Коллектив авторов - Праздничная Минея (на цсл., гражданский шрифт, с ударениями)

И стихи́ры свята́го на 5, глас 5:

Прииди́те, лю́дие Бо́жии,/ с ли́ки святы́х и А́нгел соста́вим духо́вное торжество́,/ в нем бо Це́рковь земна́я боже́ственне с Небе́сней ликовству́ет:/ ны́не ве́рный де́латель вертогра́да Присноде́вы Богоро́дицы/ во Иерусали́м го́рний прие́млется/ и, я́ко муж жела́нный,/ у Престо́ла Бо́жия сла́вою и че́стию венча́ется,/ ра́дость спасе́ния нам предвозвеща́ет,// егда́ горе́нием любве́ его́ ко Го́споду воспламени́мся. Дважды.

Прииди́те, Ма́тере Бо́жия сподви́жницы/ и по́стническаго жития́ ревни́телие,/ со пустыннолю́бцы Горы́ Афо́нския/ трапе́зы боже́ственныя соприча́стницы бу́дем./ Ны́не Пречи́стая Ма́ти Бо́жия/ Силуа́на, подви́жника но́ва и преди́вна,/ его́же диа́вол иска́ше поглоти́ти, спасла́ есть,/ и Це́ркви Небе́сней на ра́дость приведе́,/ и, я́ко фимиа́м благово́нный,/ моли́твенника те́пла за нас у Престо́ла Бо́жия поста́ви,// венце́м ле́поты неувяда́емыя увенча́на.

Прииди́те, мона́шескаго по́двига щедролю́бцы,/ воста́ните, уневе́стившиися Христу́,/ да Силуа́на богому́дреннаго,/ по́двигом равноа́нгельским укра́шена, у́зрим,/ и сему́, ко́зни вра́жия победи́вшему, ра́дующеся, возопии́м:/ ра́дуйся, роди́телей благочести́вых плод целому́дренныя чистоты́;/ ра́дуйся, облагода́тствованный щедро́тами боже́ственныя добро́ты;/ ра́дуйся, ве́ры чи́стыя и незло́бия ди́вное воплоще́ние;// ра́дуйся, посто́м и моли́твою стяжа́вый Христо́во всепроще́ние.

О преблаже́нне о́тче Силуа́не,/ Небе́снаго Уте́шителя дориноси́телю преди́вный/ и пла́мене любве́ Бо́жия сосу́де неистощи́мый,/ тебе́, припа́дающе, вопие́м:/ Его́же всем се́рдцем возлюби́л еси́,/ Его́же ра́ди в Горе́ Афо́нстей моли́твою сле́зною за мíр сраспина́лся еси́,/ не преста́й и ны́не умоля́ти/ Це́ркви Святе́й от зол избавле́ние дарова́ти,/ лю́дем же, грехо́вными собла́зны обурева́емым,// мир и ве́лию ми́лость.

Сла́ва, глас 6: Весели́ся и ра́дуйся, Горо́ Свята́я,/ Врата́рницы Небе́сныя омофо́ром при́сно украша́емая,/ Це́рковь Росси́йская, взыгра́й, ликовству́ющи./ Ны́не христолюби́вии лю́дие,/ от восто́к со́лнца до за́пад,/ ве́чери А́гнца Бо́жия приуготовля́ются,/ Силуа́на богому́дреннаго добро́ты порфи́рою украша́ются./ С ни́миже и мы, сему́ братолю́бия учи́телю,/ па́мять пра́зднующе, сла́дце вопие́м:/ ра́дуйся, се́вера благода́тное сия́ние,/ в вертогра́де Афо́нстем Святы́я Руси́ све́тлое отраже́ние;/ ра́дуйся, Ангеле моли́твы сле́зныя,/ Бо́гу приноси́мыя о всей вселе́нней;// моли́ о нас Го́спода, братолю́бием оскудева́ющих.

И ны́не, пра́здника, глас 4. Самогласен: А́нгеловым прорече́нием / плод пречи́ст от Иоаки́ма и А́нны, пра́ведников, / днесь произы́де Де́ва, / не́бо и престо́л Бо́жий, / и прия́телище Чистоты́, / ра́дость провозвеща́ющи всему́ мíру, / живота́ на́шего Хода́таица, / кля́твы отя́тие, благослове́ния пода́ние. / Тем в рождестве́ Твое́м, Де́во Богозва́нная, / мíру мир испроси́ / и душа́м на́шим ве́лию ми́лость.

Та́же вход. Проки́мен дне. И чте́ния три преподо́бническая.

Прему́дрости Соломо́новы чте́ние (Прем. 5:15–24, 6:1–3А):

Пра́ведницы же во ве́ки живу́т, и во где́ мзда́ и́х, и попече́ние и́х у вы́шняго: сего́ ра́ди прии́мут ца́рствие благоле́пия и вене́ц добро́ты от руки́ Госпо́дни, я́ко десни́цею покры́ет и́х и мы́шцею защи́тит и́х. Прии́мет всеору́жие рве́ние свое́ и вооружи́т тва́рь в ме́сть враго́м, облече́тся в броня́ пра́вды и возложи́т шле́м су́д нелицеме́рен, прии́мет щи́т непобеди́мый преподо́бие, поостри́т же напра́сный гне́в во ору́жие: спобо́рет же с ни́м мíр на безу́мныя. По́йдут праволу́чныя стре́лы мо́лниины, и я́ко от благокру́гла лу́ка облако́в на наме́рение полетя́т: и от каменоме́тныя я́рости испо́лнь паду́т гра́ды: вознегоду́ет на ни́х вода́ морска́я, ре́ки же потопя́т на́гло: сопроти́в ста́нет и́м ду́х си́лы, и я́ко ви́хор разве́ет и́х: и опустоши́т всю́ зе́млю беззако́ние, и злоде́йство преврати́т престо́лы си́льных. Слы́шите у́бо, ца́рие, и разуме́йте: научи́теся, судии́ конце́в земли́: внуши́те, содержа́щии мно́жества и гордя́щиися о наро́дех язы́ков: я́ко дана́ е́сть от Го́спода держа́ва ва́м и си́ла от вы́шняго.

Прему́дрости Соломо́новы чте́ние (3:1–9):

Пра́ведных же ду́ши в руце́ Бо́жией, и не прико́снется и́х му́ка. Непщева́ни бы́ша во о́чию безу́мных умре́ти, и вмени́ся озлобле́ние исхо́д и́х, и е́же от на́с ше́ствие сокруше́ние: они́ же су́ть в ми́ре. И́бо пред лице́м челове́ческим а́ще и му́ку прии́мут, упова́ние и́х безсме́ртия испо́лнено: и вма́ле нака́зани бы́вше, вели́кими благоде́телствовани бу́дут, я́ко Бо́г искуси́ и́х и обре́те и́х досто́йны себе́: я́ко зла́то в горни́ле искуси́ и́х, и я́ко всепло́дие же́ртвенное прия́т я́. И во вре́мя посеще́ния и́х возсия́ют, и я́ко и́скры по сте́блию потеку́т: су́дят язы́ком и облада́ют людьми́, и воцари́тся в ни́х Госпо́дь во ве́ки. Наде́ющиися на́нь уразуме́ют и́стину, и ве́рнии в любви́ пребу́дут ему́, я́ко благода́ть и ми́лость в преподо́бных его́ и посеще́ние во избра́нных его́.

Прему́дрости Соломо́новы чте́ние (Прем. 4:7–15):

Пра́ведник же а́ще пости́гнет сконча́тися, в поко́и бу́дет: ста́рость бо честна́ не многоле́тна, ниже́ в числе́ ле́т изчита́ется: седи́на же е́сть му́дрость челове́ком, и во́зраст ста́рости житие́ нескве́рно. Благоуго́ден богови бы́в, возлю́блен бы́сть, и живы́й посреде́ гре́шных преста́влен бы́сть: восхище́н бы́сть, да не зло́ба измени́т ра́зум его́, или́ ле́сть прельсти́т ду́шу его́. Раче́ние бо зло́бы помрача́ет до́брая, и паре́ние по́хоти пременя́ет у́м незло́бив. Сконча́вся вма́ле испо́лни ле́та до́лга: уго́дна бо бе́ Го́сподеви душа́ его́, сего́ ра́ди потща́ся от среды́ лука́вствия: лю́дие же ви́девше и не разуме́вше, ниже́ поло́жше в помышле́нии таково́е, я́ко благода́ть и ми́лость в преподо́бных его́ и посеще́ние во избра́нных его́.

На стихо́вне стихи́ры, глас 2. Подо́бен:Егда́ от Дре́ва:

Све́том невече́рним Святы́я Тро́ицы просвеще́н,/ нощь жите́йскую без претыка́ния преше́л еси́,/ богому́дре Силуа́не,/ виде́нии боже́ственными возвыша́яся,/ во дво́рех Бо́га Вы́шняго всели́лся еси́./ Те́мже и нас насле́дники Того́ соде́лай,// святу́ю твою́ па́мять почита́ющих.

Стих: Честна́ пред Го́сподем/ смерть преподо́бных Его́.

Земна́я вся оста́вив,/ бога́тство и сла́ву я́ко прах вменя́в,/ Го́ру Святу́ю слеза́ми твои́ми ороси́л еси́/ и, невозвра́тным жела́нием Еди́ному Бо́гу приближа́яся,/ Сему́ а́нгельски послужи́л еси́./ Его́же моли́, преподо́бне,// в кни́зе жи́зни написа́тися почита́ющим тя.

Стих: Блаже́н муж, боя́йся Го́спода,// в за́поведех Его́ восхо́щет зело́.