Daniel Defo - Çı Robinzon Kruzo heyrətinə jimon iyən çəy macəron

– Əqəm dımı duz bıvotoş, tıni qıləy çokə odəm bəkardem; boştə duziyətiyoən bə Məhəmməd peğəmbəri bəpe ğəsəm bəhəy. Əqəm joqo nıbu tıniyən bə dıyo şobədom. Əv sof bə çımı çəşi dılə dəmande diyəkarde sırəy iyən bəmı xain nıbeyo, bə har vırəy dımı şeyoş ğəsəm harde.

– Tosə ərəb çı çəşo qin be vokıronım okarde bə dıyo dıləm ro karde. Əmo toyki darşiye vaxtədə barkəzım bə ğıblə tərəf qordıniy çı sahiliku veyən diyəro nıbe qoroş çı həşi-pemə cihətım qəte. Bə sərinə vo qıne diyə nıkardəy ləpə hiç nıbe. Çanə bıvotoş de qıləy çokə suruəti şeykumon maşkinə ruji sahat seədə, sıftə kərə bıbu sahil çiyəy sadı penco mil bə ğiblə tərəf şimon, Fas iyən çı Mərakəşi hukuməti zəmino çı Afrika davlətmandon vıronku diyəro bemon hisım karde.

Əmo bə nez omə sahilədəmon təmomən odəmon yidəbin. Əmo çı ərəbonku joqo tarsəbim ki, nubəsətin bə çəvon das dənıqıneyo qıləy musaidə voykum istıfodə karde, penc ruj nımandim lobərım şonodoy, bə kəno benışim bə ro dəqınim. Penc ruji bəpeştə çı ğiblə vo dəmande qıne. Mı həni çəmə dumoysə omeku tarsedənıbim, bə kəno nez oməym, çı ru qəvədə əbıə qıləy qədə limanədə bo lobər şodoym ğəror doy. Im ru kom ru beş, çı kom vıro iyən kom tərəfo, çı kom xəlği zəmino omeş dair hiç məhlumatimi bə das nıznəy varde. Sahildə inson vindənıbim. Vindeyən oruzu kardənıbim. Əncəx çımı piyə şe şinə ov be.

Şanqovəsəyni bə ru dəşimon; həvo toyki beyədə bə kəno bebəşemon əvrə bənəvemon çəvrə koy omutemon bə ğəror səy. Həvo toyki bə-nıbəy, çı sahilo joqo dəhşətinə sədon, joqo dəhşətinə zikkon, vəhşiyə həyvonon zuzemon məsəy ki, kam mande ki, çı fəğırə hırdəni dıl bıtəkı. Əy bəmı tosə maştə obe bə kəno benışeyo dəmande lovə karde. Mınən:

Çok, Ksuri çəş bəkamon. Əmo bə rujən əyo çı şir iyən əslanisə həniyən tarsış əbıə bə insonon ros ome ehtımolən hesey,-votıme. Əv sırəy:

– Əmə de tifanqi hıcum bəkamon, əvoni bətılvonemon,-votışe.

Mı çəy ım dıl şoətim vinde, nıpiyəme əv çı kefo bı qıno çı əğəku mandə çəxırədəm bımi i ğədəhım doy. Bə əsliş diyə bıkoş çəy məsləhət beməne nıbe qoroş mı bəçəy votəyım quş eğande. Şanqomon lobər ğande niyo bimon. Niyobe votdəm, çunki i dəğiğən bıbu joqo nıhıtimon. Çı lobər ğandeku dı-se sahat bəpeştə sahilədə muxtəlifə cinsədə əbıə, çanə bıvotoş yolə həyvonımon vinde (bə yoli həyvon mı hiç vırəydəm vindənıbe). Əvon bə sahili nez oməyn bəru dəşin dəmandin de iyəndı ovədə hənək karde.Joqo çidə ki, de joqo ıştə bədənişon piyəbe sərin bıkən. Bı vaxtədə əvon joqo zik-zik kardəbin ki, mı hiç ıştə umrədəm joqo sədonım məsənıbe.

Ksuri çanə bıvotoş tarsəbe. Əqəm rosiş bıvotım azən bə dardədəbim. Çı vahiməynə həyvonon qıləy bəçəmə barkəzi tərəf sinov hardeş vindeyədə həniyən ve tarsəymon. Əmə əy vinde nəznimon, əmo ovədə vıniyə fışşəş doy qur-qur kardekuş çanə bıvotoş vahiməynə yolə həyvon beyş təxminimon kardəbe. Bəbolə Ksuri əvış qıləy yolə əslan zınəbe (bakamənhejo əslanbu) bəmış vote:

– Lobəri peğətəmon çığıno bışəmon!

– Ne Ksuri,-votıme,-lobəri peməğətəmon kəşon təmomən okəmon həniyən bə dıyo bışəmon, bəvədə əyo ome nibənen.

Im sıxanonım hələ oroxniyə nıbe ki, noməhlumə həyvoni bə bərkəz rəse i hiyə dorozi mandeş vindıme. Bəştə qıy qətdəm ki, ıştənım itkə qin kardəbe. Əncəx ha çoko bıbu ojnən bə kəyut dəşim çoknə ki, tifanqım peqəte otəşım doy. Həyvon bəpeş oqardəy bə sahili tərəf sinovış harde. Çı tifanqi sədoku sahilədə ros əbıə vəhşiyə sədon bə sə dəğande mumkun ni. Joqo çidə ki, çımrəy həyvonon ıştə umrədə tifanqə sədoşon məsəni. Iyo şanqone bə hışk beşeyo fik kardeyən joqo lozim ni. Bə ruj beşe curuət karde mumkun bəbebu? Imi əmə ıştənən zındənıbimon. Bə vəhşiyə insonon das dəqıne, pələnq iyən bə şiri pəncə dəşe kamə tars nıbe.

Əmo çoknə bedə-bıbu iyo yaən co vırədə çəmə bə sahil beşemon lozime, çunki i tılə şinə ovımon mandənıbe. Ksuri, əqəm əy va bıdom çı tənıskə tərəfo sinov bakarde bə kəno bebəşe ov pəydo bəkarde, votışe. Mı ojnən əncəx əy şe piyeş xəbə seyədə, bəçımı qoroş ıştə əbədiyə sədağəti nişoədə qıləy cəvobış doy:

– Əqəm əyo vəhşiyə inson bıbu mıni baharden, əmo tı səlomət bəmandeş.

– Isət ki joğoy, Ksuri,-votıme,-bəvədə dıkəsən bışəmon, əqəm bə vəhşiyə insonon ros boəmon əvoni bəkıştemon, bəvədə nə tıni baharden, nəən mıni!

Mı bəyım suxari de çəxrim doy. Peşoən ıştə barkəzım çı fəhləkə jiyo nımandə qıləy dərəcədə bə sahili nezım barde, dıştənımon dıqlə tifanq iyən dıqlə ovə quləmon peqəte ıştənımon bə ov şodoy. Bə sahil bə tənıskə tərəf dəmandimon sinov harde.

Mı çı ru jinə tərəfo çı vəhşiyon de lotkon hıcum kardekuşon tarsəym, çı sahiliku diyəro be, ıştə barkəzi çı çəşo qin nıkardem pidəbe. Əmo Ksuri qıləy nezə vırədə çı sahiliku i mili məsafədə ovə vırəş pəydo kardeku ovə qulonış peqəte əyo şe berdəm çəy dasədə ovə ğabon bəçımı tərəf tıleş vindıme. Çəy vəhşiyon səmandəbun? Çı vəhşiyə həyvononku tarsəbu? Bo mudafiə kardeyo tıləym. Nez omeyədə, çəy duşiku çı şey ehaştə bem vinde. Məhlum be ki, bəçəmə həvuşon əmandə qıləy həyvonış kıştəbe. Əncəx ım çəmə həvuşon ranqədə nıbe, lınqonışən ve dıroz be. Çı joqo qıləy mıvəffəğiyyətku əmə ha dıkəsonən şo bimon. Çı jə həyvoni qujdən çanə bıvotoş ləzətin beşe. Əmo sof bəçəmə ve şo be səbəb çı Ksuri şinə ov pəydo kardeş be.

Gulonımon pur karde, çı həvuşi qujdədən qıləymoni ğonəğlığ duz karde. Peşoən iyo çı hiç qılə insoni əsər-əloməti nıvindımone bo şeyo hozıbimon.

Çı ru qəviku beşə bəpeştən, çan kərəyi bo şinə oviyo bə hışk beşimon. İ kərə maştə rəbədə çı qıləy yolə barzə vıni navədə ıştəni muhafizə kardeyo lobərımon eğande, çı ovi rosbe çəş kardəbimon. Berdəm çəşonış çımısə fiz əvində Ksuri dəmande hosə-hosə joqo vote:

Diyəbıkən, bı təpədə qıləy çoknə yolə həyvone hıtə. Əv, ısət, bərk hıtə. Çanə ki, əv pebəni çığıno şe lozime.

Mı bəçəy nişon doə tərəf diyəkardeyədə həğiğətdən qıləymi dəhşətinə həyvon vinde. Əv, çanə bıvotoş qıləy yolə sırribe. Iştənən bə sahili nezi əbıə çı qıləy təpə soğonədə hıtəbe.

– Guş eğand Ksuri,-votıme, bə kəno beşi iyən əy şiko bıkə.

Əv tarsəy:

– Mı əy bıkıştım? Əv ki mıni bəjiye-bəjiye ebəbarde.

Mı həni hiç sıxani nıvotəy bəy sədo nıkardem dasparde; peşoən ıştə tifanqonımon həməm peqəte (se qıləy tifanqımon hesbe). Lap bə yolə qıləy lulə çı qullə əvəzədə dı poə sılf lozim əbıə ğədərədə seçmə iyən borutım ekarde. Əmo bə dıminə yolə qullə, bə seminən penc qılə qədə qullonım noy. De iminə vəhşiyə həyvonım bə nişon qəte ğandıme. Mı çəy səm bə nışon qətəbe, əmo əv, dıştə pencəş ıştə çonəş edoəbe, joqo qıləy holədə hıtəbe ki, qullə çəy zınosə bəpe qıne çəy astəş arışte. Dıştə sədoyi bə sahat pebe, ojnən bəzəmin qıni; peşo ojnən pebe dəmande tıle.

Əv, ıştə umrədəm nıməsə de qıləy sədo dəmande burrə doy bə sahili dorozi tıle. Bəçəy sə jem nızneyku itkə bevəc bim. I dəğə dənıvarde de dıminə tifanqi bə tılə həyvonim otəş doy. Bı səfə ıştə piyə vırəkum jəbe. Əy, hiç sədoy nıkardəy bə zəmin qıni dəmande con doy. Bımədə Ksuri bə curuət oməy, bə sahil beşeyo iznış piyəy.

– Çok, bışi,-votıme. Bə ov eqıni; i dasədəş tifanq qətəbe, de i dasi bə sahili tərəf sinovış harde. Bə zəmin doroz əbıə həyvoni rəsəy tifanqi luləş bə çəy quşış dəğande iyən ğandışe çəy nəfəsış bıriy.

Bə joqo qıləy həyvoni ğələbə karde həlbəttə qıləy çokə ko be. Əmo çəy qujd hardənin nıbe qoroş çı se atım boruti bə hədər şeyo həyf-doğ kəşedəbimon. Əmo Ksuri çoknə bedə-bıbu çəyku istifodə kardeş pidəbe. Bə barkəz oqardə bəpeştə mıkuş təvə piyəy.

– Bo çiçiyoy?-xəbəm səy.

– Çı həyvoni səy obıriyəninim,-votışe. Əmo çəy səş bıre nızınəy çəy pəncəş varde. Im çı qıləy yolə şiri lınq be. Pəncəm vindeyədə, çəy pus bakam bəvəc ome fikım karde. Mı əy çı kom tərəfo pus kardeş, zındənıbim. Ksuri çımısə zirək beşe. Əmo az bəy har curi koməq əti kardəbim. I ruj bədırısi kulşiyəymon. Oxoədə pusımon karde vardımone çı kəyuti bonisəmon peğande. Əv, dı ruj çı həşi yiyo mande təmiz hışk bə bəpeştə vardıme çı noli əvəzədə ıştə hıtəvırədəm oğande.

Çı anə mandə bəpeştə, əmə da-donzə ruj bə cənubi tərəf şimon. Çəmə azuğə ruj-bə-ruj oşkorə bəkam beyo dəmandimon ğənoət karde. Əmo bə kəno əncəx çəmə şinə ov orəxeyədə beşedəbimon. Mı bə Avropa qəmiyon de ros ome umi Ğambii, Seneğal, Havzə vıni yaən çı har qıləy co ru ətrofədə əbıə bə qıləy mandə vırə şe cəzirə pəydo karde, yaən zənciyon (siyo ğulon) dasədə tələf bəninbim. Co çorəş ni. Mı zındəbim ki, cəmi Avropa qəmiyon bə har tərəfi bışunən, bə Gviney sahilon, bə Brazilya yaən bə Miyonə Hindiston ojnən çı Havzə vıni toniku dəvardəninin. Iqlə sıxan-ya bo Avropa qəmiyon pəydo karde, yaən bo tələf beyom sıxan doəbe.

Bəpe votəy təki da rujən bə sahili dorozi bəştə romon dəvom karde. Oxoədə mı bo insonon nıjiyə vıron de inson jiyə vıron əvəz beş hissım karde. Dı-se vırədə sahilədə odəmımon vinde. Əvon həmə siyo bədəninə quciliyə odəmon bin. I kərə bə hışk beşe çəvon toniku şem piyəy. Əmo çımı ağılmandə məsləhət əkəm Ksuri bimi rozi nıbe.

– Niyəpiyəşe,-votışe.

Əmo mı ha çoknə bedə-bıbu de vəhşiyon bo sıxan kardeyo qəmim bə kəno nez barde. Əvon çımı fiki bə sə dəqınin. Əvon be siloh bin. Əmo çı qıləy dasədə doroz, nozıkə ləvoy hesbe; Ksuri çı ləvo (mizrağ) nizə beş iyən çı siyo ğulon dəy çanə diyəro bıbu çok yeşon qəpış yəy. Bəçəy qoroşən mı qəmim bəpeş roməy əncəx de işoron dəmandim qəp je, sıftə kərədə çəmə vəşyən beku əvonım bə sə dəğande. Əvon bə sə dəqınin. Bəmə cəvob doe işorədə bəməno xorək vardeyo çəmə qəmi oqəteyo məhlumatışon doy. Tosə çımı vokıri nışande çəvonədə dı kəs bə vırəy tıləyn. Nim sahaf dəvardənıbe ki, çı qıləy duşisə dı yolə poə hışk kardə qujd, çə qılə kulisə qıləy quşə oqardəyn. Im yəğin ki, təxıl bənine. Peşo məhlum be ki, bəvıronədə bə təxıli əmandə qıləy şey. Əmə ımoni de qıləy yolə roziyəti bo ğəbul kardeyo hozı bimon.