Текст Требника на церковнославянском языке

Абие же архиерей, аще приключится тамо быти, или иерей чтет молитву прощальную велегласно:

Госпо́дь Иису́с Христо́с Бог наш, и́же Боже́ственная за́поведи свя́тым Свои́м ученико́м и Апо́столом да́вый, во е́же вяза́ти и реши́ти па́дших грехи́, и от о́ных па́ки мы прие́мше вины́ то́йже твори́ти; да прости́т тебе́, ча́до духо́вное, а́ще что соде́лал [или соде́лала] еси́ в ны́нешнем ве́це во́льное или́ нево́льное, ны́не и при́сно, и во ве́ки веко́в, ами́нь.

И тако вземше мощи отходим ко гробу последующим всем людем, предыдущим же священником, и поющим:

Святы́й Бо́же: Пресвята́я Тро́ице: О́тче на́ш: и прочая.

И полагаются мощи во гроб; архиерей же, или священник, взем персть лопатою, крестовидно мещет верху мощей, глаголя:

Госпо́дня земля́ и исполне́ние ея́, вселе́нная и вси живу́щии на ней.

И посем наливает верху елей от кандила, или сыплют пепел от кадильницы, и тако покрывают яко обычно гроб, приглаголемым тропарем: Со ду́хи пра́ведных: и прочим всем. Зри выше.

И отпуст.

Молитва разрешительная от иерея над преставльшимся чадом чтомая.

Госпо́дь наш Иису́с Христо́с, Боже́ственною Свое́ю благода́тию, да́ром же и вла́стию, да́нною святы́м Его́ ученико́м и Апо́столом, во е́же вяза́ти и реши́ти грехи́ челове́ков (рек им: приими́те Ду́ха Свята́го, и́хже отпустите́ грехи́, отпу́стятся им; и́хже удержите́, удержа́тся; и ели́ка а́ще свя́жете и разрешите́ на земли́, бу́дут свя́зана и разреше́на и на Небеси́); от о́нех же и на ны друг другоприима́тельно прише́дшею, да сотвори́т чрез мене́, смире́ннаго, проще́но и сие́ по ду́ху ча́до (имярек) от всех, ели́ка я́ко челове́к согреши́ Бо́гу сло́вом или́ де́лом, или́ мы́слию, и все́ми свои́ми чу́вствы, во́лею или́ нево́лею, ве́дением или́ неве́дением; а́ще же под кля́твою или́ отлуче́нием архиере́йским или иере́йским бысть, или а́ще кля́тву отца́ своего́ или́ ма́тере своея́ наведе́ на ся, или́ своему́ прокля́тию подпаде́, или́ кля́тву преступи́, или́ ины́ми не́киими грехи́ я́ко челове́к связа́ся, но о всех сих се́рдцем сокруше́нным пока́яся, и от тех всех вины́ и ю́зы да разреши́т его́ [или ю́]; ели́ка же за не́мощь естества́ забве́нию предаде́, и та вся да прости́т ему́ [или ей], человеколю́бия ра́ди Своего́, моли́твами Пресвяты́я и Преблагослове́нныя Влады́чицы на́шея Богоро́дицы и Присноде́вы Мари́и, святы́х сла́вных и всехва́льных Апо́стол, и всех святы́х, ами́нь.

Ведати подобает, яко аще кто преставится на святую Пасху, или в который–либо день Светлыя недели до недели Фомины, мало что от обычнаго усопших пения поется, величества ради и чести веселаго праздника Воскресения: веселия бо и радости, а не сетования есть праздник, и яко вси о Христе воскресшем в надежде воскресения и жизни вечныя умирающии, Христовым воскресением от печальных мiра сего на веселая и радостная преставляются, воскресным пением над усопшим церковь возвещает.

Пришед убо священник с клирики своими в дом, в немже умершаго тело лежит, взем на ся епитрахиль и фелонь, и покадив мощи, обычно начинает:

Диакон: Благослови́, влады́ко.

Священник: Благослове́н Бог наш всегда́, ны́не и при́сно, и во ве́ки веко́в.

Клир же поет: Ами́нь. Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в. [Трижды на глас 5].

Таже священник глаголет обычныя стихи:

Первый стих: Да воскре́снет Бог, и расточа́тся врази́ Его́, / и да бежа́т от Лица́ Его́ ненави́дящии Его́.

И на кийждо стих мы поем тропарь: Христо́с воскре́се: весь по единожды.

Вторый стих: Я́ко исчеза́ет дым, да исче́знут, / я́ко та́ет воск от лица́ огня́. Христо́с воскре́се: единожды.

Третий стих: Та́ко да поги́бнут гре́шницы от Лица́ Бо́жия, / а пра́ведницы да возвеселя́тся. Христо́с воскре́се: единожды.

Четвертый стих: Сей день, его́же сотвори́ Госпо́дь, / возра́дуемся и возвесели́мся в онь. Христо́с воскре́се: единожды.

Слава:Христо́с воскре́се: единожды.

И ныне:Христо́с воскре́се: единожды.

Таже священник поет вышшим гласом: Христо́с воскре́се из ме́ртвых, / сме́ртию смерть попра́в.

Лик: И су́щим во гробе́х живо́т дарова́в.

Поющим же сия священник кропит священною водою тело умершаго, и ковчег его извне и извнутрь, и абие е влагают в нем.

Скончану же пению, глаголет диакон ектении обычныя усопшим:

Диакон: Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.

Лик: Го́споди, поми́луй, трижды.

Еще́ мо́лимся о упокое́нии души́ усо́пшаго раба́ Бо́жия [или усо́пшия рабы́ Бо́жия], имярек, и о е́же прости́тися ему́ [или ей] вся́кому прегреше́нию, во́льному же и нево́льному.

Лик: Го́споди, поми́луй, трижды.

Я́ко да Госпо́дь Бог учини́т ду́шу его́ [или ея́], иде́же пра́веднии упокоя́ются.

Лик: Го́споди, поми́луй, трижды.

Ми́лости Бо́жия, Ца́рства Небе́снаго и оставле́ния грехо́в его́ [или ея́], у Христа́, безсме́ртнаго Царя́ и Бо́га на́шего, про́сим.

Лик: Пода́й, Го́споди.

Диакон: Го́споду помо́лимся.

Лик: Го́споди, поми́луй.

Священник же чтет молитву сию тайно:

Бо́же духо́в и вся́кия пло́ти, сме́рть попра́вый и диа́вола упраздни́вый, и живо́т мiру Твоему́ дарова́вый: Сам, Го́споди, упоко́й ду́шу усо́пшаго раба́ Твоего́ [или усо́пшия рабы́ Твоея́] имярек, в ме́сте све́тле, в ме́сте зла́чне, в ме́сте поко́йне, отню́дуже отбеже́ боле́знь, печа́ль и воздыха́ние. Вся́кое согреше́ние, соде́янное им [или е́ю] сло́вом, или́ де́лом, или́ помышле́нием, я́ко благи́й человеколю́бец Бог, прости́, я́ко несть челове́к, и́же жив бу́дет и не согреши́т. Ты бо Еди́н кроме́ греха́, пра́вда Твоя́ пра́вда во ве́ки, и сло́во Твое́ и́стина.

Возглас: Я́ко Ты еси́ воскресе́ние и живо́т, и поко́й усо́пшаго раба́ Твоего́ [или усо́пшия рабы́ Твоея́] имярек, Христе́ Бо́же наш, и Тебе́ сла́ву возсыла́ем, со безнача́льным Твои́м Отце́м, и пресвяты́м и благи́м и животворя́щим Твои́м Ду́хом, ны́не и при́сно, и во ве́ки веко́в.

Лик: Ами́нь.

По возгласе же поем:

Воскресе́ние Христо́во ви́девше, / поклони́мся Свято́му Го́споду Иису́су, / еди́ному безгре́шному, / Кресту́ Твоему́ покланя́емся, Христе́, / и свято́е Воскресе́ние Твое́ пое́м и сла́вим: / Ты бо еси́ Бог наш, / ра́зве Тебе́ ино́го не зна́ем, / и́мя Твое́ имену́ем. / Прииди́те вси ве́рнии, / поклони́мся Свято́му Христо́ву Воскресе́нию: / се бо прии́де Кресто́м ра́дость всему́ ми́ру. / Всегда́ благословя́ще Го́спода, / пое́м Воскресе́ние Его́: / распя́тие бо претерпе́в, / сме́ртию смерть разруши́.

Диакон: Прему́дрость.

Лик: Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в. Трижды.