, да в нем ходяще, не преткнем о камень ног наших. Тя, яко сосуд в честь избранный и исполненный благодати Божия, молим: сподоби нас грешных от исполнения твоего желаемое прияти, и исцели наша душевныя и телесныя язвы, грехом же нашим прощение и душевному и телесному нашему здравию и спасению полезное у Господа испроси, да всегда прославляем Отца и Сына и Святаго Духа, и твое милостивое предстательство о душах и телесех наших, ныне и присно и во веки веков. Аминь.