Сборник - Типикон

И ныне: Иже в ложесна девическая вместивыйся, и недр отеческих не разлучивыйся, со ангелы и нас Христе Боже приими вопиющих ти: свят, свят, свят еси Боже наш, Богородицею помилуй нас.

Светилен: Светодавче Господи, низпосли свет твой, и просвети сердце мое.

Песни троичны, глас 6: Предстояще со страхом херувими, ужасающеся с трепетом серафими, трисвятую песнь приносят немолчным гласом, с нимиже и мы вопием грешнии: свят, свят, свят еси Боже наш: Слава: Безплотными усты, немолчными славословленьми, шестокрильнии вопиют ти трисвятую песнь Боже наш, и мы иже на земли, недостойными усты хвалу ти возсылаем: свят, свят, свят еси Боже наш, молитвами всех святых твоих помилуй нас.

И ныне: троичныя единицы божество неслиянным соединением славим, и ангельскую песнь вопием: свят, свят, свят еси Боже наш, Богородицею помилуй нас.

Светилен: Предстательствы Господи безплотных твоих, низпосли душам нашим свет твой присносущный.

Зде же в 6–м гласе, в начале светильна, вместо: Предстательствы Господи безплотных: и прочая до конца. Аще во вторник глаголется, сице: молитвами Господи предтечи твоего: и прочая до конца глаголи. В среду же и пяток вместо: Предстательствы Господи безплотных: В начале глаголати сице: Силою креста твоего Господи, низпосли душам нашим свет твой присносущный.

В четверток же сице: молитвами Господи святых апостол твоих, и святителя николаа, низпосли душам нашим свет твой присносущный.

Во второе, на Слава глаголати в начале светильна: молитвами Господи всех святых, низпосли душам нашим свет твой присносущный.

В третие же, на И ныне, в начале светильна глаголати сице: молитвами Господи Богородицы, низпосли душам нашим свет твой присносущный,

Песни троичны, глас 6: Вышнею силою херувимски воспеваемый, и божественною славою ангельски покланяемый, приими и нас сущих на земли, недостойными устнами хваление тебе возсылающих: свят, свят, свят еси Боже наш: Слава: яко сон леность отложивши душе, исправление ко хвалению покажи судии, и со страхом возопий: свят, свят, свят еси Боже наш, молитвами всех святых твоих помилуй нас.

И ныне: Неприступному божеству, во единице Троице, серафимскую трисвятую возсылающе хвалу, со страхом возопиим: свят, свят, свят еси Боже наш, Богородицею помилуй нас.

Светилен: Воздвигни мя Господи к твоему песнопению, и научи мя творити волю твою святый: Песни троичны, глас 8: На небо сердца имуще, ангельский подражим чин, и со страхом судии припадем, победную взывающе хвалу: свят, свят, свят еси Боже наш: Слава: Зрети тебе не смеюще херувими, летяще зовут со восклицанием божественную песнь трисвятаго гласа, с нимиже и мы вопием ти: свят, свят, свят еси Боже наш, молитвами всех святых твоих помилуй нас.

И ныне: Сляцаеми множеством прегрешений наших, и не смеюще воззрети на высоту небесную, душу с телом преклоньше, со ангелы песнь вопием ти: свят, свят, свят еси Боже наш, Богородицею помилуй нас.

Светилен: Свет сый Христе, просвети мя тобою: [Смотри] Подобает ведати и сие: яко держит церковь вселенская, ни на блаженнах, ни на литургиах, чести апостол и евангелие по вся дни святых, точию рядовое, рекше столп чрез все годище, яже суть на ряду, и святых избранных, коих есть писано апостол и евангелие. А еже чести на всяк день святаго апостол и евангелие, сие от своего неразумия, а не по церковному уставу. [Смотри] Аще же кто хощет творити литургию коеголибо святаго, или мученка, или святителя, или преподобнаго, или апостола, или пророка, или мученц: чти общее евангелие, обрет подобно святаго, егоже твориши службу, такожде и апостол, зри ниже сего.

Глава 59. Прокимени, апостоли, аллилуиаре, евангелиа, и причастни общи святых, ихже егда творим службу.

Служба пресвятыя Богородицы.

На Утренипрокимен, глас 6: Помяну имя твое во всяком роде и роде. Стих: отрыгну сердце мое слово благо: евангелие луки, зачало 4.

На Литургиипрокимен, глас 3. Песнь Богородицы: Величит душа моя Господа, и возрадовася дух мой о бозе спасе моем. Стих: яко призре на смирение рабы своея, се бо от ныне ублажат мя вси роди. Апостол к филипписием, зачало 140. Или другий, ко евреем, зачало 320. Аллилуиа, глас 8: Слыши дщи и виждь, и приклони ухо твое. Стих: Лицу твоему помолятся богатии людстии. евангелие луки, зачало 54. Причастен: Чашу спасения прииму, и имя господне призову.

Служба святых небесных безплотных сил.

Прокимен, глас 4: Творяй ангелы своя духи, и слуги своя пламень огненный. Стих: благослови душе моя Господа, Господи Боже мой возвеличился еси зело. Апостол ко евреем, зачало 305. Аллилуиа, глас 5: Хвалите Господа вси ангели его, хвалите его вся силы его. Стих: яко той рече, и быша: той повеле, и создашася. евангелие луки, зачало 51. Или матфеа, зачало 52. Причастен: Творяй ангелы своя:

Служба святых пророков обща.

Прокимен, глас 4: Ты иерей во век по чину мельхиседекову. Стих: Рече Господь господеви моему седи одесную мене, дондеже положу враги твоя подножие ног твоих. Апостол к коринфяном, зачало 357: Другий ко евреем, зачало 314: Третий соборнаго послания иаковля, зачало 56. Аллилуиа, глас 5. Моисей и аарон в иереех его, и самуил в призывающих имя его. Стих: Свет возсия праведнику, и правым сердцем веселие. евангелие матфеа, зачало 90з. И луки, зачало 62. Причастен: В память вечную: Служба святых апостолов обща: Прокимен, глас 8: Во всю землю изыде вещание их: Стих: небеса поведают славу божию: Апостол к коринфяном, зачало 131. Аллилуиа, глас 1: Исповедят небеса чудеса твоя Господи. Стих: Бог прославляемь в совете святых. евангелие апостола единаго, от матфеа, зачало 34. Апостолов обще евангелие луки, зачало 50, или 51. Причастен: Во всю землю изыде вещание их: Служба святителей.

Прокимен, глас 1: уста моя возглаголют премудрость, и поучение сердца моего разум. Стих: услышите сия вси языцы, внушите вси живущии по вселенней. Апостол ко евреем, зачало 318. Аллилуиа, глас 2: уста праведнаго поучатся премудрости, и язык его возглаголет суд. Стих: Закон бога его в сердце его, и не запнутся стопы его. евангелие Иоанна, зачало 36. Причастен: В память вечную: Служба святителей обща.

Прокимен, глас 6: честна пред господем смерть преподобных его. Стих: Что воздам господеви о всех, яже воздаде ми? Апостол ко евреем, зачало 335. Аллилуиа, глас 2: священницы твои облекутся в правду, и преподобнии твои возрадуются. евангелие матфеа, зачало 11. И Иоанна, зачало 35 от полу. Причастен: В память вечную: Служба преподобных, и Христа ради юродивых обща.

Прокимен, глас 6: честна пред господем смерть преподобных его. Стих: Что воздам господеви о всех: Апостол к галатом, зачало 113. Аллилуиа, глас 6: блажен муж бояйся Господа, в заповедех его восхощет зело. Стих: Сильно на земли будет семя его. евангелие матфеа, зачало 43. И луки, зачало 24. Причастен: В память вечную: Служба мученка.