Н. Гончарова - Главные молитвы для женщин

Милосердый Господи, Иисусе Христе, Тебе вручаем детей наших, ихже даровал еси нам, исполнив моления наша. Молим Тя, Господи, спаси их, имиже Сам веси судьбами. Сохрани их от пороков, зла, гордости, и да не коснется душ их ничтоже противное Тебе. Обаче веру, любовь и надежду спасения даруй им, и да соделаются избранными сосудами Духа Святаго, и да будет путь жития их свят и непорочен пред Тобою. Благослови их, Господи, да стремятся на всяк час живота своего творити волю Твою святую, да восхощеши, выну пребывати с ними Духом Твоим Святым. Господи, научи их молитися Тебе, да будет им молитва крепостию и отрадою в скорбех и утешением в житии их, и да молитвою их спасемся и мы, их родители. Ангели Твои да охранят их выну. Сотвори, да будут чада наша сострадательны ко ближним своим и да исполнят Твою заповедь любве. Аще же и согрешат, сподоби их, Господи, принести Тебе покаяние и по неизреченней милости Твоей прости их. Егда же скончаются дние живота их на земли, приими их в небесныя Твоя обители, в няже да совведут с собою купно и иных рабов Твоих избранных. Молитвами Пречистыя Твоея Матере, Пресвятыя Богородицы и Приснодевы Марии и святых Твоих ( перечисляются все святые покровители семьи ), Господи, помилуй и спаси нас, яко препрославлен еси со безначальным Твоим Отцем и с Пресвятым и Благим и Животворящим Твоим Духом, ныне и присно и во веки веков. Аминь.

Боже, всея твари Создателю, прилагая милость к милости, и сподобивый мя быти материю семейства! Благость Твоя дарова мне чада, и дерзаю глаголати яко сии суть чада Твоя. Ты бо даровал еси им бытие, оживотворил еси их душею безсмертною, возродил еси святым Крещением к житию по воле Твоей, усыновил еси их и приял в недра Церкве Своея. Господи! Не лиши их благодати Твоея во вся дни живота их; сподоби их быти причастники таинств Завета Твоего; освящай их истиною Твоею; да святится в них имя Твое святое! Ниспосли мне благодать Твою возрастити их во славу имене Твоего и ближним на пользу! Подаждь ми вся к сему благопотребная, терпение и силы, во еже насадити в сердцах их корень благих – страх Твой!

Озари их светом Премудрости Твоея, содержащия вселенную! Да возлюбят Тя всею душею и всем помышлением своим; да прилепятся к Тебе всем сердцем своим и да трепещут словес Твоих во вся дни живота своего! Даруй мне разум уверити их, яко живот истинный есть соблюдение заповедей Твоих; и яко тщанием, вкупе со благочестием, обретается в животе сем безпечалие и довольство, в вечности же – блаженство неизреченное. Открый им разумение закона Твоего, да пребудут до конца дний своих в чувстве вездесущия Твоего. Насади в сердцах их страх и отвращение от всякаго беззакония; да будут непорочными в путех своих; да помнят выну, Всеблагий Боже, яко Ты еси Ревнитель закона и правды Твоея! Соблюди их в целомудрии и благоговении к имени Твоему, да не осквернят делы худыми Церкве Твоея, но да живут по ея велениям! Одушеви их желанием полезнаго учения и соделай способными ко всякому делу благому, да стяжут истинное разумение о всех вещех, о нихже подобает им ведати; да просветятся познаниями, полезными роду человеческому. Господи! Умудри мя неизгладимо напечатлети во умех и сердцах детей моих опасение сообществ с незнающими страха Твоего; внушити им удалятися от всякаго совета с беззаконными; да не внимают беседам злым; да не совратятся с пути Твоего, поревновавше лукавым людем; да не соблазнятся, видяще, яко путь беззаконных благоуспешен в мире сем бывает. Отче Небесный! Даруй мне благодать всячески хранитися, да не введу детей моих в соблазн словесы или делы моими, но, выну соблюдая жительство их, возмогу отводити их от заблуждений, исправляти прегрешения их, обуздывати упорство и непокоривость, удерживати от суеты и легкоумия; да не влекутся безумными помыслы, да не ходят вослед сердца своего, да не возгордятся в помышлении своем, да не забудут Тебе и закона Твоего. Да не погубит беззаконие ума и здравия их, да не приведут греси в расслабление душевных и телесных сил их. Судие Праведный, отдаяй грехи отцев на чада, отврати возмездие от чад моих, не накажи их за грехи моя; но окропи их росою благодати Твоея, да преуспевают в добродетели и святости, да возрастают во благоволении пред Тобою и в любве у человек благочестивых. Отче щедрот и всякаго милосердия! Мати сущи, желала бы аз чадом моим всякаго обилия благ земных, благословения от росы небесныя и от тука земнаго, обаче буди с ними святая воля Твоя! Устрои судьбу их по благоволению Твоему, не лиши их в житии сем хлеба насущнаго, ниспосли им вся благопотребная в жизни временней ко обретению блаженныя вечности. Буди милостив к ним, егда согрешат пред Тобою; не вмени им грехов юности и неведения их; приведи в сокрушение сердца их, внегда противитися им воле Твоей благой. Наказуй их и милуй, настави на путь, благоугодный Тебе, токмо не отвержи их от лица Твоего! Приими с благоволением молитвы их; споспешествуй им во всяцем деле благом; не отврати лица Твоего от них во дни скорби, да не постигнут их искушения паче сил. Осени их милостию Твоею; да пребудет Ангел Твой с ними и сохранит их от всякия напасти и пути злаго.

О Всеблагий Боже! Соделай мя материю, о чадех веселящеюся, да пребудут отрадою моею во дни живота моего и крепостию мне в старости моей. Сподоби мя во уповании на милосердие Твое предстати с ними на Страшнем судищи Твоем и с непостыдным дерзновением рещи: се аз и дети, яже дал ми еси, Господи! Да купно с ними прославлю неизреченную Твою благость и вечную любовь Твою, и превознесу пресвятое имя Твое, Отца и Сына и Святаго Духа, во веки веков. Аминь.

Отче Святый, Предвечный Боже, от Негоже исходит всякий дар и всякое благо. Молю Ти ся прилежно о чадех, яже дарова ми благость Твоя. Ты даровал еси им жизнь, оживотворил еси их душею безсмертною, возродил еси святым Крещением, во еже жити по воле Твоей и Царствие Небесное наследити; сохрани их по благости Твоей во вся дни живота их. Освяти их истиною Твоею, да святится в них имя Твое.

Содействуй ми благодатию Твоею воспитати их во славу имени Твоего и ближним во благая, дай ми вся благопотребная к сему, терпение и силу. Господи, просвети их светом Премудрости Твоея, да возлюбят Тя всею душею, всем помышлением; насади в сердцах их страх Твой и отвращение от всякаго беззакония, да ходят в заповедех Твоих; украси души их целомудрием, усердием, долготерпением, праведностию; огради их правдою от клеветы, тщеславия и всякия мерзости; окропи росою благодати Твоея, да преуспевают в добродетелях и святости и да возрастают во благоволении Твоем, в любви и благочестии. Ангел Хранитель выну да пребудет с ними и да соблюдет юность их от помышлений суетных, от прельщения соблазнов мира сего и от всяких наветов лукавых. Аще же когда согрешат пред Тобою, Господи, не отврати лица Твоего от них, но буди милостив к ним, возбуди в сердцах их покаяние по множеству щедрот Твоих, очисти согрешения их и не лиши Твоих благ, но подай им вся потребная ко спасению, сохрани их от всякия болезни, напасти, беды и скорби, осени их милостию Твоею во вся дни живота их. Боже, молю Ти ся, даждь мне веселие и радость о чадех моих и сподоби мя предстати с ними на Страшнем судищи Твоем и с непостыдным дерзновением рещи: се аз и дети, яже дал ми еси, Господи. Да прославим всесвятое имя Твое, Отца и Сына и Святаго Духа. Аминь.