Анатолий Фоменко - Царь славян

«Возлюблю тя господи крепости моя.
Господь утвержение мое и прибежище мое, и избавитель мой.
Бог мой помощник мой и уповая нань.
Защититель мой, и рог спасения моего, и заступник мой.
Хваля призову господа, и ОТ ВРАГ МОИХ СПАСУСЯ.
ОДЕРЖАША МЯ БОЛЕЗНИ СМЕРТНЫЯ, и потоцы беззакония смутиша мя.
Болезни адовы обыдоша мя, предвариша мя сети смертныя.
И внегда скорбети ми, призвах господа, и к богу моему воззвах.
Услыша от церкве святыя своея глас мой, и вопль мой пред ним внидет пред очима его.
И подвижася, и трепетна бысть земля, и основания гор
смутишася, и подвизашася яко прогневася на ня бог.
Взыде дым гневом его, и огнь от лица его воспланется, углия возгорешася от него.
И преклони небеса и сниде, и примрак под ногама его.
И взыде на херувим и лете, возлете на крилу ветреню,
и положи тму закров свой, окрест его селение его.
темна вода во облацех воздушных.
От облистания пред ним облацы проидоша, град и углие огнено.
И возгреме с небесе господь, и вышнии даде глас свой.
Пусти стрелы и разгна я, и молния умножи, и смути их.
И явишася источницы воднии, и открышася основания вселенныя.
От запрещения твоего господи, от дохновения духа гнева твоего.
Послá свыше и прият мя, восприят мя от вод мног.
ИЗБАВИТ МЯ ОТ ВРАГ МОИХ СИЛНЫХ, И ОТ НЕНАВИДЯЩИХ МЯ, ЯКО УКРЕПИШАСЯ ПАЧЕ МЕНЕ.
Предвариша мя в день озлобления моего, и бысть господь утвержение мое.
И изведе мя на широту, избавит мя яко восхоте мя.
И воздаст ми господь по правде моей, и по чистоте руку моею воздаст ми.
Яко сохраних пути господня, и не нечествовах от бога моего.
Яко вся судбы его предо мною, и оправдания его не отступиша от мене.
И буду непорочен с ним, и сохранюся от беззакония моего.
И воздаст ми господь по правде моей и по чистоте руку моею, пред очима его.
С преподобным преподобен будеши. и с мужем неповинным неповинен будеши.
И со избранным избран будеши, и со строптивым развратишися.
Яко ты люди смиренные спасеши, и очи гордых смириши.
Яко ты просвещаеши светильник мой господи, боже мой просвещаеши тму мою.
Яко тобою избавлюся от искушения, и о бозе моем прелезу стену.
Бог мой, непорочен путь его, словеса господня раждежена, защититель есть всем уповающым нань.
Яко кто бог, разве господа, или кто бог, разве бога нашего.
Бог препояса мя силою, и положи непорочен путь мой.
Съвершая нозе мои яко елени, и на высоких поставляя мя.
Научая руце мои на брань, и положи ЛУК МЕДЯН мышцам моим.
И дал ми еси защищение спасения, и десница твоя прият мя.
И наказание твое исправит мя в конец, и наказание твое то мя научит.
Уширил еси стопы моя подо мною и не изнеможете плесне мои.
Пожену враги моя, и постигну я и не возвращюся дондежде скончаются.
Оскорблю их, и не возмогут стати, падут под ногама моима.
И препоясал мя еси силою на брань, спял еси вся востающыя на мя под мя.
И враг моих дал ми еси хребет, и ненавидящыя мя потребил еси.
Возваша, и не бе спасаяй, ко господу, и не услышаше их.
И истню их яко прах пред лицем ветра, яко брение пути поглажду их.
И избави мя от пререкания людей,
ПОСТАВИША МЯ ВО ГЛАВУ ЯЗЫКОМ.
ЛЮДИЕ ИХЖЕ НЕ ВЕДЕХ, ПОРАБОТАША МИ,
в слух уха услышаша мя.
Сынове чюждии солгаша ми, сынове чюждии обетшаша, и охромоша от стезь своих.
Жив господь, и благословен бог, и вознесется бог спасения моего.
Бог даяй отмщение мне, и повинуяй люди под мя, избавитель мой, от враг моих гневливых.
От востающих на мя вознесеши мя, от мужа неправедна, избавиши мя.
Сего ради исповемся тебе во языцех господи, и имени твоему пою.
Величая спасения царева, и творяи милость ХРИСТУ СВОЕМУ
ДАВЫДУ, и семени его до века».