Александр Андреев - Подхватившие щит

«Никак не уменьшая героизма русских на Куликовом поле, заметим, что немаловажным для победы оказалось отсутствие в битве восьмидесятитысячного литовского войска. Ягайло опоздал к битве всего на один дневной переход. И это было не случайно. Оказывается, Олег Рязанский, которого обвиняли в измене и предательстве, с пятитысячным отрядом сумел, искусно маневрируя, задержать литовцев. Когда же литовцы отогнали Олега, битва уже закончилась».

«В лето 1353 тое же зимы месяца декабря 6 на память святого отца Николы, пресвященный Феогност митрополит постави наместника своего в епископы Алексея владыку в Володимер, а по своем животе благослови его в свое место на митрополию, и потом, погадав с сыном своим с князем Семеном и с братьею с князем Иваном и Андреем, и с бояры и с велможами, и послаша послы в Царьгород, от великого князя Дементии Давыдовичя да Юрьи Воробьев, а от митрополита Артемии Коробьин да Михайло Счербатый Гречин. Тое же лета прставися князь великий Семен Иванович, того же лета преставися митрополит Феогност, того же лета преставися князь Андрей Иванович, того же лета седе на великом княжении князь Иван Иванович.

В лето 1354 приидоша из Царяграда послове, послании князем Семеном великим и Феогностом митрополитом и принесоша грамоты царевы и грамоты патриаршии: повелено бысть владыце Алексею ити в Царьгород на митрополию, на свершение святительства, прияти поставление от тоя самыя единоя соборныя апостольскиа церкви, от святого патриарха и вселенского собора. Того же лета поиде Алексеи владыка в Царьгород на митрополью.

Того же лета в Петрово говенье месяца июня в 22 день взяша рязанци Лопасну; князь великии олег, еще тогда млад, был со своими рязанци; и Лопастну взяша и наместника изнимаша Михаила Александровичя, и поведоша его на Рязань и биша его, и многы пакости створиша ему, и потом едва выкупили его. Тое же зимы по Крещении выиде из орды князь Иван Иванович, и вси князи Рустии были тогда в орде. Тое же зимы князь Иван Иванович седе на великом княжении в Володимери месяца марта в 25 день.

В лето 1355 Алексеи владыка поставлен бысть митрополитом на всю Русскую землю, а на осень ту выиде из Царягорода.

В лето 1356 осени Алексеи, митрополит всеа Руссии, ходил в другие в Царьгород, тое же осени море перешел, а на Русь прииде.

В лето 1357 прииде из орды посол от царици Таидулы к пресвященному Алексею митрополиту звать его в орду да посетит ее на здравие, и поиде митрополит в орду месяца августа в 18. Того же дни зажглася свеча сама по себе в церкви святыя Богородица на Москве; митрополит же Алексеи, пев молебен с всем клиросом и свечу ту раздробив, и роздасть народу на благословение, а сам поиде в орду. Милостию же Божиею вборзе из орды отпущен бысть, занеже замятня ся доспела в орде. Того же лета Бердибек царь в орде седе на царство.

В лето 1358 зимой по Крещении пресвященный Алексеи митрополит поехал в Киев.

В лето 1359 преставися князь Иван Иванович. Того же лета ходили все князи в Орду.

В лето 1360 убиша царя Навруза и по нем седе Ходирь и да княжение великое Дмитрию Суздальскому. Тое же лета приеха ис Киева на Москву пресвященный Алексеи митрополит.

В лето 1361 убиша царя Ходыря.

В лето 1362 ходиша князи Московские Дмитрии Иванович, Иван Иванович, Володимир Ондреевич на Галицкого князя Дмитрия, и прогнаша и а княгиню полониша. Тое же зимы князь Дмитрий Иванович сгони с Переяславля Дмитрия князя Суздальского, а сам седе на великом княжении.

В лето 1363 князь Дмитреи Иванович ходи ратью на Суждаль.

В лето 1365 пресвященныи Алексеи, митрополит всеа Русии, заложи церковь камену во имя святого архангела Михаила, единого лета и почата и кончана и священа бысть.

Того же лета Тагаи, князь ординский, из Наручади прииде ратью Татарскою на Рязанскую землю и пожже град Переяславль. Князь же великий Олег Рязанский с своею братью с Володимером Пронским и Титом Козельским, собрав силу свою, и иде вслед его, и постиже его на месте, нарицаемем под Шишевским лесом, на Воине, и бысть им бой, брань зело люта и сеча зла, и поможе Бог великому князю Олгу, и братии его Пронскому и Козельскому, а Тагаи в мале дружине едва убежал.

В лето 1368 князь Андреи Полоцкий воева Хорвань да Родие, а князь Володимер Андреевич прише ратью взял Ржеву.

Того же лета князь великии Дмитреи Иванович Московский и Алексеи митрополит князя великого Михаила Александровича Тверского зазвавши его любовия на Москву, и бысть им суд на третеи день на миру, а в правде, да его изымали, а что было бояре его около его, тех всех поимали, разно разведоша, и быша вси в нятьи, и держаша их в истоме, а князь Михайло тогды сидел на Гавшине дворе. И потом не за долго время внезапу приидоша от орды Татарове Корач; они же подумавше и тако попускаша их в свояси. Князь же Михайло сжалися вельми и о том негодоваше, и не любо ему бысть, и положи то в измену; и про то имеаше розмирие к великому князю, пачеже на митрополита жаловашеся, к нему же веру имел паче всех, яко по истине святителю. Того же лета князь великий Дмитреи Иванович собра вои многы и посылал рать на князя великого Михаила Александровича Тверского. Князь же великии побежа в Литву к князю Олгерду, зятю своему, прося помощи себе и обороны.

Тое же осени месяца декабря Ольгерд князь Литовский и брат его Кестетеи, приходили ратью к Москве и заставу Московскую побили на Тростне, а у града у Москвы стояше три дни, и во своясы возвратившеся.

А на те ж зиме князь Володимер Ондреевич Московскый ходил в Новгород Великии Плесковичем на помощь.

В лето 1370 прииде в другий ряд Ольгерд князь Литовский в силе тяжце к Москве и стоял у города 10 ден, загородеь пожже, а города не взял. Князь же великий Дмитреи Иванович затворися во граде, а Олексеи митрополит тогды был в Нижнем Новгороде, а князь Володимер Андреевич, собрався с силою, стояше в Перемышле ополчився, а еще же и к тому же приспел князь Володимер Дмитреевич Пронский, а с ним рать князя Олга Рязанского. То же слышав Олгерд и убояся и начат мира просити и всхоче дати дщерь свою за князя Володимера Андреевича, еже и бысть.

В лето 1371 выиде из Орды князь Михайло Александрович на великое княжение и восхоте сести на столе в Володимери и не прияша его, а рекучи так – взял еси лжею великое княжение; того же лета князь великыи Дмитреи Иванович поиде в Орду. В то же время за князя Володимера Андреевича обручиша Олгердову дчерь именем Олену. Тою же осень князь великий Дмитреи Иванович выиде из Орды; на ту же зиму князь великий Дмитреи Иванович посла рать на Рязань на князя на Ольга и воеводу с ними посла князя Дмитрея Михаиловича Волынского. Князь же Олег собра воя многы, изыде против их и стретошася на Скорнищеве. Рязанци же, сурови суще, друг к другу рекоша: «не имлите с собою доспехов, ни щитов, ни копья, ниже коего иного оружиа, но токмо емлите с собою едины ужища каждо вас, имже вязати начнете москвичь, понеже суть слабы и страшливы и не крепци». И бысть им брань люта и сеча велика перед Рожеством Христовым и поможе Бог князю великому Дмитрею, а князь Олег убежал в мале дружине, и седе тогда на княженьи на Рязанском князь Володимер Пронский.