авва Дорофей Array - Аскетика. Том I

Вопрос 84, тогожде, к великому старцу:

Молимся, отче, яко да речеши нам, оно, по силе человеку, колико есть, еже истяжется от Бога: еда како примешает кто в тое от своея слабости, и непщует, яко еже по силе, все творит. Како убо уразумеем тое слово, «по силе», истинно?

Ответ.Дал есть Бог разум человеку разсуждати вещи: аще есть кто от труда путнаго, или от инех тяжчайших дел, таковый не может равность инех дней сохранити, но снисходит мало телеси. Яко яст на день поллитры хлеба: и аще труда ради снесть еще едину унгию, силу свою сотворил есть, еже не ясти вящше. Бдит ли же от полунощи на всяк день? Аще почиет другий един час труда ради, то еже по силе сотворил есть. Труда убо знамение есть, еже препокоити себе мало, якоже речеся: и паки бдети обычно бдение. Еже убо творити елико по силе есть, еже быти без мала, или в пищи, или в питии, или во сне. Аще ли же речеши: и колика есть мера сну? Уставиша отцы пол нощи. О пищи же, еже блюсти себе еще хотяща, и сице выну мало приимати.

Вопрос 85, тогожде к иному старцу:

Кая же должна есть добре быти имущая мера вина и варения на всяк день, пребывающему на едине? И како отцы они жесточайшее правило пищи приемляху? И аще всем тожде правило воздержания должно быти, еже рекосте ми? Или противу устроению вопрошающаго отвещавают и отцы?

Ответ.О вине, здравому и хотящему воздержатися, довлеет едина в день чаша, ничтоже имущу кроме сея. Аще ли же имать часты недуги, да приимет две целии. Подобне и о варении, един вид варения должен есть имети, и будет без попечения о сем. О отцех же оно како имеша жесточайшее правило пищи, яве, яко обретоша телеса своя послушающа. Прочее, иже добре окормляющии себе, с разсуждением противу тела и житие свое устроивают. Помолися о мне.

Брате, яже рех любви твоей о воздержании сущим по нам, и по мере моей глаголах. Аще убо исправим средняя, приходим по преспеянию и в большая: да не ступивше на первый степеник лествицы ногою, абие восхощем на высочайшии. Приходящии бо в меру, яже рече апостол, могут и насыщатися, и алкать: во всех бо научени суть. Ты же веси меры твоя, брате. Егда бо бывает брань, рех ти умалити еще унгию едину, и от пития такожде.

86. Тойжде брате еще вопроси тогожде старца:

Что есть, отче, еже по желанию прияти брашно или еже по естеству?

Ответ.По желанию есть, еже желати прияти брашно не за потребу тела, но чревообъядения ради. Аще же видиши, яко приемлет естество на мало время некоего зелия, вящше от сочива, не по хотению, но по легкости, сие есть различие. Суть же естества приемлющая сладкая, а другая сланая, и ина кислая. И сие несть страсть, ниже пожелание, ниже чревобесие. А еже любити брашно, и желати в похоть: сие есть пожелание, служительница чревобесию. (Се же разумевай, егда держит тя страсть чревообъядения, аще и помыслом облада.) Аще же сопротивляешися тому, и благочинно приемлеши пищу потребы ради, несть се чревобесие.

Вопрос 87, тогожде к томужде:

Что убо, отче, яко не предлежит убо страсть, в самом же времени приятия пищи приходит. Что сотворю, отступлю ли от пищи или ни?

Ответ.Абие не отступай, но сопротивляйся помыслу: поминая, яко зловонием бывает пища, и яко осуждаемся мы ядуще, инем всячески удаляющимся. И аще убо отступит, приими пищу осуждая себе. Аще ли пребывает, призови имя Божие на помощь, и почиеши. Аще же одолеет ти, якоже не мощи ясти благочинно, тогда отсецы пищу. Аще ли же неции седят с тобою, за еже не познати тя онем, взимай по малу. Аще ли же случится ти алкати, сотвори потребу свою от хлеба, или от инаго брашна, на неже не имаши брани.

88. Тогожде к томужде:Знамение чревообъядения каково есть? Явленно сотвори ми.

Ответ.Егда видиши помысл твой услаждающся в брашнех, и понуждающ тя отнюдь предваряти всех, или привлещи пред себе брашно оно; се чревообъядение есть. Внимай убо себе, да не исполниши волю его: и сотвори силу свою удерживая себе, еже не с поспешностию прияти от того, но благочинно: и отринути паче брашно тое пред седящыя с тобою. Не подобает же, якоже рех, виною чревообъядения абие отрицатися причаститися снеди: но достоит хранитися, еже не безчинствовати в восприятии ея. И кроме бо чревообъядения пишут отцы, еже не простирати руки на трапезе пред инем: не прилично бо есть сие, и общаго благочиния чуждо. Егда же таково есть предлежащее брашно, яко не быти яве части пред коимждо, но обще тое всем ясти: тогда не безместно есть приимати кому от него со всеми: обаче со благочинием, за еже не впасти в чревообъядение и в зазрение. Другое же знамение чревообъядения есть, еже прежде времене хотети ясти: еже не достоит творити, аще не некая негли предлежит благословная вина. Во всех же потребно есть призывати Божию помощь, и Бог заступит нас.

Вопрос 89 тогожде к томужде:Востание плоти откуду приходит?

Ответ.Востание плоти приходит от нерадения: ибо нерадение восхищает тя тайно во еже судити и осуждати, и сими предает тя. Егда бо Израиль истинно работаше Богови, то храняше его от врагов его. Егда же нерадяше

о истинном служении, то попущаше Бог враги поразити и.

Вопрос 90, тогожде к томужде:Подобает ли о всех рождаемых в сердце помыслех вопрошати старцев? И подобает ли молящуся и поющу со гласом сие творити? И о памяти всех вещей яже содея кто, или слыша, или глагола, и достоит ли обучатися с братиями?

Ответ.Брате, о всех возницающих помыслех не должно вопрошати: мимоходяще бо суть; но о пребывающих и борющих человека. Якоже бо человек от многих досаждаемь, небрежет тех досаждений, и бывает без попечения от всех их: аще ли же кто востанет нань, или ратует его, тогда доносит ко князю: тако и вещь сия. О молитве же и псалмопении: не точию умом, но и устнами потребно есть пети. Зане пророк Давид глаголет: «Господи, устне мои отверзеши, и уста моя возвестят хвалу твою» (Пс. 50, 17). И апостол такожде, показуя, яко ищутся устне, рече: «сердце и плод устен» (Евр. 13, 15) и прочая. И о нихже видел еси, или слышал, или содеял, и помышляеши та: ничтоже отсецает сия, разве молитва со смирением и со труды и слезами бываемая, не имущая воли отнюд. Исправлшии бо сие отцы без трудов и слез и отсечения воли, не исправиша. А еже обучатися, вменяемость есть и равность: вопрошати же и веровати ответом, смирение есть, и успеяние о Господе. Помолися о мне, брате.

91. Ин некий старец вопроси тогожде старца:

Како кто блюдет сердце свое? и киим образом бывает брань вражия? и должен ли кто вопреки глаголати к борющему? и о помысле блуднем, подобает ли заградити вход его? аще ли же внидет, то что подобает творити? и о пище, унгиями ли должен кто употребляти ю или разумом и хранением?