Коллектив авторов - Праздничная Минея (на цсл., гражданский шрифт, с ударениями)

Кондак праздника, глас 4: Иоаки́м и А́нна поноше́ния безча́дства / и Ада́м и Éва от тли сме́ртныя свободи́стася, Пречи́стая, / во святе́м рождестве́ Твое́м. / То пра́зднуют и лю́дие Твои́, / вины́ прегреше́ний изба́вльшеся, / внегда́ зва́ти Ти: / непло́ды ражда́ет Богоро́дицу и Пита́тельницу Жи́зни на́шея.

Икос: Моли́тва ку́пно и воздыха́ние непло́дства и безча́дства Иоаки́ма же и А́нны благоприя́тное / и во у́ши Госпо́дни вни́де, и прозябе́ плод живоно́сен мíру. / Ов бо моли́тву на горе́ творя́ше, о́ва же в саде́ поноше́ние ноша́ше, / но с ра́достию непло́ды ражда́ет Богоро́дицу и Пита́тельницу Жи́зни на́шея.

Седа́лен преподобнаго, глас 4:

Жа́ждею по Бо́зе возревнова́в, о́тче наш Силуа́не, зе́млю оте́ческую оста́вил еси́,/ и со пустыннолю́бцы Горы́ Афо́нския/ дла́ни твоя́ порабо́тати Го́сподеви всеусе́рднейше распросте́рл еси́,/ иде́же равноа́нгельскими труды́ твои́ми вертогра́д Влады́чицы мíра преукра́сил еси́/ и, я́ко благово́ние, Це́ркви Вселе́нстей возблагоуха́л еси́,/ лозо́ виногра́да но́ваго, Ду́хом Святы́м облагода́тствованная. Дважды.

Сла́ва, и ны́не, пра́здника, или́ Богоро́дичен, глас то́йже:

Несть возмо́жно исчи́слити вели́чия Твоя́, Богоро́дице,/ ниже́ изрещи́ неизсле́димую па́че ума́ си́лу чуде́с Твои́х, соверша́емых вы́ну,/ любо́вию Тя чту́щим и ве́рою покланя́ющимся,/ я́ко вои́стину Бо́га ро́ждшей.

Песнь 4

Ирмос: Услы́шах, Го́споди, / слух Твоего́ смотре́ния / и просла́вих Тя, / Еди́не Человеколю́бче.

Припев: Пресвятая Богородице, спаси нас.

Воспева́ем Тя, Го́споди, / ве́рным спаси́тельное приста́нище пода́вшаго всем, / Тебе́ Ро́ждшую.

Тя, Богоневе́сто, / похвалу́ всем Христо́с яви́ и держа́ву / пою́щим ве́рно Твое́ та́инство.

Неискусобра́чная Влады́чице, / Твои́ми моли́твами избавля́еми прегреше́ний, / благоразу́мно вси Тя ублажа́ем.

Ин. Ирмо́с: Услы́шах слух си́лы Креста́,/ я́ко рай отве́рзеся им,/ и возопи́х:// сла́ва си́ле Твое́й, Го́споди.

Припев: Преподобне отче Силуане, моли Бога о нас.

Я́ко пчела́ трудолю́бная, посто́м и моли́твою к Бо́гу прилежа́л еси́/ и Богоро́дицу Пречи́стую мíр не оставля́ти сле́зно умоля́л еси́,/ о́тче преподо́бне, не преста́й и ны́не о нас моли́тися,/ я́ко и́маши дерзнове́ние ве́лие.

Кла́дязь но́вый благода́ти неисчерпа́емыя в Горе́ Афо́нстей яви́лся еси́, всеблаже́нне,/ из него́же, па́че ме́да и со́та,/ сла́дость любве́ Христо́вы Ду́хом Святы́м источа́ется,/ е́юже в го́рести грехо́вней услади́ сердца́ на́ша.

Го́споду, ре́кшу: иде́же есть сокро́вище ва́ше, ту бу́дет и се́рдце ва́ше,-/ благоволи́ у́бо, о всеблаже́нне, с тобо́ю Тому́ взыва́ти:/ Го́споди, Ду́хом Твои́м Святы́м даждь се́рдцу моему́ жа́жду,/ да никогда́же Тобо́ю насы́щуся.

Слава:Я́ко же́ртву благово́нную и непоро́чную,/ принеси́ моли́твы твоя́ за ны ко Пресвято́й Тро́ице, преподо́бне о́тче наш,/ и ми́лости испроси́ ненави́дящим и вражду́ющим на нас,/ и их и нас изба́ви от вся́кия ско́рби и печа́ли.

И ныне, Богоро́дичен: Тя, Чи́стую, Тя, Де́ву Нескве́рную, еди́ну и́мам сте́ну необори́мую,/ прибе́жище, покро́в кре́пок, ору́жие спасе́ния,/ не пре́зри мене́, блу́днаго, наде́ждо ненаде́емых,/ немощству́ющих по́моще, ра́досте оскорбля́емых и заступле́ние.

Катавасия: Услы́шах, Го́споди, / смотре́ния Твоего́ та́инство, / разуме́х дела́ Твоя́ / и просла́вих Твое́ Божество́.

Песнь 5

Ирмос: Сеннопи́санный мрак гада́ний разори́в / и ве́рных прибы́тием и́стины, / Богоотрокови́цею, озари́в сердца́, / и нас све́том Твои́м, Христе́, наста́ви.

Припев: Пресвятая Богородице, спаси нас.

Воспои́м, лю́дие, всех вину́ / су́щаго по нам бы́ти Вино́внаго: / Ея́же о́бразу ра́довахуся сподобля́еми проро́цы, / явле́нное спасе́ние от Тоя́ плодя́ще.

От су́ха прозябе́ние жезла́ иере́ева / Изра́илю показа́ проразсужде́ние, / и ны́не све́тлость прозя́бших пресла́вно све́тит, / от непло́дове всесла́вное рожде́ние.

Ин. Ирмо́с: Утренююще, вопие́м Ти:/ Го́споди, спаси́ ны,/ Ты бо еси́ Бог наш,// ра́зве бо Тебе́, ино́го не зна́ем.

Припев: Преподобне отче Силуане, моли Бога о нас.

Ты, Го́споди, созда́л мя еси́ и святы́м Креще́нием просвети́л мя еси́,/ Ты проща́еши грехи́ моя́ и да́руеши причаща́тися Те́ла Твоего́ и Кро́ве,/ да́руй ми си́лу всегда́ пребыва́ти в Тебе́,/ Силуа́ново рыда́ние приношу́ Ти, Бо́же наш.

Ума́ моего́ омраче́ние и страсте́й теле́сных обурева́ние/ твои́ми моли́твами, всеблаже́нне, просвети́ и ути́ши,/ я́коже дерзну́л еси́ укроти́ти во́лны морски́я,/ не терпя́ ви́дети ры́бари ги́бельными ве́тры обурева́емы.

Недосто́йными усты́ приноси́мое тебе́ убо́гое хвале́ние на́ше, преподо́бне, не пре́зри,/ но приими́ и воспева́ющих па́мять твою́ моли́твою посети́,/ бед и напа́стей и ве́чнаго муче́ния изба́ви,/ да не постыди́мся, на тя упова́юще.

Слава:Я́коже го́рлица пустыннолю́бная, от стра́жи у́тренния до но́щи/ воспева́ти Тро́ицу Единосу́щную и Неразде́льную/ со пустыннолю́бцы Горы́ Святы́я прилежа́л еси́, о́тче Силуа́не,/ умилостивле́ния ме́ртвым, живы́м и гряду́щим хода́тайствуя.

И ныне, Богоро́дичен: Кий дар благодаре́ния принесу́ Ти, Богоро́дице,/ я́ко наслади́хся Твои́х дарова́ний и Твоея́ безме́рныя бла́гости?/ Те́мже у́бо песносло́влю и велича́ю/ Твою́ неизрече́нную ко мне ми́лость.

Катавасия: О треблаже́нное Дре́во, / на не́мже распя́ся Христо́с, Царь и Госпо́дь! / И́мже паде́ дре́вом прельсти́вый, / Тобо́ю прельсти́вся, / Бо́гу пригвозди́вшуся пло́тию, / подаю́щему мир душа́м на́шим.

Песнь 6

Ирмос: Ко Го́споду от ки́та Ио́на возопи́: / Ты мя возведи́ из глубины́ а́да, молю́ся, / да я́ко Изба́вителю, во гла́се хвале́ния, / и́стины же ду́хом пожру́ Тебе́.

Припев: Пресвятая Богородице, спаси нас.

Ко Го́споду в ско́рби непло́дства возопи́ша / Богома́тере богому́дрии роди́тели / и Сию́ в ро́ды родо́в роди́ша, / на о́бщее спасе́ние и похвалу́.

Прия́ша Небе́сный дар от Бо́га досто́ин / Богома́тере богому́дрии роди́тели, / саме́х Херуви́мов превы́шшее носи́ло, / Сло́ва и Зижди́теля Роди́тельницу.

Ин. Ирмо́с: Обы́де мя бе́здна,/ гроб мне кит бысть,/ аз же возопи́х к Тебе́, Человеколю́бцу,// и спасе́ мя десни́ца Твоя́, Го́споди.

Припев: Преподобне отче Силуане, моли Бога о нас.

Святи́телие и свяще́нницы, и́ноцы и вси лю́дие,/ ра́дующеся, вку́пе просла́вите Бо́га и Пречи́стую Ма́терь Его́,/ кади́ло но́вое, моли́тву чи́стую Силуа́на, пла́менем Ду́ха Свята́го горя́ща,/ у Престо́ла Небе́снаго за нас прия́вших.