Александр Гопаченко - Молитвенник

Л. Господи, помилуй (трижды).

Д. Еще молимся о блаженных и приснопамятных, святейших патриарсех православных, и благочестивых царех, и благоверных царицах, и создателех святаго храма сего (святыя обители сея), и о всех преждепочивших отцех и братиях, зде лежащих и повсюду православных.

Л. Господи, помилуй (трижды).

Д. Еще молимся о плодоносящих и добродеющих во святем и всечестнем храме сем, труждающихся, поющих и предстоящих людех, ожидающих от Тебе великия и богатыя милости.

Л. Господи, помилуй (трижды).

Св. Яко милостив и человеколюбец Бог еси, и Тебе славу воссылаем, Отцу и Сыну и Святому Духу, ныне и присно и во веки веков.

Л. Аминь.

Если будет прошение о усопших, диакон или священник читает:

Д Помилуй нас, Боже, по велицей милости Твоей, молим Ти ся, услыши и помилуй.

Л. Господи, помилуй (трижды).

Д. Еще молимся о упокоении душ усопших рабов Божиих (имя), и о еже простится им всякому прегрешению, вольному же и невольному.

Л. Господи, помилуй (трижды).

Д. Яко да Господь Бог учинит души их, идеже праведнии упокояются.

Л. Господи, помилуй (трижды).

Д. Милости Божия, Царства Небеснаго, и оставления грехов их, у Христа бессмертнаго Царя и Бога нашего просим.

Л. Подай, Господи.

Д Господу помолимся.

Л. Господи, помилуй.

Боже духов и всякия плоти, смерть поправый и диаволаупразднивый и живот миру Твоему даровавый, Сам, Господи, упокой души усопших раб Твоих (имена) (раба Твоего, рабы Твоея) (имя) в месте светле, в месте злачне, в месте покойне, отнюду же отбеже болезнь, печаль и воздыхание; всякое согрешение содеянное ими (им, ею) словом, или делом, или помышлением, яко благ и человеколюбец Бог прости; яко несть человек, иже жив будет, и не согрешит. Ты бо един кроме греха, правда Твоя правда во веки, и слово Твое истина.

Возглас: Яко Ты еси воскресение и живот и покой усопших раб Твоих (имена), Христе Боже наш, и Тебе славу воссылаем, со безначальным Твоим Отцем, и Пресвятым и благим и животворящим Твоим Духом, ныне и присно и во веки веков.

Л. Аминь.

Д. Помолитеся, оглашеннии, Господеви.

Л. Господи, помилуй.

Д. Вернии, о оглашенных помолимся, да Господь помилует их.

Л. Господи, помилуй.

Д Огласит их словом истины.

Л. Господи, помилуй.

Д Открыет им Евангелие правды.

Л. Господи, помилуй.

Д Соединит их Святей Своей Соборней и Апостольстей Церкви.

Л. Господи, помилуй.

Д Спаси, помилуй, заступи и сохрани их, Боже, Твоею благодатию.

Л. Господи, помилуй.

Д Оглашеннии, главы ваша Господеви приклоните.

Л. Тебе, Господи.

Господи Боже наш, иже на высоких живый и на смиренныя призираяй; иже спасение роду человеческому ниспославый, Единороднаго Сына Твоего и Бога, Господа нашего Иисуса Христа: призри на рабы Твоя оглашенныя, подклоншия Тебе своя выя, и сподоби я во время благополучное бани пакибытия, оставления грехов и одежды нетления, соедини их святей Твоей, соборней и апостольстей Церкви и сопричти их избранному Твоему стаду.

Св. Да и тии с нами славят пречестное и великолепое имя Твое, Отца и Сына и Святаго Духа, ныне и присно и во веки веков.

Л. Аминь.

Д. Елицы оглашеннии, изыдите; оглашеннии изыдите; елицы оглашеннии, изыдите; да никто от оглашенных; елицы вернии, паки и паки миром Господу помолимся.

Л. Господи, помилуй.

Благодарим Тя, Господи Боже сил, сподобившаго нас предстати и ныне святому Твоему жертвеннику и припасти ко щедротам Твоим о наших гресех и о людских неведениих; приими, Боже, моление наше, сотвори ны достойны быти, еже приносити Тебе моления и мольбы и жертвы бескровныя о всех людех Твоих; и удовли нас, ихже положил еси в службу Твою сию, силою Духа Твоего Святаго, неосужденно и непреткновенно, в чистем свидетельстве совести нашея, призывати Тя на всякое время и место, да послушая нас, милостив нам будеши во множестве Твоея благости.

Д. Заступи, спаси, помилуй и сохрани нас, Боже, Твоею благодатию.

Л. Господи, помилуй.

Д. Премудрость.

Св. Яко подобает Тебе всякая слава, честь и поклонение, Отцу и Сыну и Святому Духу, и ныне и присно и во веки веков.

Л. Аминь.

Д. Паки и паки миром Господу помолимся.

Л. Господи, помилуй.

Паки, и многажды Тебе припадаем, и Тебе молимся, благий и человеколюбче, яко да призрев на моление наше, очистиши наша души и телеса от всякия скверны плоти и духа, и даси нам неповинное и неосужденное предстояние святаго Твоего жертвенника. Даруй же, Боже, и молящимся с нами преспеяние жития и веры и разума духовнаго: даждь им всегда со страхом и любовию служащим Тебе, неповинно и неосужденно причаститися Святых Твоих Таин, и небеснаго Твоего Царствия сподобитися.

Д. Заступи, спаси, помилуй и сохрани нас, Боже, Твоею благодатию.

Л. Господи, помилуй.

Д Премудрость.

Св. Яко да под державою Твоею всегда хранимы, Тебе славу воссылаем, Отцу и Сыну и Святому Духу, ныне и присно и во веки веков.

Л. Аминь.

Л. Иже херувимы тайно образующе и животворящей Троице трисвятую песнь припевающе, всякое ныне житейское отложим попечение.

Во время херувимской песни диакон кадит св. Престол, алтарь, иконостас, священника и народ.

Никтоже достоин от связавшихся плотскими похотьми и сластьми приходити, или приближитися, или служити Тебе, Царю славы: еже бо служити Тебе велико и страшно и самем небесным силам. Но обаче, неизреченнаго ради и безмернаго Твоего человеколюбия, непреложно и неизменно был еси человек, и архиерей нам был еси, и служебныя сея и бескровныя жертвы священнодействие предал еси нам, яко владыка всех. Ты бо един, Господи Боже наш, владычествуеши небесными и земными, иже на престоле херувимсте носимый, иже серафимов Господь и Царь Израилев, иже един свят и во святых почиваяй. Тя убо молю единаго и благаго и благопослушливаго: призри на мя грешнаго и непотребнаго раба Твоего, и очисти мою душу и сердце от совести лукавыя, и удовли мя силою Святаго Твоего Духа, облеченна благодатию священства, предстати святей Твоей сей трапезе и священно действоватп Святое и Пречистое Твое Тело и Честную Кровь. К Тебе бо прихожду, приклонь мою выю, и молю Ти ся, да не отвратиши лица Твоего от мене, ниже отринеши мене от отрок Твоих, но сподоби принесенным Тебе быти, мною грешным и недостойным рабом Твоим, даром сим; Ты бо еси приносяй и приносимый, и приемляй и раздаваемый, Христе Боже наш, и Тебе славу воссылаем, со безначальным Твоим Отцем, и пресвятым и благим и животворящим Твоим Духом, ныне и присно и во веки веков. Аминь.