Текст Требника на церковнославянском языке

Поемым же сим стихирам, бывает обычное целование усопшаго, глаголюще: Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в.

По стихирах же диаконства обычная усопших с молитвою, яже велегласно от архиереа, или священника, чтется близ мощей.

Посем диакон глаголет ектению усопшим:

Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.

Лик: Го́споди, поми́луй, трижды.

Еще́ мо́лимся о упокое́нии души́ усо́пшаго раба́ Бо́жия [или усо́пшия рабы́ Бо́жия], имярек, и о е́же прости́тися ему́ [или ей] вся́кому прегреше́нию, во́льному же и нево́льному.

Лик: Го́споди, поми́луй, трижды.

Я́ко да Госпо́дь Бог учини́т ду́шу его́ [или ея́], иде́же пра́веднии упокоя́ются.

Лик: Го́споди, поми́луй, трижды.

Ми́лости Бо́жия, Ца́рства Небе́снаго и оставле́ния грехо́в его́ [или ея́], у Христа́, безсме́ртнаго Царя́ и Бо́га на́шего, про́сим.

Лик: Пода́й, Го́споди.

Диакон: Го́споду помо́лимся.

Лик: Го́споди, поми́луй.

Священник глаголет молитву сию велегласно:

Бо́же духо́в и вся́кия пло́ти, сме́рть попра́вый и диа́вола упраздни́вый, и живо́т мiру Твоему́ дарова́вый: Сам, Го́споди, упоко́й ду́шу усо́пшаго раба́ Твоего́ [или усо́пшия рабы́ Твоея́] имярек, в ме́сте све́тле, в ме́сте зла́чне, в ме́сте поко́йне, отню́дуже отбеже́ боле́знь, печа́ль и воздыха́ние. Вся́кое согреше́ние, соде́янное им [или е́ю] сло́вом, или́ де́лом, или́ помышле́нием, я́ко благи́й человеколю́бец Бог, прости́, я́ко несть челове́к, и́же жив бу́дет и не согреши́т. Ты бо Еди́н кроме́ греха́, пра́вда Твоя́ пра́вда во ве́ки, и сло́во Твое́ и́стина.

И возглашает: Я́ко Ты еси́ воскресе́ние и живо́т, и поко́й усо́пшаго раба́ Твоего́ [или усо́пшия рабы́ Твоея́] имярек, Христе́ Бо́же наш, и Тебе́ сла́ву возсыла́ем, со безнача́льным Твои́м Отце́м, и пресвяты́м и благи́м и животворя́щим Твои́м Ду́хом, ны́не и при́сно, и во ве́ки веко́в.

Лик: Ами́нь.

Посем диакон: Прему́дрость.

Клир поет: Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в. [Трижды.]

И абие настоятель глаголет отпуст:

Христо́с, воскресы́й из ме́ртвых, сме́ртию смерть попра́вый и су́щим во гробе́х живо́т дарова́вый, и́стинный Бог наш, моли́твами Пречи́стыя Своея́ Ма́тере и всех святы́х Свои́х, ду́шу от нас преста́вльшагося раба́ Своего́ [или преста́вльшияся рабы́ Своея́] имярек, в селе́ниих святы́х всели́т, и с пра́ведными причте́т и нас поми́лует, я́ко Благ и Человеколю́бец.

Лик: Ами́нь.

Таже крест возвышая, глаголет:

Христо́с воскре́се. [Трижды].

Мы же отвещаем:

Вои́стину воскре́се. [Трижды].

Таже поем конечное: Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в. [Трижды].

И по нем архиерей, или начальствуяй иерей сам глаголет трижды:

Ве́чная твоя́ па́мять, достоблаже́нне и приснопа́мятне бра́те наш. (Трижды).

Или диакон возглашает: Во блаже́нном успе́нии ве́чный поко́й пода́ждь, Го́споди, усо́пшему рабу́ Твоему́ [или усо́пшей рабе́ Твое́й] имярек, и сотвори́ ему́ [или ей] ве́чную па́мять.

Таже певцы поют трижды: Ве́чная па́мять.

Абие же архиерей, аще приключится тамо быти, или иерей чтет молитву прощальную велегласно:

Госпо́дь Иису́с Христо́с Бог наш, и́же Боже́ственная за́поведи свя́тым Свои́м ученико́м и Апо́столом да́вый, во е́же вяза́ти и реши́ти па́дших грехи́, и от о́ных па́ки мы прие́мше вины́ то́йже твори́ти; да прости́т тебе́, ча́до духо́вное, а́ще что соде́лал еси́ в ны́нешнем ве́це во́льное или́ нево́льное, ны́не и при́сно, и во ве́ки веко́в, ами́нь.

И тако вземше мощи отходим ко гробу, предыдущим же священником и всему клиру, поющим: Христо́с воскре́се:

У могилы, после опущения в нее останков усопшаго, и предания их земле, якоже указася в чине обычнаго погребения мiрских человек совершается литиа.

Клир поет тропари сия. Глас 4:

Со ду́хи пра́ведных сконча́вшихся, / ду́шу раба́ Твоего́ [или рабы́ Твоея́], Спа́се, упоко́й, / сохраня́я ю́ во блаже́нной жи́зни, / я́же у Тебе́, Человеколю́бче.

В поко́ищи Твое́м, Го́споди, / иде́же вси святи́и Твои́ упокоева́ются, / упоко́й и ду́шу раба́ Твоего́, / я́ко еди́н еси́ Человеколю́бец.

Слава:Ты еси́ Бог соше́дый во ад, и у́зы окова́нных разреши́вый, / Сам и ду́шу раба́ Твоего́ упоко́й.

И ныне:Еди́на чи́стая и непоро́чная Де́во, Бо́га без се́мене ро́ждшая, / моли́ спасти́ся души́ его́ [или ея́].

Диакон глаголет:

Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.

Лик: Го́споди, поми́луй, трижды.

Еще́ мо́лимся о упокое́нии души́ усо́пшаго раба́ Бо́жия [или усо́пшия рабы́ Бо́жия], имярек, и о е́же прости́тися ему́ [или ей] вся́кому прегреше́нию, во́льному же и нево́льному.

Лик: Го́споди, поми́луй, трижды.

Я́ко да Госпо́дь Бог учини́т ду́шу его́ [или ея́], иде́же пра́веднии упокоя́ются.

Лик: Го́споди, поми́луй, трижды.

Ми́лости Бо́жия, Ца́рства Небе́снаго и оставле́ния грехо́в его́ [или ея́], у Христа́, безсме́ртнаго Царя́ и Бо́га на́шего, про́сим.

Лик: Пода́й, Го́споди.

Диакон: Го́споду помо́лимся.

Лик: Го́споди, поми́луй.

Священник глаголет молитву сию:

Бо́же духо́в и вся́кия пло́ти, сме́рть попра́вый и диа́вола упраздни́вый, и живо́т мiру Твоему́ дарова́вый: Сам, Го́споди, упоко́й ду́шу усо́пшаго раба́ Твоего́ [или усо́пшия рабы́ Твоея́] имярек, в ме́сте све́тле, в ме́сте зла́чне, в ме́сте поко́йне, отню́дуже отбеже́ боле́знь, печа́ль и воздыха́ние. Вся́кое согреше́ние, соде́янное им [или е́ю] сло́вом, или́ де́лом, или́ помышле́нием, я́ко благи́й человеколю́бец Бог, прости́, я́ко несть челове́к, и́же жив бу́дет и не согреши́т. Ты бо Еди́н кроме́ греха́, пра́вда Твоя́ пра́вда во ве́ки, и сло́во Твое́ и́стина.

Возглас: Я́ко Ты еси́ воскресе́ние и живо́т, и поко́й усо́пшаго раба́ Твоего́ [или усо́пшия рабы́ Твоея́] имярек, Христе́ Бо́же наш, и Тебе́ сла́ву возсыла́ем, со безнача́льным Твои́м Отце́м, и пресвяты́м и благи́м и животворя́щим Твои́м Ду́хом, ны́не и при́сно, и во ве́ки веко́в.

Лик: Ами́нь.

Диакон: Прему́дрость.

Лик: Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в. [Трижды].

Священник: Сла́ва Тебе́, Христе́ Бо́же, упова́ние на́ше, сла́ва Тебе́.

Лик: Сла́ва, и ны́не: Го́споди, поми́луй, трижды. Благослови́.

И абие бывает от священника отпуст обычный:

Воскресы́й из ме́ртвых, Христо́с, и́стинный Бог наш, моли́твами Пречи́стыя Своея́ Ма́тере, преподо́бных и богоно́сных оте́ц на́ших, и всех святы́х Свои́х, ду́шу от нас преста́вльшагося раба́ Своего́ [или преста́вльшияся рабы́ Своея́] имярек, в селе́ниих святы́х всели́т, и с пра́ведными причте́т, и нас поми́лует, я́ко Благ и Человеколю́бец.