Алымкан Карбозова - Таза ойлор Так сөздөр

Адегенде кыйналдым. өмүр бою көнүмүш ойлордон арылуу кыйын болду, бирок , “ооруп жүргөн жакшыбы” же “эки жыл” аракет жасап, ден соолукту оңдоп, жашоомду жеңилдеткеним жакшыбы?– деп, оюм тескери жагына бурулганда эле өзүмө өзүм суроо берем. Жалкоолугум менен күрөшөм. Жиним келип жаман ойлор келе баштаганда өзүмө өзүм түшүндүрөм.

Танда?! “ Өлүм баардык адамдын башында бар. Ал сенин колуңду созгончолук аралыкта турат. “Жаным кыйналды” – деп айттың өлүм жаныңда заматта пайда болот. Каала ооруп, эртерээк өл, же өзүңдү өзүң кайрадан тарбиялап, жашооңду узарт, бул дене менен жашоого бир келесиң”, – деп өзүмдөн өзүм отчет сурап, кайратыма кирип, “чечим” чыгарып, “жашоону” кайра тандайм.

Мен жашагым келет! Мен жашагым келет! Мен жашагым келет! – деген жыйынтыкка келген чечимим мени жашоого алдыга жылдырып келе жатат!

Кээде “сени кыйнаган ким?”, “сени ким кой деди?”, “баарын жасаган өзүңсүң да” – деп күзгүгө карап, өзүмдү өзүм күлдүрчүмүн. Ооруп, кыйналган жакшыбы же кубанып жашаган жакшыбы? – деп күзгүдөн өзүмдү көргөндө суроо берем.

Албетте, бул нерсе менин “жан дүйнөмдүн өзгөрүшүнө түрткү берип, мен үчүн чоң төңкөрүш болду”. Эки жыл ичинде сүйлөгөн сөздөрүм өзгөрдү, а бирок ойдун өзгөрүүсү көп убакытты алып жатат, себеби, ар бир ойдун башаты, уюткусу ар бир клеткада жайгашкандыгын түшүндүм.Ошентип, өзүмдү өзүм талыкбастан “өзүм менен өзүм иштөөгө” эмгектенүүгө үйрөттүм. Төрт жыл өткөндөн кийин оюмда болгон нерселердин өзгөргөнүн сезе баштадым. Себеби, жашоом мен каалаган жагына өзгөрө баштады. Көзүм көргөн нерселер, жашоого керек кээ бир нерселерим ишке аша баштады. Жаным тынчтана баштады. Ошондон кийин менин эмгегим текке кетпегенин түшүндүм. Жасаган эмгегимдин мөмөсүн ала баштадым. “Күмөнсүрөөм” – “ишенимге” айлана баштады. Ал эми, “өзүңө өзүң ишенүү” белди бекемдеп, омуртканы түздөйт. Ал чындык.

Азыр болсо келген ойлорду филтирлеп, керек эмесин кабыл албоону үйрөнүп , тажрыйба кылып жүрөм же болбосо келген ойлорду жөн кана үстүртөн карай турган болдум. Ой деген ой да ал тынымсыз келип кете бере турган нерсе.

Ошентип, убакыт өткөн сайын “жан дүйнөмө” – позитивдүү сөздөр сиңип, бүгүнкү күндө автоматтык түрдө турмушта пайдаланып жүрөм. Көзүмө жаман нерселер эмес, жакшы нерселер көрүнө баштады. Себеби, “көңүлүм” мени сүйүндүрө турган нерселерге бурула баштады. Ой бузулганда, мурдагыга караганда тезирээк башка, мен каалаган нукка бурууну үйрөндүм, мүмкүн болушунча келген ойду ойлонуп пластинка сыяктуу айлантпоо керектигин терең түшүндүм. Албетте, эң сонун нерсе, келген ойду жөн кана кармап калбай кое берүү экендигин түшүндүм.. Ой келди, керектүү идеяны кабыл алдым, калганы токтоосуз кетти! Керексизин мээде айлантып ойлонбостон жөн кана коюп жибере турган болдум.

Айрыкча, өткөн күндү, кечинде уйкуга кетээр алдында бир сыйра элестетип, териштирип, керексизин, жагымсызын, кечирип, кечирим суроо менен денени бошотуп, жыйрылган булчуңдарымды жазып терең уйкуга кетүү адатка айланып бара жатат. Жатаарда телевизорду көрбөөгө аракет кылам. Ал нерсе өзүңдүн маалымат талааңды тазалоо үчүн керектигин бара-бара түшүндүм.

Мүмкүн болушунча денемди бош таштап уктоо, дененин түнү бою кайрадан өз калыбына келүүсүнө шарт түзөт, ден соолуктун өз нугуна келүүсүнө жардам берет. Дем алууну калыптандырат.

“Кечинде уйкуга жатаарда – “өзүмдү бактылуу сезип”, эртең менен “өзүмдү бактылуу сезип” турууну күнүгө ниет кылам”, себеби, аны канчалык көп жасасаң ошончолук өзүңө өзүң ыраазы болуп, кубанычтын сезими көбөйөт. Ал эми кубаныч, мелатониндин денеге өз нормасында бөлүнүп чыгуусуна шарт түзөт. Адам кубанган сайын кан айлануу жакшырат. Кан айлануу жакшы болсо адам өзүн чыйрак алып жүрөт.

Адамдар жөнүндөгү ойлорумду өзүмө жаккандай ага да мага да “кубаныч сезим” тартуулагандай ойлойм. Жыйынтыгында, адамдар мага ошондой мамиле жасап, мен өзүмдү жакшы сезе баштадым.

Ар бириңерге суроо???

Жашооңдо эмнелер болуп жатат, кандай жашоодо жашап жатасың? Ал күндөн күнгө көбөйүп күчөп бара жатабы же …? Аны күчтөндүрүп жаткан ар бир адам өзүбү же…? Күнөөлүүнү издеш керекби же…? Өч алуу, уят, күнөөлүү сезим, таарынуу, бийлик талашуу, ашыкча намыс ж.б.у.с. денеге пайдабы же зыянбы?

Ооруунун, аба ырайынын өзгөрүүсүнүн башаты кимден башталышы мүмкүн?

Менин айтайын дегеним “ойдун тазалыгы”, “сөздүн тазалыгы” жөнүндө, бул дагы ден соолуктун эң негизги – булагы, дененин жеген тамагы, өткөргөн нуру. Эмесе, ушул эки сөз жөнүндө кыскача түшүнүк бере кетейин.

–

[А] Аалам ден соолуктун толкунунда! Аалам өз жайында!

ОЙДУН ДЕН СООЛУККА ТИЙГИЗГЕН ТААСИРИ ЖӨНҮНДӨ

“Мен кандай ойлонсом, өзүмдү ошондой сезем, азыр дал ошондой жашоодо жашайм!”– бул чындык.

Ой күлүк. Ойсуз жашоо кыйын. Ар бир адам басса турса ой менен басып, ой менен сүйлөшүп, сезиминде сезип жашайт. “Ой” – ар бир адамдын күнүмдүк жашоо турмушундагы куралы. Аны турмушка ашырып, секунда сайын тамактандырып турган адам “сезими”, “сөздөрү”. Ойдун “оң” жана “терс” жагы бар. Жамандыгына алсаң ой менен учу кыйры түгөнгүс “терс” көрүнүшкө түшөсүң, жашооңду кыйынчылыкка учуратып, ден соолугуңду оорууга чалдыктырып, өмүрүңдү кыскарта аласың. өзүңдү, үй бүлөңдү, мамлекетиңди, бүткүл Ааламды дүрбөлөңгө саласың. Үй бүлөдөгү эле аба ырайын эмес жаратылыштын абасын бузууга чоң салымыңды кошосуң.

Ал эми, оюңду “оң” жагына бурсаң, “жоктун” каналынан “бардын” каналына автоматтык түрдө уланасың да “барды” жасап, кубанычыңды көбөйтүп, жыргал жашоо кура аласың. Өзүңдү өзүң жакшы сезе баштайсың. Ден соолугуң чыңдалып, үй– бүлөңдө бакыт, орноп, мамлекетиң өнүп өсөт, жыргал жашоонун пайдубалы түптөлүп, Ааламга кубанычтын сезимин жөнөтөсүң. Ал нерсе албетте, жаратылыштын төрт мезгилин өз калыбына келтирет. Сөз менен айтканда бул жомок сыяктуу. Бирок аны ишке ашырган адам кана бул нерсеге ишенет. Аны кантип жасоо, ал сенин турмуштук тажрыйбаңа, билимиңе жараша кана болот. Ал үчүн ишенүүң керек.

Эки вариантты тең тез эле жасоо оңойбу? Албетте жок. Бирок мүмкүнчүлүк бар.

Ар бир адам жашоодо өзүнө ыңгайлуу шартты кабыл алат жана түзөт.

Албетте, бир сөз менен айтуу жеңил, бирок, кеп аны аткарууда, ишке ашыра билгендигиңде. Ошон үчүн бул китеп аркылуу, аткаруунун үрөнүн кана себебиз. Ал эми, убакыт келгенде кандай үрөн сепкендигиңе өзүң күбө болосуң.

Жыйынтык качан болот?

Качан адам өзү менен өзү иштеп, өзүн өзү тарбиялап, өзүң каалаган “каналда”, нур толкунда ритимдүү, стабилдүү кармай алганда, өзүң жасаган ишиңе ишенгенде кана болот. Бул күнүмдүк жашоо. Ыраазылык менен кубанып жашоо. Ден соолукта жашоо. Өзүнө өзү кожоюн болуп, эмнени кааларын ачык, так, даана билип, өз эмгегине өзү ээ болуп, өзүн өзү сыйлап сүйө билгенде кана болот.