Сборник - Типикон

[Смотри] Подобает ведати: яко аще будет брату нашему отити ко господу во святых сих днех, посреде седмицы не бывают третины его, даже до пятка вечера, тогда бо совершается паннихида его, подобне и в субботу литургиа его. Во грядущую же субботу бывают девятины его, аще случится, аще ли ни. четыредесятины же его бывают, егда число дней его исполнится. Приношения же и памяти его начинаются от новыя недели, даже до исполнения дней 40.

Начало святаго и великаго поста.

В понедельник первыя седмицы знаменает параекклисиарх к свету коснее, вечерняго ради утешения.

И собравшеся вси в притвор, поем полунощницу без поклонов: точию по честнейшую херувим, 3 поклоны великия, с молитвою: Господи и владыко живота моего: Сие же бывает в 1–й день точию. В прочия же дни святаго и великаго поста поем полунощницу всю с поклоны. В начале трисвятаго, поклоны 3: на Приидите поклонимся, поклоны 3. На непорочнах, на коейждо славе поклоны 3. По Верую во единаго бога: трисвятое, поклоны 3. По Иже на всякое время, и по честнейшую, по возгласе: Боже ущедри ны: творим поклоны 3 великия, в нихже глаголем молитву святаго ефрема: Господи и владыко живота моего: втай, в три разделения, якоже предписася. Таже малых, 12, глаголюще в себе: Боже, очисти мя грешнаго. и паки последи молитву всю вышеписанную, и поклон един великий. Таже молитву: владыко Боже отче вседержителю: Посем, Приидите поклонимся: поклоны 3. Возведох очи мои в горы: Слава, и ныне, трисвятое: поклоны 3. По Отче наш: тропари обычныя. и возглас от иереа: и молитва: Помяни, Господи: Таже, Преславная присноДево: и упование мое отец: Посем иерей: Слава тебе Христе Боже: и прощение обычное: и востав иерей глаголет: Помолимся о благочестивейшем: яко обычай. и по исполнении сего востав иерей, творит обычное метание предстоятелю, и входит во святый олтарь, и прием кадильницу, глаголет и молитву кадила. и став пред святою трапезою, кадит крестообразно, и возгласит: благословен Бог наш, всегда, ныне и присно, и во веки веков. И нам отвещавшим: Аминь. Таже учиненный чтец глаголет трисвятое без метаний. По Отче наш: возглас от иереа: яко твое есть царство: Господи помилуй, 12: Приидите поклонимся, трижды, без метаний. и псалом 19: услышит тя господь: и 20- й: Господи силою твоею: По конце их трисвятое, без метаний. По Отче наш: тропари обычныя. Сим глаголемым: кадит иерей святый олтарь, и всю церковь. и возвращься во олтарь глаголет ектению малую: Помилуй нас, Боже: и возглас: яко милостив: Лик: Аминь. Именем господним: и абие иерей стоя пред святою трапезою, возглашает: Слава святей и единосущней и животворящей, и нераздельней Троице, всегда, ныне и присно, и во веки веков. И предстоятель глаголет: Аминь. Слава, в вышних богу: трижды, без поклонов. и Господи устне мои отверзеши: дважды. И глаголет шестопсалмие со всяким вниманием, не борзяся, но со страхом божиим, яко самому Богу беседующе невидимо. И не имать кто власти шепты творити, ниже плюнути, или хракнути: но паче внимати от псаломника глаголемым, руце имуще согбены к персем, главы же преклонены, и очи имуще долу, сердечныма очима зряще к востоком, молящеся о гресех наших, поминающе смерть, и будущую муку, и жизнь вечную. В начало же 102–го псалма, глаголет иерей утренния молитвы, стоя непокровен, по обычаю: По скончании же шестопсалмиа глаголет ектению великую, и возглас. Таже глаголет учиненный монах, или иерей: Аллилуиа: во глас прилучившийся октоиха, со стихи их. Стих 1–й: от нощи утренюет дух мой к тебе боже. Стих 2–й: Правде научитеся живущии на земли. Стих 3–й: Зависть приимет люди ненаказанныя. Стих 4–й: Приложи им зла Господи. приложи зла славным земли. И по коемждо стисе клирицы поют, Аллилуиа, трижды. Таже троичны гласа, разделяюще на лики: поем же со умилением, велегласно и косно, пением: На 2–м, Слава: а на 3–м, И ныне: Таже стихословим едину кафисму псалтира. По антифонех же, на Аллилуиа, творим поклоны 3, вси равно, последующе игумену, или екклисиарху. По кафисмах ектении не глаголются во всю 40–цу, кроме суббот и недель. По 1–й кафисме седальны умилительныя осмогласника, и мученичен: Таже чтение во святом ефреме. [Смотри] от сего бо дне начинается святый ефрем: и чтется до пятка цветоносныя седмицы.

о псалтири, како глаголется во святую и великую 40–цу, предписася во главе 17.

Чтется же от предстоятеля, или от певца перваго десныя страны. По 2–й же кафисме седален триоди, кир иосифа. Слава, тойже: И ныне, богородичен: и паки чтение во святом ефреме. По 3–й кафисме седален триоди, Господина феодора. Слава, тойже: И ныне, богородичен. Чтение в лавсаице. Посем псалом 50, и абие иерей молитву: спаси Боже люди твоя: Клирицы же, Господи помилуй, 12. и возглас. милостию и щедротами: Посем начинаем: господеви поем: на глас канона минеи дне святаго: и глаголют стихи песней скоро, кийждо лик свой стих, дондеже достигнут до огустеша: и от того начинают стихи держати на 14: и поем минеи со ирмосом на 6.

Поем же сице: Первый лик глаголет стих: огустеша: и поет ирмос. Вторый же лик глаголет вторый стих: Рече враг: и по нем тропарь канона. и по ряду стихи, по ликом, до тогда потщашася: от стиха же, Тогда потщашася: начинаем трипеснец Господина иосифа на 4. На Господь же царствуяй, поем другий трипеснец, Господина феодора студита. и поет един лик тропарь. Другий же лик вторый стих, и тропарь. Посем содинившимся двум ликом поют: Слава, троичен, вышшим гласом: И ныне, богородичен: Таже глаголем высочайшим гласом: Слава тебе Боже наш, слава тебе: И поем иный тропарь Господина феодора: Понеже бо по пяти тропарей имать песнь. Последи же глаголем катавасию, ирмос втораго канона. Сице поется осмая, и девятая песни. Третию же песнь поем сице: Глаголет первый лик, стих: Господь взыде на небеса: и тропарь канона минеи. Вторый лик, стих: И даст крепость царю: И вторый тропарь канона минеи. Таже, Слава, и ныне, с тропари канона. и поет первый лик ирмос минеи третия песни, последи канона. Сим образом поем и шестую песнь. Четвертую же, и пятую, и седьмую песнь, сице поем: Глаголи первее ирмос канона минеи, таже конечныя два стиха песни поем к тропарем канона. и Слава, и ныне: ирмосом же не покрываем песни, зане ирмос глаголется прежде песни. Поются же ирмосы минеи по каноне, токмо по третией и шестой песнех, занеже у тех песней первее ирмос не поется. В прочия же дни седмицы кроме понедельника, тако поется и 1–я песнь, якоже указася о четвертой, и пятой песнех. А в коих песнех будет трипеснец, поется последи канона катавасиа, ирмос трипеснца, якоже выше изъявися.

[Смотри] Ведомо же буди: яко осмогласник не поется во всю святую 40–цу, кроме недель: поется же точию минеа, и трипеснец. А в коих песнех несть трипеснца, поется токмо минеа. По 3–й песни, глаголет иерей ектению малую. таже седален святаго, единожды. Слава, и ныне, богородичен. и чтение в лавсаице. По 6–й песни, ектениа малая. таже седален мученичен: аще же имать святый кондак, глаголем его зде: мученичен же глаголем по первой кафисме, с седальны, с припевом: Дивен Бог во святых своих: и чтем пролог. По 9–й песни, Достойно есть: и поклон. ектениа малая: И светилен троичен гласа, трижды. Таже чтец чтет обычныя три псалмы: Хвалите Господа с небес: [Смотри] Подобает ведати: яко аще случатся в седмичныя дни, кроме субботы и недели, в минеи на ряду два святыя, поем единаго на вечерни стихиры: а другаго на хвалитех на 4, аще есть. Каноны же глаголем обоим святым на 6. Настоящаго святаго поем ирмос единожды, и но нем глаголем два тропаря за един, и тропарь пред богородичным, богородичен же оставляется. Таже втораго святаго подобне два тропаря за един, и тропарь пред богородичным, и богородичен, таже, трипеснец. Аще же ни, глаголет настоятель: Тебе слава подобает Господи Боже наш: Слава тебе показавшему нам свет: и прочая. и творим метания три, равно на местех наших стояще. Посем иерей: Исполним утреннюю молитву нашу господеви: и возглас. И посем сошедшеся оба лика вкупе, поем на стиховне, триоди самогласен дне, глас 5: Прииде пост: глаголем же и припев: Исполнихомся заутра: и паки тойже самогласен. припев 2–й: И буди светлость: и мученичен: Слава, и ныне, богородичен: Тя божию матерь: Аще ли будет святаго на Утрени, на стиховне Слава, глаголем слава, святаго: И ныне, богородичен. Посем настоятель, или чтец глаголет: благо есть исповедатися господеви: дважды. трисвятое, и метания три. По Отче наш: иерей возглас. и мы глаголем тропарь: В храме стояще славы твоея: Господи помилуй, 40, кротким гласом. Таже, Слава, и ныне, честнейшую херувим: Именем господним благослови отче. иерей: Сый благословен Христос Бог наш: и мы глаголем: небесный царю: Посем воздевши руце, станем молящеся в себе, глаголюще молитву преподобнаго отца нашего ефрема, разделяюще ю на три части, якоже предписася, творяще поклоны 3: Господи и владыко живота моего: и тако во едино вси преклоняем колена. Таже паки воставше, глаголем: Дух же целомудрия: и поклон един. Посем: ей Господи царю: и поклон един, предваряющу игумену, или екклисиарху. И по сих творим и прочих, 12, излегка, утомления ради, на нихже глаголем в тайне: Боже очисти мя грешнаго. Последи же глаголем в себе всю вышеписанную молитву во едино: Господи и владыко живота моего: и поклон великий. И по еже востати нам, начинает предстоятель: Приидите поклонимся, трижды: и метания 3. учиненный чтец чтет час первый, по обычаю. псалом 5: Глаголы моя внуши Господи: и прочия два псалма. Посем, Слава, и ныне, аллилуиа, трижды, иметания три.