Седагет Керимова - Гьиссерин кимел

Гуьнгуьна тваз дидед чIал.

Алахъин чун чи чIалан

Хилер хана, кьатI тийиз.

Агатин чун чкIанвай

Хайи гафар кIватI хъийиз.

Шегьредиз акъудна чIал,

Бахтлу жервал рикIивай,

ХкIурунар, акьунар

Алудин ша рикIелай.

Са чIехи мел кIанда чаз,

Са кьилин мел, лезги мел!

Агатдайвал ватандин

Кьиляй-кьилиз вири эл!

Чан лагьана, рикI алаз

Къуба, Куьре агуддай.

Шадвилерив, хъуьруьнрив

Хажалатар алуддай.

15.01.2019

ЖИВ АЛАЙВАЛ

Гьар са халкьдихъ и дуьньяда

ава вичин гел,

Ам тар хьиз я – авай пунни,

танни, шумуд хел.

Аллагьди чун лезгияр хьиз

халкьнавайди я,

Чи рикIера чаз кутугай

шанкь авайди я.

Чун женгера лигим хьайи

легар, албанар,

Ягъийрикай чи чилер хуьн

хьана чи гьунар.

Лезгидин тIвар аваз хьурай

дуьньядин винел,

Жив алайвал Лезгистандин

дагъларин кьилел!

МУРАД

Начагъзаваз хизанда сад,

Ахквадани вилериз гад?

Уьмуьрди ваз кьада инад,

РикI шеда ам сагъ жедалди.

Гьатайла ви мукьвад дарда,

Фикирри ви рикIиз парда.

Лугьуз жедач: «яд кIаркIардай»,

Адан гьалар чагъ жедалди.

Ви хайиди аваз кIеве,

Шадвилиз гуз женни эвер?

Юзада ви кIвалин кьевер,

Бахтлу йикъар хъжедалди.

Зарул акваз къуншидин гьал,

АтIудачни ви рикIин гъал?

Рекьер, руьштер жеда ваз сал,

Адалай гъам элкъведалди.

Сугъул ятIа сад хуьре ви,

Адан ракIар ятIа кIеви,

ЧIулав жечни, лагь, ви иви,

А кIвализ рагъ хкведалди?

Къакъатун я дуьньядин мичI,

Авач маса атIудай ричI,

Садни ялгъуз тахьурай гьич,

Дуьньядлай куьч хъфидалди.

11.02.2021

ТIЕМ

Вердиш я чун дегьнеда

Хуьз дердерин хараяр.

Са гъвечIи хвеш атайла,

Хъиткьинда рикI хуравай.

Ялгъузвили кукIварда

Чун кIвале авайла тек,

Хайибур кIевевайла,

Аквадан вилиз пек-лек?

Гатфари тIебиатдин

Дегишдайвал сугъул ранг,

Гьар са верцIи гафуни

КIевирда дуствилин танг.

Санал тIуьр са кап фа хьиз,

Са куьнини гудач дад,

Садвилив фад кьаз жеда

Гьар са тIалдин вилик пад.

Чи уьмуьрдин кьилин тIем

Хайибурни мукьвабур!

Абур квачиз дуьньядихъ

Я дад жедач, я абур!

29.01.2021

ГЬИССЕРИН КИМЕЛ

Хъуьрен тийиз бахтунин рагъ,

Месевай зун хьана начагъ.

Авазвай мад чIичI ийиз йиф,

Чандиз тIалар жезвай илиф.

Рам тежез фикиррин кIеле,

Гьатнавай зун гъамдин меле.

Алахьайла мурадрин сел,

Алах жезвай зи хирел кьел.

Крар зуракI амаз жуван,

Зи рикIи ийизвай шуван:

«Агь, за крар гирт ийидай!

ЧIижери хьиз вирт ийидай!»

Алайла гьиссерин кимел,

Садлагьана квахьна чIимел,

Са умудди ифирна хур,

Кьезиларна рикIевай цIур.

Агакьна зав цаварай ван:

«Герек туш заз гьеле ви чан.

Гъиз жедач вун уьмуьрд цикIел,

Икьван къастар амаз рикIе».

Бахтуни къал хъувунач зав,

Гъамарикай михьна зи тав.

Чукурна зи кьилелай чIагъ,

КуьхкIуьрна зи шадвилин Рагъ.

11.10.2001

ГЗАФ ХЬАНВА

Кьакьан паруйрин а пата,

Дараматар къати-къатар.

Чинеба нез ана гатар,

ИчIи рикIер гзаф хьанва.

КIеле хьтин кIвалин къене,

Чуьнуьхариз ктIай къенер,

Кьазвай кIеви тапан кьинер,

МичIи рикIер гзаф хьанва.

РакIарикай кудна куьлег,

Татуй лугьуз «гьар са куьлягь»,

ЦицIрен рикIин девдиз килиг!

ГъвечIи рикIер гзаф хьанва.

Авай чпихъ темягьдин сас,

Чида заз шумудни са кас,

ТIул кумачир инсандиз хас

ПичIи рикIер гзаф хьанва.

Я асул, я мах тийижир,

Я хайид, я тах тийижир,

Я батIул, я гьахъ тийижир

ГуьчIуь рикIер гзаф хьанва.

Амукьдайд хьиз дуьнья кьуна,

Нефсинив ийида «гьунар».

Такурай заз ихьтин кьунар,

Къванцин рикIер гзаф хьанва.

АМУКЬДАЙДИ…

Вуч ава чахъ дуьньядилай тухудай?

Вад юкI агъни гьалтдатIа низ чида кьван?

Дуьньяяр рам авуртIани, дуьньядал,

Амукьдайди сур я, садни кьилин къван.

Квахьдач анжах чил амай кьван хъсанвал,

Пис тIварарни амукьда писвилер хьиз.

Текст предоставлен ООО «ЛитРес».

Прочитайте эту книгу целиком, на ЛитРес.

Безопасно оплатить книгу можно банковской картой Visa, MasterCard, Maestro, со счета мобильного телефона, с платежного терминала, в салоне МТС или Связной, через PayPal, WebMoney, Яндекс.Деньги, QIWI Кошелек, бонусными картами или другим удобным Вам способом.