Таисия Олейникова - Бог в помощь. Молитвы для жизни, здоровья и счастья

Господи Боже наш, Источниче благих, повелевый земли извести плод, благоутробия ради Твоего и благости, благослови и умножи и гумно сие, и плодоношение рабов Твоих; исполни сокровища их всякаго благаго плода, пшеницы, вина и елеа, и сохрани их от всякаго искушения, со всеми сущими у них, и просвети их в познании Твоем, да благоугодни Тебе бывше, сподобятся вечных Твоих благ, яко благословися Твое имя, Отца и Сына и Святаго Духа, ныне и присно и во веки веков. Аминь.

Владыко Господи Боже наш, Твоя от Твоих приносити Тебе по предложению коемуждо повелевый, и вечных Твоих благ воздаяние сим даруяй, иже вдовы по силе приношение благоугодно приемый, приими и ныне принесенныя от раба Твоего (имя) и в вечных Твоих сокровищах возложитися сим сподоби; даруй ему и мирских Твоих благ обильное восприятие, со всеми полезными ему, яко благословися Твое имя, и прославися Твое царство, Отца и Сына и Святаго Духа, ныне и присно и во веки веков. Аминь.

Господи Боже Вседержителю, словом Твоим всяческая исполнивый, и возрастити повелевый земли вся плоды во своя времена, и даяти я в радость и в живот человеком. Ты Сам, Всеблагий Владыко, и семена сия, с различными зелиями принесенная во святый храм сей, благослови и освяти Духом Твоим Святым, и рабов Твоих сих, приемлющих зелия сия с семенами, от всякия скверны очисти, и домы их всякаго благовония исполни, во еже быти сим и всем верою хранящим я, и кадящимся ими в соблюдение и избаву от всех вражиих прилогов и во отгнание всякаго мечтания, от действа диавола находящаго, дневнаго и нощнаго, на благословение же душам и телесем, верным Твоим людем и скотом, домовом же и местом. Яко да вси, приемлющии сия зелия, восприимут себе покров души и тела, и да будет нашему спасению врачевство Твоея благодати таинство: да в коем месте возложится, или на коем употребляемо будет, во еже получити благословение, вся (противней силе оттуду прогнанней) десница Твоя да покрывает, во славу пресвятаго, великолепаго и всепоклоняемаго имени Твоего, Емуже подобает всякая слава, честь и поклонение, со Отцем и Святым Духом, ныне и присно и во веки веков. Аминь.

Боже Великоименитый, творяй чудеса, имже несть числа! Прииди к молящимся рабом Твоим, Владыко: посли Духа Твоего Святаго и освяти воду сию, и даждь ей благодать избавления и благословение Иорданово; сотвори ю источник нетления, освящения дар, грехом разрешение, недугом исцеление, бесом погибель, противным силам неприступну, ангельския крепости исполнену: яко да вси почерпающии ю и приемлющии от нея имеют на очищение души и тела, на исцеление вредом, во изменение страстем, во оставление грехов, во отгнание всякаго зла, на окропление и освящение домов и на всяку пользу подобну. И аще что в домех, или на месте правоверно живущих сия вода окропит, да отымет всяку нечистоту, да избавит от всякаго вреда, ниже тамо да водворяется дух губительный, ниже воздух вредяй, да отбежит всякое мечтание и навет крыющагося врага, и аще нечто есть, еже или здравию живущих завидит, или покою, окроплением сия воды да отразится, яко да благословися и прославися пречестное и великолепое имя Твое, Отца и Сына и Святаго Духа, ныне и присно и во веки веков. Аминь.

Господи Боже наш, Вседержителю и Всесильне, творяй вся и претворяяй, точию еже хотети. Иже в непроходных проход обретаяй неизреченною и непостижимою мудростию, Иже от сухаго камене водным подавый тещи потоком, и жаждущия люди Твоя насытивый. Сам и ныне, Владыко всех, услыши моление нас, недостойных рабов Твоих, и даруй нам воду на сем месте, сладку и вкусну, довольну убо к потребе, невредительную же ко приятию; яко да и в сем славим пресвятое и великолепое имя Твое, Отца и Сына и Святаго Духа, ныне и присно и во веки веков. Аминь.

Зиждителю и Творче всяческих, в начале сотворивый небо и землю и воды, ихже верху ношашеся Дух Божий; и словом Своим собравый воды поднебесныя в совокуплении едино; посылаяй источники в дебрех, и посреде гор провождаяй воды, напаяющия вся звери сельныя; горькия воды при Моисеи в пустыни древом усладивый, поразивый камень, и потекоша воды, жаждущия люди Своя напоивый; при Елисеи же пророце солию безчадныя воды исцеливый, Ты и ныне, яко Благ и Человеколюбец, смиренно молим Ти ся, призри на молитву нас, недостойных рабов Твоих, и ниспосли благословение Твое небесное на воду сию, в студенце сем сущую, Божественною Твоею силою и крепкою десницею отжени от нея всякую сопротивную детель, и действо диаволе; отыми от нея всякую горесть и слабость и безчадство, и благослови и освяти ю, услади же и благочадну сотвори; и всем приемлющим и пиющим от нея, и мыющимся ею, даждь быти во здравие и изменение всякия страсти и недуга, и во исцеление всякия болезни, во славу Тебе Единаго в Троице славимаго Бога. Ты бо еси благословляяй и освящаяй всяческая, и Тебе славу возсылаем, Отцу и Сыну и Святому Духу, ныне и присно и во веки веков. Аминь.

Зиждителю вод и Содетелю всех, Господи Боже Вседержителю, вся сотворивый и претворяяй, Ты Сам освяти воду сию: посли на ню святую Твою силу, на всяку сопротивну детель и даждь всем, приемлющим от нея, пития ради, или умовения ради, здравие души и телу, на изменение всякия страсти, и всякаго недуга; яко да будет исцеления вода и покоя всем прикасающимся к ней и приемлющим ю, яко Тебе подобает всякая слава, честь и поклонение, Отцу и Сыну и Святому Духу, ныне и присно и во веки веков. Аминь.

Господи Боже сил, вся добра зело сотворивый, очищаяй именем Твоим всякую скверну и нечистоту, Сам и ныне, Владыко, прииди в настоящий час образом креста Твоего, очисти кладезь сей от обретшияся ему нечистоты и от впадшаго вонь сквернаго, или гада, очисти нас от всякия скверны плоти и духа, и освяти воду сию Духом Твоим Святым, яко Ты еси освящение наше, и Тебе славу возсылаем, Отцу и Сыну и Святому Духу, ныне и присно и во веки веков. Аминь.

Владыко Господи Боже наш, власть имеяй всякия твари, Тебе молимся, и Тебе просим, якоже благословил и умножил еси стада патриарха Иакова, благослови и стадо скотов сих раба Твоего (имя), и умножи, и укрепи, и сотвори е в тысящи, и избави е от насилия диавола, и от иноплеменник, и от всякаго навета врагов, и воздуха смертнаго, и губительнаго недуга; огради е святыми Ангелы Твоими, всякую немощь, всякую зависть и искушение, чаровства же и волшебства, от действа находящия диавольскаго, отгоняя от него; яко Твое есть царство и сила и слава, Отца и Сына и Святаго Духа, ныне и присно и во веки веков. Аминь.