епископ Арсений Уральский - Книга об Антихристе и о прочих действах иже при нем быти хотящих

И благословляше всех сих сынов своих достодолжным благословением, якоже ему вразумися Духом Божиим. Тогда пророчески провозглашаше рождение Христа Бога нашего, хотящее быти от колена Иудова, такожде и рождение антихристово, хотящее быти от колена Данова. Рече убо о Христе четвертому своему сыну Иуде, глаголя: «Иудо, тебе восхвалят братия твоя, руце твои на плещу враг твоих, поклоняттися сынове отца твоего. Скимен львов Иуда от леторасли сыне мой взыде, возлег и поспа яко лев, и яко скимен, кто возбудит и: и не скончается князь от Иуды, ни старейшина от чресл его, дондеже приидет на менение ему, и той чаяние языком» (стихи 8—12). И сие проречение о Христе, от колена Иудова раждаемом. Подобно и о антихристе рече седмому своему сыну, Дану, глаголя: «Дан да судит людем своим, яко едино есть племя во Израили. И да будет Дан змий на распутии, седя на пути и хапля пяту конску» (стихи 16–17). И Моисей пророк о сем сице глаголет: «Дан львичищ скочит от Васана» (Второз., 33, 26). Подобно сим Иеремия пророк глаголет: «От Дана слышана есть ржания коней их, от гласа вопля поборник его подвигнута вся земля» (Иер., 8,16). На вся же сия пророчествия толкование творит в повести своей о антихристе святый Ипполит папа римский, вся бо оная в свидетельство приводя, сице глаголет: «Господу бо Исусу Христу по плоти на землю пришедшу от святыя чистыя Девы, Иудино племя восприимшу, от него же пришед царское сродство изъяви, по Иакову, иже в благословении возглашающему к своему сыну. Иудо, тебе восхвалят братия твоя, руце твои на плещу враг твоих. Скимен львов Иуда от леторасли сыне мой взыде. Возлег поспа яко лев и яко скимен, кто возбудит его. Не оскудеет князь от Иуды, ниже вождь от стегну его, дондеже приидет емуже щадится, и той чаяние языком. Виде ли Иаковли глаголы ко Иуде глаголемы, и на Господе исполняемы? Таковая же убо и о антихристе патриарх взывает. Темже якоже о Иуде пророчествова, тако и о сыне своем Дане. Ибо Иуда сын ему бяше четвертый, и Дан же бяше и той сын ему седмый. Да будет Дан змий при пути седя, хапля пяту коню. Змий убо кий сей? Но иже изначала прельстивый Адама. Но понеже многих ради достоит показати глаголемая не обленимся. Яко убо воистину от колена Данова хощет родитися и противитися мучитель сый царь и судия, лютый диавол. Рече пророк: Дан судит людем своим, яко сый едино племя от Израиля. Но речет кто, яко о Сампсоне речеся, яко от колена Данова родися, и суди людем двадесять лет: еже бо о Сампсоне отчасти бысть, совершенное же на антихристе исполнится. Глаголет бо Иеремия сице: спех от Дана услышим, борзостию коня его потрясется вся земля. И паки Моисей рече, скимен львов Дан искочи от Васана. Но яко да не погрешит кто о Спасе речей быти глагол сей. Да поставит ум, Дан рече скимен львов: колено именова Даново, объяви предлежащее, от нихже хощет сопротивник родитися. Якоже убо от колена Иудова раждается Христос, сице и от колена Данова родится антихрист». Ниже: «Обрезан Спас в мире бысть, и той подобие обрезан будет. Во образе человечи явися Господь, и той подобие во образе человечи изыдет. От еврей Христос возсия, и той от иудей родится». Ниже: «Во всех изравнитися хощет Спасу нашему сопротивник и сын погибельный. Ельма бо Спас миру спасти хотя род человечь, от чистыя и присно Девы Марии родися, тем же образом и сопротивник от скверныя жены изыдет на землю, родитжеся по привидению от девицы. Бог бо плотски к нам прииде, по плоти нашей, юже Сам сотвори Адаму и всем иже от Адама, разве греха. Сопротивник же аще и плоть приимет, но все в привидении. Како бо юже взем плоть, и ратовати ю имать в ню облекся? Непщую бо возлюбленнии, яко мечтательну плоть своему существу восприимет сосуд, сего ради и от девы якоже бы рещи родится, яко дух, аще и плоть многим явится, иже тогда» (Соборник, гл. 8) И святый Никифор Каллист глаголет: «Преди же Христова втораго пришествия приидет сопротивник Христу, и родится, якоже глаголет божественный Ипполит Римский, из жены скверны девицы от еврей сущи от племени Данова, иже бяше отрок Иакову. Обаче по привидению вся содеет и рождение и плоть и прочая вся» (синоксарь в неделю мясопустную). И в книге о правой вере, во главе 30-й, глаголет: «А той антихрист человек будет, беззакония сын. И родится, якоже глаголет Ипполит Римский, от девицы нечистыя, жидовки сущия, от колена Данова». Преподобный Ефрем в книзе своей сице глаголет: «Воистинну бо истинный Бог зачатся во чреве, Тойже воплотися, Тойже родися от святыя Девы в плоть нашу». Подобно же сему и о вразе глаголет: «Родитбося воистинну от жены скверны сосуд ему. Не сам родится сатана, но во образ его приидет прескверный яко тать» (слово 105). Во Апокалипсисе в седмой главе святый Иоанн Богослов, вчиневая вся дванадесяте колена Израилева, и от коегождо колена исчитая по дванадесяти тысящ запечатленных от ангела печатию живаго Бога, начинает же порядок племен не по обычаю и сродству сынов Израилевых, но во первых полагает колено Иудово, таже и прочая по ряду. Колено же Даново ко оным не причте, ниже помяну, но отнюд остави. Темже сие место внимательно смотрети надлежит двух ради сих вин, или обстоятельств: первое, яко чесо ради колено четвертаго Иаковля сына Иуду впреди прочих положи, а не перваго, Рувима? Второе, яко почто колено седмаго сына, Дана, не сопричте к числу прочих, но всячески претече? Еда той не сын бяше Иакову? Воистину сын, якоже и прочий. По вышереченных зде и по иных святоотеческих писаниих показуется, яко сего ради колено четвертаго сына Иаковля Иуды напреди положи, понеже то колено царское, и яко от того по плоти родися Христос Бог наш. О сем и апостол к евреом пиша глаголет: «Яве бо яко от колена Иудова возсия Господь наш Исус Христос» (Евр., 7, 14). А колено седмаго сына Иаковля, Дана, сего ради не сопричте к прочим, понеже от того родитися имать антихрист. Сице бо святый Андрей во Апокалипсисе место сие толкуя глаголет: «Назнаменати же и сие достоит, яко колено Даново, зане из него антихрист родится, того ради к прочим не причтеся» (глава 7).

И что писания сего яснейши о рождении антихриста, хотящаго родитися от колена Данова? И аще плотское сродство и колено ему писание являет, убо яве есть, яко чувственно быти ему показует. Аще бо он чувственно не родится от жены рода еврейска, от колена Данова, то и Христос разве не родился чувственно от жены рода еврейска, от колена Иудова? Ибо обоих – Христово и антихристово рождение Святое писание сказует неизменно от же девиц рода еврейска. О сем же всем известно, яко Христос чувственно родися от девицы рода еврейска: тако подобает и антихристу чувственно родитися от девицы рода еврейска. Но не тако родится антихрист, якоже родися Христос: како бо может таковаго врага рождение уподобитися Христову рождению: «Зачатие бо его безсеменно и рожество несказанно» (глас б, ирмос 9). Аще же и несказанно, обаче чувственно от Святыя Девы от рода еврейска родися, «и наземли явися, и с человеки поживе» (Богородичен воскресен 8-го гласа). Тако и антихрист чувственно имать родитися от скверныя жены блудницы, по привидению от девицы, от еврей сущия, колена Данова, от страны Галилейския. Якоже премудрый старец Филипп пишет в сочинении своея книги, нарицаемой «Душезрительное зерцало», сиречь беседословие души с телом, стих 91: «Душа. Да воистину ли сатана сам хощет воплотитися, и существо его с плотию растворитися, душу имущу и ум словесныя силы, и человек существенный будет, рабыня? Плоть: «Ни, Госпоже моя, ни непщуй се отнюд; но от родаубо Данова и страны галилейския, отроковица, девица мнимая, всескверная же всяко, родит тогда человека, от скверны блудныя: и в него сатана абие внидет, и все его действо приимет злейшее, быв во изступлении изумлен от него, и с ним вся лютая соделает и сотворит».