Сборник - Единоверческие молитвы

Молитва 2–я, святаго Исаака Сириянина

Господи Исусе Христе Боже мой, посещаяи тварь Свою, Тебе явлены страсти моя, и немощь естества моего, и крепость супостата моего. Ты Сам, Владыко, покрый мя от злобы его, занеже сила его крепка и естество мое страстно, и сила немощна. Ты убо Благии, ведыи немощь мою, иже нося неудобьство безсилия моего, сохрани мя от помысла смущена, и потопа страстей, и достойна мя сотвори, сея службы святыя, да не како в страстех моих растлю сладость ея, и обрящуся безстуден пред Тобою и дерзостив. Но милостию Си помилуй мя, яко благословен еси во веки. Аминь.

Молитва 3–я, святаго Стефана Фивейскаго.

Владыко Господи Исусе Христе, Боже мой, Ты Помощник ми буди, в руку Твоею аз, да не оставиши мене согрешати, яко прельщен есмь, да не оставиши мене последовати хотению моему лукавому, да не оставиши мене погибнути во гресех моих, ущедри создание Свое, не отверзи мене от лица Твоего грех ради моих, яко к Тебе прибегох, исцели душу мою, яко согреших Ти, пред Тобою суть вси оскорбляющие мя, и ищущие дущу мою изъяти ю, и несть ми прибежища иного, токмо к Тебе Господи, Господи, спаси мя милости Твоея ради, яко Ты еси Господи, сильныи во всяческих. Яко Твое есть Царство и сила и слава, Отца и Сына и Святаго Духа, ныне и присно и во веки веком. Аминь.

Молитва 4–я, святаго Иоанна Златоустаго

Господи, аще хощу, аще не хощу, спаси мя, понеже бо аз яко кал любовещныи, греховную скверну желаю, но Ты яко Благ и Всесилен, можеши ми возбранити. Аще бо праведнаго помилуеши, ничтоже велие, ащи чистаго спасеши, ничтоже дивно, достойни бо суть милости Твоея. Но на мне паче Владыко, окаяннем и грешнем и сквернем удиви милость Свою, покажи благоутробие Свое, Тебе бо оставлен есмь нищии, обнищав всеми благими делы. Господи, спаси мя милости Твоея ради, яко благословен еси во веки. Аминь.

Молитва 5–я

Владыко, помилуй мя благости Твоея ради, и не остави мене заблудити от Твоея воли. И не отверзи убогия молитвы моея от Твоего лица, но услыши Господи, глас молитвы моея, егда молюся Тебе во дни и в нощи, и приими яко избранно кадило, и не возбрани грехов моих ради благости Твоея, но спаси мя имене Твоего ради святаго. Твое бо есть единаго, еже миловати и спасати нас, и Тебе славу возсылаем, Отцу и Сыну и Святому Духу, ныне и присно, и во веки веком. Аминь.

Таже, помолився, и предочистив себя, целуй крест свой, иже носиши на персех своих, и знаменаяся им, глаголи:

Господи Исусе Христе, Сыне Божии, благослови и освяти и сохрани мя, силою Креста живоноснаго Ти.

Посем:

Слава Тебе, Боже наш, слава Тебе всяческих ради. (трижды).

За молитв святых отец наших, Господи Исусе Христе, Сыне Божии, помилуй нас. Аминь. Таже:

Царю Небесныи.

Трисвятое. По Отче наш:

Господи помилуй, 12. Слава, и ныне.

Приидите поклонимся, трижды.

Псалом 50: Помилуй мя, Боже:

Символ Веры: Верую во единаго Бога:

Таже, или каноны глаголи, или молитвы Исусовы, или поклоны.

По завершении канонов глаголи:

Достойно есть. Трисвятое. По Отче наш: тропари канонов.

Господи помилуй, 40.

Таже Честнейшую херувим.

Слава, и ныне, Господи помилуй, дважды, Господи, благослови (с поклонами).

И отпуст, по обычаю.

Неции же глаголют последи, Господи помилуй, 40. Молитвы канонов. И исповедание.

Таже: Честнейшую. И отпуст.

Приидите, поклонимся (трижды, и поклоны три).

Псалом 53.

Боже, во имя Твое спаси мя, и в силе Твоей суди ми. Боже, услыши молитву мою, внуши глаголы уст моих. Яко чуждии восташа на мя, и крепцыи взыскаша душу мою, и не предложиша Бога пред собою. Се бо Бог помогает ми, и Господь заступник души моей. Отвратит злая врагом моим, истиною Твоею потреби их. Волею пожру Тебе, исповемся имени Твоему, Господи, яко благо. Яко от всякия печали избави мя, и на враги моя воззре око мое.

Псалом 54.

Внуши Боже, молитву мою, и не презри моления моего. Вонми ми, и услыши мя. Возскорбех печалию моею, и смутихся от гласа вражия, и от стужения грешнича. Яко уклониша на мя беззаконие, и во гневе враждоваху ми. Сердце мое смутися во мне, и страх смерти нападе на мя. Боязнь и трепет прииде на мя, и покры мя тма. И рех: кто даст ми криле, яко голуби, и полещу и почию. Се удалихся бегая, и водворихся в пустыни. Чаях Бога спасающаго мя, от малодушия и бури. Потопи Господи, и раздели языки их. Яко видех беззаконие и пререкание во граде. День и нощь обыдет и по стенам его, беззаконие и труд посреде его и неправда. И не оскуде от пути его лихва и лесть. Яко аще бы враг поносил ми, претерпел бых убо. И аще бы ненавидяи мя на мя велеречевал, укрылбыхся от него. Ты же человече равнодушне, владыко мой и знаемый мой, иже купно насладил мя еси брашна, во храме Божии ходихове единомышлением. Да приидет же смерть на ня, и снидут во ад живи, яко лукавство в жилищих их, посреде их. Аз к Богу возвах, и Господь услыша мя. Вечер и заутра и полудне, повем и возвещу, и услышит глас мой. Избавит миром душу мою от приближающихся мне, яко во мнозе бяху со мною. Услышит Бог и смирит их, Сыи прежде век. Несть бо им изменения, яко не убояшася Бога. Прострет руку свою на воздаяние, оскверниша завет его. Разделишася от гнева лица его, и приближишася сердца их, умякнуша словеса их паче елея, и та суть стрелы. Возверзи на Господа печаль твою, и Той тя препитает, не даст в век молвы праведнику. Ты же Боже, низведеши их в студенец истления. Мужие крове и льсти не преполовят дней своих, аз же Господи, уповаю на Тя.

Псалом 90.

Живыи в помощи Вышняго, в крове Бога небеснаго водворится. Речет Господеви: Заступник мой еси, и прибежище мое, Бог мой и уповаю Нань. Яко той избавит тя от сети ловчи, и от словесе мятежна. Плещьма Своима осенит тя, и под крыле Его надеешися. Оружие обыдет тя истина Его, не убоишися от страха нощнаго, от стрелы летящия во дне. От вещи во тме преходящия, от сряща и беса полуденнаго. Падет от страны твоея тысяща, и тма одесную тебе, к тебе же не приближится. Обаче очима своима смотриши, и воздаяние грешником узриши. Яко Ты Господи, упование мое; Вышняго положил еси прибежище твое. Не приидет к тебе зло, и рана не приближится к телеси твоему. Яко ангелом Своим заповесть о тебе, сохранити тя во всех путех твоих. На руках возмут тя, да некогда преткнеши о камень ноги твоея. На аспида и василиска наступиши, и попереши льва и змия. Яко на Мя упова, и избавлю и, покрыю и, яко позна имя мое. Воззовет ко Мне, и услышу и, с ним есмь в скорби, изму и, и прославлю его. Долготу дней исполню и, и явлю ему спасение Мое.

Слава, и ныне. Аллилуия (трижды).

Тропарь по уставу.

Аще ли же пост, глаголем сии тропарь трижды: Иже в шестыи день же и час, на Кресте пригвождеи, Иже в раи дерзновенныи от Адама грех, и согрешении наших рукописание раздери, Христе Боже, и спаси нас.