Корнилий Комельский - Общежительный устав

Устав или правила о жительстве, от Святых Божественных Писаний избранна, о устроении преданных нам образ от Святых Отец во спасение душам и писанием вданна сущим о Христе братиям моим, во обители Пресвятыя Богородицы, честнаго ея Введения, в ней же жительствуем.

Благоволением и вседействием Господа Бога и Спаса Иисуса Христа и Пречистыя Матери Его споспешением написах Писания душеполезны себе и о Господе братии моей присным, яже суть моего нрава: тако аз именую вас, а не ученицы; един бо нам Учитель есть Господь Иисус Христос Сын Божий, давый нам Божественная Писания, и Святии Апостоли, и Преподобные Отцы, научивше и научающе ко спасению человеческий род. Понеже сии вси прежде соделаша благое, и тако инех научиша: аз же не делатель и которому благу, но точию Божественныя Писания глаголю, приемлющим сия и хотящим спастися; понеже и тамо же вечная жизнь и непроходимое житие, еже по смерти, или во покои, или во муце, еже комуждо воздает Бог по делом его; того ради подобает нам попещися о оном; еже по смерти житии. И аз сего ради еще жив сый Писание о Господе Братии моей спасения ради моего и всех произволяющих, воздвизая совесть к лучшему, и сохраняя от небрежения и злаго жития и вины, иже зде и плотская мудрствующих человек и предании лукавых и суетных, иже от общаго нашего врага и лестца и от нашея лености прившедших. И понеже мнози человецы мирстии приходят к нам хотяще пострищися; аз же еще и грешен и неразумен человек есмь, и душею и произволением немощен, приходящих ко мне принимаю и постризаю. Такожде и нецыи братия от инех монастырей приходят, хотяще жительствовати с нами; и сих бо приемлю не начальствовати убо желая, от десных (от лукавых) же боюся, егда како украдаем (обманут) есмь; и смотрих се, еще есть воля Божия, да еже постриг имея у нас и приходящии братия, хотящи же быти с нами, купно вси, или мали, или множайши суть, подобает вкупе согласно вместе подобие быти, и хранити заповеди Божия и предания Святых Отец творити, а не вносите изветы, и непщевати вины о гресех, и глаголати: ныне немощно по Писанию жити и последовати Святым Отцем. Но аще и немощны есьмы, а елика сила подобитися и последовати приснопамятным и блаженным Отцем, еще и к равности тех нам подвигнуться не возможно. Аще ли кто не производит в сих, да престанет стужати моему окоянству; аз убо отсылаю таковых бездельны (без успеха, без удовольствия), яко же преди рекох: к таковым не прихожду, желая начальствовати. Аще ли же и пребывающии у нас не тщатся хранити словесе нашего, еже глаголю им от Святых Писаний, аз о сих слово воздати не хощу за самочиние и неповинен есмь. Аще ли же произволяют тако жити, свободне и безбедне приемлем таковых, глаголюще им слово Божие, аще и сам не творю, да негли и аз Благодатию Христовою за молитвы пользовавшихся сподоблюся Божественныя Лествицы по глаголу реченному: «Яко окаляни суще, образу тамо погрязнутия, мимоходящия учаху, о спасении их поведающе, яко да не тии в той же кал погрязнут, и убо онех ради спасения и тех Господь от кала избавит». И паки глаголет: «Не хощу быти горек судия, иже словом учащим, зря тех дел ленивейше належащих; множицею бо дела скудость наполни словесная польза». Паки же инем образом боящеся греха, на мнозе отвращати, якоже рече Святый Максим: «Мнози есьмы глаголющии, мали же творящии». Но убо слово Божие никто же должен есть таити своим нерадением, но исповедовати свою немощь, не скрывати же Божия истинны, яко да не повинни будем заповедей преступлением и слова Божия инако сказанию; и паки боюся и трепещу Божественнаго Писания, глаголющаго: «Истязан будет Настоятель о всех, иже сущих под ним; и аще может отсещи их от зла, и не отсяцает, кровь их от руку его Бог взыщет и погибнет сам с ними, яко нерадив и ленив». Аще ли обличит и запретит, и не возможет отсещи их от зла; он убо душу свою избавил есть, тии же во гресе своем умрут. Тем же молю вас, отцы мои и братия, и чада возлюбленная, любве раде Христовы и спасения моего и вашего, попецемся о душах наших; оскорбим себе о мимошедшем времени жития нашего; подвигнемся о будущих благих да не леностию и нерадением здешнее житие провождающе, осуждени будем в страшное и второе пришествие Господне. Како же убо видети имамы очима день Господень Великий и страшное Христово лице, сияюще паче солнца, Праведным отдающа неизреченныя блага, грешным же томления и муки? Что же есть сего окаяннейше, или что сея скорби и печали горчайши? Яко же глаголет Святый Ефрем: «Егда видим мирския человеки живших с женами и с детьми, и мирскими пекущихся, царству небесному сподобившихся; мы же, оставивши вся, сиречь отца и матерь, жену и чада, и друга любовныя, и весь мир, и яже в нем красная и сладкая, в скорбех и бедах пребывающе, и со телесными страстьми, яко со львом, и со змием борющеся, и малаго ради небрежения и слабости и преслушания со блудники и мытари и со грешники осуждени будем. Се же страждем от многаго неразумия; ибо оставихом великая и худыми и ничтоже видимыми прельщаемся и сих ради отпадаем любве всяческих Царя Христа Бога; и того ради в страшный час смертный люте истязани будем, яко нерадиви и лениви». Тако бо глаголет Великий Василий: «Мню убо, и велицы Светильницы и духоноснии Отцы и инии же Святии Мученицы в страшный час смертный не без истязания бесовскаго преидоста мытарства». Тем же убо, братие, аще такова и величии в толике подвиге истязани бывают в час смертный; мы же страстнии и окаянии как убегнем страданий онех истязаний, и кое помилование улучим, иже на всякий час прогневающи Господа, и во всяком покои и без печали живуще, готово вся имуще, пищу и питие, одежду и обущу и всяки вещи, их же требуем, и о единеи души не хощем попещися, и не токмо памяти не имеем, како и что ради мира отрекохомся, и Христу обещахомся терпети всяку скорбь и тесноту иноческаго жития и смирения и послушания и Христолюбивую нищету имети, но ниже о малем своем правиле попечение имамы; еже в церкви и в келии, якоже подобает, ниже о трапезном и монастырском благочинии, ниже о пищи и питии, и одеждах и обущах и о вещах, яже имамы в келлиях без благословения, но просто живуще, якоже мирстии, не имуще печали о спасении нашем? Но велико мним точию отрещися от мира словом; делом же ни мало, и не боящеся ниже будущия муки, ни страшнаго часа смертнаго, ниже сего, яко по мале умрети имамы, якоже отцы наши и братия; и предстати имамы нелицемерному суду Христову и слово воздати хощем о нашем житии, о делех и словесех и о помышлениих. Воистинну страшен и немилостив суд прияти нерадивым и ленивым. Аще бо праведник едва спасется, нечестивый же и грешник где явится? (1 Петр, 4, 18). Сего ради поне отныне попещемся о Господних заповедех и о отеческих законоположениих, и о еже зде написанных нам преданиих, по свидетельству Божественных Писаний и по завещанию Великаго Василия, яже суть сия: «Прежде всего подобает иноком обще живущим не имети своея воли ни в чем, но повиноватися Настоятелю и держати послушание со смирением, не имети особнаго стяжания ничто же, и трудитися телесне, аще могут суть, и готовым быти во всяку службу, паче же юным, и вся узаконенная в монастыри благообразно и по чину творили тщательно, елика сила».