Леонид Рассказов - История государства и права России с древности до 1861 года

А великий князь руский и боляре его да посылають в Греки к великим царем гречьским корабли, елико хотять, со слы и с гостьми, яко же им уставлено есть. Ношаху ели печати злати, а гостье сребрени; ныне же уведел есть князь вашь посылати грамоты ко царству нашему; иже посылаеми бывають от них поели и гостье, да приносять грамоту, пишюче сице: яко послах корабль селико, и от тех да увемы и мы, оже с миром приходять [51] Яко послах корабль селико, и от тех да увемы и мы, оже с миром приходять – послал столько-то кораблей, чтобы из этих грамот мы узнали, что пришли с мирными целями. . Аще ли без грамоты придуть, и преданы будуть нам, да держим и храним, донде же възвестим князю вашему. Аще ли руку не дадять, и противятся, да убьени будуть, да не изищется смерть их от князя вашего. Аще ли убежавше в Русь придуть, мы напишем ко князю вашему, яко им любо, тако створять. Аще придуть Русь бес купли, да не взимають месячна. Да запретить князь слом своим и приходящим Руси еде, да не творять бещинья в селех, ни в стране нашей. И приходящим им, да витають у святаго Мамы, да послеть царство наше, да испешеть имяна ваша, тогда возмут месячное свое, съли слебное, а гостье месячное, первое от города Киева, паки из Чернигова и ис Переяславля и ис прочих городов. Да входять в город одинеми вороты со царевым мужем без оружья, муж 50, и да творять куплю, яко же им надобе, и паки да исходять; и мужь царства нашего да хранить я, да аще кто от Руси или от Грек створить криво, да оправляеть то. Входяще же Русь в град, да не творять пакости и не имеють волости купити паволок лише по 50 золотник; и от тех паволок аще кто крьнеть [52] Крьнеть – купит. да показываеть цареву мужю, и ть я запечатаеть и дасть им. И отходящей Руси отсюда взимають от нас, еже надобе, брашно на путь, и еже надобе лодьям, яко же уставлено есть преже, и да возъвращаются с спасением в страну свою; да не имеють власти зимовати у святаго Мамы.

Аще ускочить челядин от Руси, по нь же придуть в страну царьствия нашего, и у святаго Мамы аще будеть, да поимуть и; аще ли не обрящется, да на роту идуть наши хрестеяне Руси по вере их, а не хрестеянии по закону своему, ти тогда взимають от нас цену свою, яко же уставлено есть преже, 2 паволоце за челядин.

Аще кто от людий царства нашего, ли от города нашего, или от инех город ускочить челядин нашь к вам, и принесеть что, да въспятять и опять; а еже что принесл будеть, все цело, и да возьметь от него золотника два имечнаго [53] Имечное – вознаграждение за задержание челядина. .

Аще ли кто покусится от Руси взяти что от людий царства нашего, иже то створить, покажнен [54] Покажнен – наказан. будеть вельми; аще ли взял будеть, да заплатить сугубо; и аще створить то же грьчин русину, да прииметь ту же казнь, яко же приял есть и он.

Аще ли ключится украсти русину от грек что, или грьчину от руси, достойно есть да возворотить е не точью едино, но и цену его; аще украденное обрящеться продаемо, да вдасть и цену его сугубо, и тъ показнен будеть по закону гречьскому, и по уставоу и по закону рускому.

Елико хрестеян от власти нашея пленена приведуть русь, ту аще будеть уноша, или девица добра, да вдадять златник 10 и поимуть и; аще ли есть средовечь, да вдасть золотник 8 и поимуть и; аще ли будеть стар, или детещь, да вдасть златник 5.

Аще ли обрящутся русь работающие у грек, аще суть пленьници, да искупають е русь по 10 златник; аще ли купил и будет грьчин; под хрестом достоить ему, да возьметь цену свою, елико же дал будеть на немь.

А о Корсуньстей стране. Елико же есть городов на той части, да не имать волости, князь руский, да воюеть на тех странах, и та страна не покаряется вам, и тогда, аще просить вой у нас князь руский да воюеть, да дам ему, елико ему будеть требе.

И о том, аще обрящють русь кубару [55] Кубара – корабль. гречьскую въвержену на коем любо месте, да не преобидять ея. Аще ли от нея возметь кто что, ли человека поработить, или убьеть, да будеть повинен закону руску и гречьску.

Аще обрящють в вустье Днепрьскомь Русь корсуняны рыбы ловяща, да не творять им зла никако же.

И да не имеють власти Русь зимовати в вустьи Днепра, Белъбережи, ни у святаго Ельферья; но егда придеть осень, да идуть в домы своя в Русь.

А о сих, оже то, приходять чернии болгаре и воюють в стране Корсуньстей, и велим князю рускому, да их не пущаеть пакостить стране его.

Ци аще ключится проказа некака от грек, сущих под властью царства нашего, да не имать власти казнити я, но повеленьем царства нашего да прииметь, яко же будеть створил.

Аще убьеть хрестеянин русина, или русин хрестеянина, да держим будеть створивый убийство от ближних убьенаго, да убьють и.

Аще ли ускочить створивый убой и убежить, аще будеть имовит, да возьмуть именье его ближьнии убьенаго; аще ли есть неимовит створивый убийство и ускочить же, да ищють его, дондеже обрящется, аще ли обрящется, да убьен будеть.

Ци, аще ударить мечем, или копьем, или кацем любо оружьем русин грьчина, или грьчин русина, да того деля греха заплатит сребра Литр е по закону рускому; аще ли есть неимовит, да како можеть в только же продан будеть, яко да и порты, в них ж ходить, да и то с него сняти, а о проце да на роту ходить по своей вере, яко не имея ничтоже, ти тако пущен будеть.

Аще ли хотети начнеть наше царство от вас вои на противящаяся нам, да пишем к великому князю вашему, и послеть к нам, елико же хочем: и оттоле уведять ины страны, каку любовь имеють грьци с русью.

Мы же свещание се написахом на двою харатью, и едина харатья есть у царства нашего, на ней же есть крест и имена наша написана, а на другой послы ваша и гостье ваша. А отходяче послом царства нашего да допроводять к великому князю рускому Игореви и к людем его; и ти приимающе харатью, на роту идуть хранити истину, яко мы свещахом, напсахом на харатью сию, на ней же суть имяна наша написана.

Мы же, елико нас хрестилися есмы, кляхомся церковью святаго Илье в сборней церкви, и предлежащем честным крестом, и харатьею сею, хранити все, еже есть написано на ней, не преступити от него ничто же; а иже преступить се от страны нашея, ли князь ли ин кто, ли крещен или некрещен, да не имуть помощи от бога, и да будеть раб в весь век в будущий, и да заколен будеть своим оружьем.

А некрещеная Русь полагают щиты своя и мече свое наги, обруче свое и прочаа оружья, да кленутся о всемь, яже суть написана на харатьи сей, хранити от Игоря и от всех боляр и от всех людий от страны Руския в прочая лета и воину.

Аще ли же кто от князь или от людий руских, ли хрестеян, или не хрестеян, преступить се, еже есть писано на харатьи сей, будеть достоин своим оружьем умрети, и да будеть клят от бога и от Перуна, яко преступи свою клятву.