Николай Маркевич - История малой россии - 3

до Великого Князя Московского, за дозволеньем и листом Его Королевское милости, ехать працы не литовал, а там с Князем Великим Московским и з духовными земли тамошнее, порозумевшысе и достаточне намовивши, и оказавши и донесши то им все якое гонение, преслидованье, и нарушенье и уничтоженье народ тутошний Руский, впорадках и канонах, церемониех церковных терпит и поносит, просечы и уживаючи их, абы о том тщание сотворившы, яко уды единое главы Христа, един единому с страждающе, купне и едьностайне з нами, так тому забегили, и вто тряфяли, же бы больше церков Христова такого разорванья, и внутрнего замешания, и народ Руского рожая, гонения и озлобления нетерпел. Пильне о том Вашу мость, яко вельцеласкового Господина и прыятеля, паче же, тщателя теплого влюбве веры Христовы, прошу абысь Ваша мость, хутливе до того се вложити, и за то се всею силою и моцью взяти, и там на том соборе спильностью старатисе веспол з их милостью рачыли, же бы який слушный початок и застановенье, если бы юж не до, якое згоды што есть, реч напреднейшая, себо рече: коль добро и коль красно, но еже жити братии вкупе. Тогды кто потом неподлейшая до полепшенья животов людьских, застараньем и початком Вашей мости мог, бо то есть явно вам мостям всим, яко се люде нашое релии згоршили, и так сут внабоженствах своих оспали, лениви недбали, иж не только, абы мели постерегать повинности своее християньское, и застановятися за Церков Божую и за веру свою старожытную, але еще се сами многие насмеваючи знее и опускаючи, до розмаитых сект утекают, чому, если Ваша мость забегати, и о том дбати не будете, и сами Ваша мость ведаете, хто за то слово и ответ воздати будет повинен, кровей бо рече их отруку вашею изыщу. Вы бо есте вожди, наставници и пастуси паствы Христовы, и ни для чого иншого нирозмножылося межы людми такое ленивство, оспальство, и отступенье от веры, яко на большей для того, иж устали учители, устали проповедачы слова Божого, устали науки, устали казанья; А з тым наступило знищенье, и уменшенье фалы Божое, церквей его, наступил голод слуханья слова Божого, наступило за тым отступенье от веры и закону, прышло на остаток на нас тоиж юж незостает нам на мнейшее речы, скоторое бых мосе тешити взаконе своем мели, лучше бысь мо тепер могли слова пророцкие вспоминати, мовечы— хтож дасть голове нашей воду и очыма нашыма источник слез, абых мо могли оплакивати упадку изнищенья веры и закону своего вдень и вночы, все опроверглосе, упало, зо всих сторон скорб, ситование и беда, и если се далей почувать не будемо, Богу весть, што знами за конец будет. Я зстороны моее повторе и потрете прошу, Бога ради, так Ваша мость, для повинности своее пастырское, яко и для боязни и помсты Божое вто потрафяйте, же бысте там што доброго справити и застановити, и початок який добрый уделати могли. Прочееже, вздравии телесном, и вдуше спасительном пребывании долгоденствовати, от Господа Бога Вашей мости желаю. Писан у Люблине, месяца Июня 21 дня року 93.

В.М. зычливый приятель, сын и слуга послушный,

Костантин, Княжа Острозкое, Воевода Киевский, власною рукою.

При котором листе послал, его милость, Пан Воевода, и артикулы, своею власною рукою написанные до тое единости, што бы вней вировати потреба было.

А то суть тые.

На первей; абых мо при всих обрадках своих, яко церков восточная держит, вцале зостали.

Абы Панове Рымляне церьквей наших и наданя их на свое Костелы не оборочали.

Абы за постановеньем згоды, если бы се напотом хто знаших до Рымского Костела удати хотел, не прыймовали, а ни примушали, Азвлаща при отдаванью малженства, яко то звыкли чынити.

Абы духовные наши втаковом же пошанованью, яко и их были, азвлаща Митрополит, и владыкове враде и на Сеймиках местце мели, хотя не вси.

Потреба бы и Патриархов обослать, же бы се до згоды склонили, же бысь мы единым серцем и едиными усты Пана Бога хвалили. Потреба и до Московского и до Волох послати, же бы се на одно знами згодили, аздалобы ми се наслушней до того ужить до Москвы, его милости, отца Епископа Володимерского, а до Волох, отца Епископа Львовского.

Потреба теж поправить некоторых речей в церквах наших, азвлаща около сакраменту и иншых вымыслов людских.

О закладаньи школ и наук волных, азвлаща для цвиченья духовным, пильно потреба же бых мо мели учоные презвитери и казнодее добрые, бо за тым, иж наух нет, великое грубианство внаших духовных умножилося.

Освецоное Княжа, а мой милостивый Пане, службы и молитвы мое залецам ласце, Вашей мости моего милостивого Пана.

Не отпысуючы ничого на так широкое писанье вашей мости, вкотором мя, Ваша мость, упоминати рачиш, покорне только за престрогу дякую и чуюся дасть Бог втом же не так много для пожытков своих, и вывышенья дальшого, яко больше для помноженья фалы Божое, видел бым тую згоду быти пожиточьную, а ведьже не такую, же бысмы ся мели претворити зовсим во иншый образ, але зоставши вцале, а только некоторых речей поправивши, вчом больше упору, а нижли истинны держимося, згодитися стыми, скоторыми есмь, и перед тым в единоцтве были, а дал бы то, Пан, Бог, же бы и вси згодне, на которых больше належит, але выдечы што ся деет вся надея, яко бачу уставает, бо тые хотя бы подобно и ради, не могут. А мы опять можем, але не хочем, а только Богом лудимо, просечы о соединение веры. Недыв теды коли источники высхнут, же и реки уставают, а за тым, а ни уних, а ни у нас, не только науки, але и порядку пусто, припоминать, ми Ваша мость, речеш: сыноды Берестейские зстороны школ и друкарни и иншых речей Церькви Божой потребных, же ся тому досыт недеет, ино ачь колвек то еще не за моего пастырства становилося, але до речи так светобливое и доброе не дал-бым ся ни кому упередить и не жаловал бым и остатка убогое маетности, хоням вней вже немалую диру деткам своим учинил, двое именье продавши, а пустки, которыем застал направуючи, не уфольварках, але вцеркви, аштож пак на таковые речы кгрунтовные. Чым и фала Божая множиться, и лепшый порядок в церкви Божой деется, не жаловал бым и тот остаток поживенья моего убогого разделить было бы кому доброму, а не таковым превратником, которые больше за пожитком убегаются, яко и тепер штося стало у Берести, же ся школа разорила через, самых же Професоров школьных, которые за лакомством удавшися довольни на сытшые пироги отбегли, а тут и у большой ганьбе, и жалю убогого Хрестиянства на уруганье противников наших все покинули, без жадное слушное причыны, а тож колыбы ку доброму не жаловал бым, и самого себе оскудевши, наложить, але иж и того внас оскудно, вшак Ваша мость сам того дознаваеш, з якою трудностью то вашей мости приходит, хотясь на всем Паном Великим а предся, якобы потреба не можеш ся ни то зобрать, а штож пак, нам калекам, будучи по среде волков, наконец и церымоней церковных забороняют порадне отправовати, о чом бых много до Вашей мости мел писати, штося вмоей Епископии Берестейской деет, якое утяженье терпят хрестияне внекоторых местах, отож еще бы ся тым чоловек тешил, кгдыбы тот крыж хотели скромне терпети и зносити; але то горшая, же отпадают не по одному, але громадами видчынашу непотужность, а потом то ведает с ким ся зостанем. (штося дотычет новин краковских, итые бачу же непевные, але хотяжбы и певные были, того Ваша мость о моей особе нерач розумети) бо не только о Кардынальстве, албо Митропольни не мышлю, але и с тым што на собе ношу частей, проплакиваю на себе жемся того поднял, а подобно и на того, хто мя в то вправил, азвлаща видечистося на свете деет. О мамрамех ни яких неведаю; бом их никому ни на што не даровал. Але и я теж по части ведаю, а подобно певнейшие речы, и бы ми ся годило папирови зверить, указати бым то Вашей мости, же тые новины Краковские напевны суть.

Читать дальше