Павел Михалицын - Чудодейственная сила материнской молитвы

В 1997 году у Татьяны Т. из г. Упеча Брянской обл. обнаружили опухоль; предстояла операция, так как болезнь прогрессировала. От верующих людей она услышала о великой молитвеннице о нас, грешных, святой блаженной Ксении Петербургской. Татьяна стала регулярно читать акафист угоднице Божией. В июне 1997 года смогла приехать в Петербург и поклониться святой Ксеньюшке. Татьяна заказала молебен. Взяв земли и масла из часовни, уехала домой. Осенью врач на контрольной проверке опухоли не обнаружил, снял с учета, и на карточке появилась надпись «Выздоровела». Татьяна прислала письмо с просьбой отслужить благодарственный молебен.

Избранному во иереях, дивному угоднику Божию Иоанну, пастырю и учителю, Царей любителю, скорбных утешителю, земли Российския светлому светильнику, все житие свое на служение Богу и ближним посвятившему, и множество грешников на покаяние обратившему, многим же болящим исцеление у Бога испросившему, составим похвалу, яко ходатаю нашему и скорому помощнику. Ты же, отче, яко имеяй дерзновение ко Господу, от всяких нас бед свобождай, да зовем ти хвалебно:

Радуйся, Иоанне, новый Российский светильниче и теплый о нас к Богу молитвенниче.

Ангела хранителя своего, еще шестолетен сый, в светлости неизреченней яве узрел еси, Иоанне, иже и рече тебе, яко по повелению Господню всегда невидимо соприсутствует и хранит тя от всех зол. Темже, от юности избранника Божия тя ведуще, взываем сице:

Радуйся, от младенства по предуведению Богом избранный;

радуйся, от юности в служение Ему Того благодатию призванный.

Радуйся, Ангела-хранителя твоего из детства добрыми нравы веселивый;

радуйся, яко николиже того чем опечаливый.

Радуйся, яко незримый хранитель твой яве тебе явися;

радуйся, яко той всегда хранити тя обещася.

Радуйся, благочестивых родителей чадо возлюбленное;

радуйся, теми издетска в страсе Божии воспитанный.

Радуйся, воздержанию от юности себе обучивый;

радуйся, во убожестве и нищете младые дни своя препроводивый.

Радуйся, яко благонравия твоего ради благодать Божия яве на тебе почиваше;

радуйся, яко та лице твое всегда благоумильно творяше.

Радуйся, Иоанне, новый Российский светильниче и теплый о нас к Богу молитвенниче.

Видим тя, богомудре Иоанне, от юна возраста благодатию Божиею осенена бывша, и ею таинственно на добродетельное житие наставляема и руководима. Темже, имуще тя себе во образе подражание, умильно вопием Христу Богу: Аллилуиа.

Разум твой измлада в чтение и разумение священнаго и святоотеческаго Писания углубил еси, Иоанне, и из него, яко губа, воспринимал еси воду живу, от источника Святаго Духа проистекающую. Темже молим тя: умоли благаго Господа, да сподобит причастниками быти сея живительныя струи и нас, взывающих ти сице:

Радуйся, от младенства чиста себе от страстей соблюдый;

радуйся, благодать святаго крещения целу и невредиму сохранивый.

Радуйся, чтение Божественных писаний усердно возлюбивый;

радуйся, сокровенный в них смысл право и добре уразумевый.

Радуйся, во учении книжнем прилежание примерное показавый;

радуйся, в любомудрии естественнем и духовнем славно преуспевый.

Радуйся, любомудрием твоим мира прелести скоро распознавый;

радуйся, тех сетей, яко орел высокопарный, мудре избежавый.

Радуйся, северныя Российския страны чудное и светлое воспитание;

радуйся, мрака греховнаго в людех разгнание.

Радуйся, всем притекающим к тебе скорое вспоможение подаваяй;

радуйся, многомощное нам пред Богом заступление являяй.

Радуйся, Иоанне, новый Российский светильниче и теплый о нас к Богу молитвенниче.

Сила благодати Божия, недостающая восполняющая, обильно излияся на тя, Иоанне приснопамятне, егда от святителя Христофора во иерея рукоположен был еси, и граду Кронштадту пастырь учинен: оттоле бо начал еси учити люди верно служити Святей Троице и пети Ей: Аллилуиа.

Имея любовь Божественную в сердце своем, мудре Иоанне, и устав поста строго соблюдая, удобь поборал еси страстей двизания, николиже теми запявся. Темже, яко муж силен, изшел еси на делание нивы Господни: словом, яко ралом, разрыхляя отвердевшая и оляденевшая сердца человеческая, согревая же та молитвою и теплотою любве твоея и насевая в них семена искренняго покаяния и живыя веры. Сего ради восписуем ти таковыя похвалы:

Радуйся, избранный сосуде Божия благодати;

радуйся, даров небесных вместилище.

Радуйся, всем сердцем и всем помышлением твоим Бога возлюбивый;

радуйся, сего ради и чада твоя духовная искренне Того любити учивый.

Радуйся, заповеди Божия и уставы Церкве о постах опасно хранивый;

радуйся, таковым хранением любовь твою к Богу и ближним делы проявивый.

Радуйся, от юности над страстьми воцаривыйся;

радуйся, славен победитель на теми явивыйся.

Радуйся, в мире поживый премирно;

радуйся, на земли мудрствовавый небесно.

Радуйся, царства православно-российскаго столпе неподвижимый;

радуйся, православия и добрых обычаев блюстителю непозыблемый.

Радуйся, Иоанне, новый Российский светильниче и теплый о нас к Богу молитвенниче.

Бурею многих бед и волнений житейских одержимым нам, помогай, отче Иоанне, якоже и в животе твоем помогал еси всем, с верою к тебе притекавшим, да вси тобою вспомоществуеми, благодарно о тебе поем Богу: Аллилуиа.

Слышав апостола глаголюща: «наше житие на небесех есть» и хотя е наследовати, маловременное сие житие не во угождении плоти и работе страстем иждил еси, Иоанне, но во очищении души от скверн греховных (с ними же никтоже может внити в Царствие Небесное). Темже, имуще тя во образе богоугоднаго жития и помощника всем, взываем сице:

Радуйся, света евангельскаго в наши дни светлое блистание;

радуйся, омраченных душ вседейственное просвещение.

Радуйся, яко в Божественная писания весь ум твой углубил еси;

радуйся, в них стезю правую в Царствие Небесное обрел еси.

Радуйся, яко вся деяния твоя свет миру быша;

радуйся, яко тобою Отец небесный дивно прославися.

Радуйся, яко слово твое не бе, якоже кимвал бряцаяй, мертво, нечувственно;

радуйся, яко тое бяше воистину живо и действенно.

Радуйся, яко тобою мертвии духом верою оживляются;

радуйся, яко тобою падшии в бездну греховную к покаянию возбуждаются.