Анатолий Калинин - Ром. На цыганском языке (диалект русска рома)

Тимофеё Ильичё угэя прэ пэскиро штэто пал скаминд. Ёв сыс довольно, со латхтя объяснение, состыр ромэстэ бутыр награды. Ёв победно подыктя прэ ромэстэ и бухгалтеростэ. Бухгалтеро тиминякирдя ада:

– Аи, ада тукэ нанэ тэ кхэлэс паш наковальня.

– И тэ на лэс чужо, – дро тоно лэскэ пхэндя ром.

– Нэ – нэ! – зоралэс пхэндя бухгалтеро.

Ром на подыхтя даже. Ёв обрисияпэ ко председателё:

– Екх моло ту скэрдян ошибка. Со явэла, коли скэрэса ошибка дуй молы?

Ёнэ передыкхнэпэс.

– Если скэрава адала ошибка, то эна тукэ миро лав: припхэнава тэ дэл тукэ ловэ пал тырэ гандладя, и рэндоскэ концо.

Ром покачиндя шэрэса.

– Екх лав набут.

Тимофеё Ильичё искреннё возмутился:

– На патяс председателёскэ?

– Лэскэ мэ патяв, нэ вдруг ёв опять пхэнэла, со ваш польза колхозоскэ можно и тэ обхохавэс?

– Адава мэ на ракирдём. Мэ ракирдём ваврэс. Коли набут тукэ, акэ тукэ перво свидетелё.

Тимофеё Ильичё посыкадя вастэса прэ бухгалтеростэ.

– Подджял?

– Нат! – пхэндя ром.

– А… коли на камэс, то акэ тукэ второ свидетелё, – и председателё посыкадя вастэса прэ Клаватэ.

– Коли адая гади согласно, то и мэ согласно.

Ром обрисияпэ, и дро упоро подыкхтя прэ Клаватэ. Ангил ёй на дыкхэлас лэскиро муй, только бородку. Кана встретиндлэпэс якхэнца. Клавдякэ посыкадыяпэ, со ёв подыхтя лакэ дро ило пэскирэ калэ якхэнца.

– Шунэс, Пухлякова, адая брода камэл тут дрэ свидетели, – сабнаса пхэндя Тимофеё Ильичё, – Амэнгэ ёв на патял, а вот ту лэскэ, дыкхно, покамьянпэ соса – то. Тэрдёв, карик ту? – сгодлыя ёв, уштыи штэтостыр. Нэ Клавдя уже на шунэлас.

Ёй забистырдя сыр откэрдя порта, и мимо раклятыр чюрдыяпэ пиро ступеньки. Ракли и ваврэ сотрудники прилипли кэ фэнштра. Ещё никон на дыкхэлас, собы Клавдия Пухлякова дякэ прастал кабинетостыр. Обычно ёв прастал дро гаражо, сыр удыкхэл лакиро силуэто дрэ фэнштра. И бэшэл одой, пока водителё на явэла, на пхэнэла, со гроза прогэя.

Опомнилась Клавдия и подыкхтя прэ пэскиро поведениё стронатыр прэ брэгоскиро дроморо паш Доно. Состыр джял адай, а нанэ вавряса, кай исы попутки? Лакиро поведение, нашибэ, должно тэ явэл, сарэ мануша удыкхнэ нелепа. Клавдия взрипирдя раклякирэ крэнгла яхха. Должно тэ явэл, дивинэнас председателё и бухгалтеро, ведь полынэ, нанэ просто дякэ ёй притрадыя дрэ станица.

Кана ёй состыр рисёлапэ дро хуторо, на откэря о муй ваш ракирибэ. Со пхэнэла прэ фэрма свинарям? Со балычнытка чяраибэн са екх лэна тэ джян прэ лево? И со дякэ здарандыя? Неужели саро джиибэ ёй лэла тэ дарэлпэ ромэндыр? Каждонэстыр ромэстыр тэ дарэлапэ, хай кон – то камэл со – то тэ закэдэл латыр… Дылынэ чаворэнгирэ дара! Дасаво ром нанэ страшно, а даже гожо, лаченца якхэнца. Ракирэлас годявэр. Глос на г’аздыя, а сыс состыр. Бухгалтеро дякэ и крэнцынэлпэ паш председателёстэ, сыр сап. Подпхэнэл лэскэ про кан, сыр гаже тэ пхэнэс манушэскэ. А ведь Клавдия джинэлас, со чейно тэ пхэнэс бухгалтероскэ и пал дерть, и пал чив, соб ёв закрэнцындяпэ сыр ужо, кэдэ лэскэ притасадэ пори. Ещё набут, и клавдякиро ило розрискирэла кофта. Эна, сыр марэлпэ. Ёй подтходя о муй балвалякэ.

Набуг’лы тропинка нашавэлпэ машкир репейнико. Ёнэ царапали лакэ г’эра. Ковлы велосипедоскиро кудуни затходя ла тэ сджяс тропинкатыр. Велосипедисто протрадыя ангил, нэ тэрдыяпэ, сгэя. Рикирдя рулё дрэ васта, зарискирдя шэро кэ Клавдя. Ей уг’алыя ромэс. Ёнэ ачнэпэс екджинэ. Ангил и палал никонэс на сыс. Ёв протырдыя васт, и пхэндя:

– Ада тумэ? А председателё тумэн родыя. Наис, со хоть тумэ заячлэ. Яваса джиндлэ, ман кхарэн Будулаё.

Ещё дро кабинето Клавдия удыхктя, со ёв ракирэл гаджиткэс чисто. Страннэс, нэ ёв на страхадя ла. Лачипнаса дыкхтя прэ Клавдятэ, саласпэ, данда парнёна сыр мутин. Со тэ кэрэс, если адалэ мануша бродата? Значит, кэ ёнэ дасаво обычаё. Ёй сыс роснашады. На пхэндя даже пэскиро лав. Ёв потасадя лакэ васт.

– Нэ са екх на поможиндя тумэнгиро заступничество. Отпхэндяпэ пэскирэ лавэндыр и пал одова, сыр затходя ман тэ сыкавав лэскэ миро военно билето. Нэ, лачё тумаро председателё! На камам, нэ чейно тэ пожалинавпэ прэ лэндэ дро райкомо. На пхэнэса, скицик жыко райцентро?

– Пирдал амаро хуторо традэнте, а одой, гинаса, шов километры, – пхэндя Клавдия.

– Наис. Аченпэ Дэвлэса.

Бэштя прэ велосипедо, и сыго сг’арадыяпэ пало рисибэ. Ёй ачьяпэ екджины, и пожалиндя, со ракирэлас шылалэс, со на пхэндя сыр кучес тэ традэл. Еле вытасадя пэстыр дуй лава. А ёв адава на заслужиндя. Дро кабинето ракирэлас председателёса культурнэс, чячюнэс. И адай на мардяпэ пал знакомство Кдавдяса. Бахтякирдя ла, спучья пало дром, и утрадыя. Нэ и со, со ром? Не хуже ваврэндыр манушэндыр. Лэскэ даже подджял брода. Лакэ г’ара чейно тэ чюрдэл пэскирэ дара.

Ёй почти забистырдя палэ адая встреча ромэса, если бы лакэ на взрипирддя Лущилиха. Сыр обычно ёй загэя кэ Клавдя бельвеляса, кэдэ лучшим свинарям и свинаркам дэнас балычёрэн. Прилыджия и Клавдия.

– Мэ пал тутэ, Клавочка, дриван соскучилась, – заракирдя Лущилиха, – Ту, гин, саро лынай пало Доно, сыр дро ссылка дживэс. Акана, шунав, балычёро визжинэл. Думинав, значит, передово колхозница кхэрэ, – и ёй росчямудя Клавдякэ чямья, – А мандэ исы нэвипэна ваш тукэ.

Бэштя прэ табурето, закэрдя лэс пэскирэ буг’ляса юбкаса, и зорко подыктя прэ Клавдятэ, сыр ёй прилэла нэвипэ. Пхури Лущилиха не сомневалась, со Клавдия на ачелапэ равнодушно. Ещё бы ачелапэ! Одова ром, конэс обхохадя председателё колхоза, нанэ просто ром. Правлениёстыр ёв латхтя дром дро районо. Пэ тася одоцир покхардэ Тимофея Ильича. Лущилиха джинэлас ада двоюроднонэстыр племянникостыр, со лыджия одорик Тимофея Ильича прэ «Победа». Атася сыс, пия бравинта, роспхандя чиб. Пхэндя лакэ, со дыктя пэскирэ якхэнца, со кэрэнас дро кабинето. Саро ракирибэ ромэса шундя лав дро лав.

Кэдэ председателё Тимофеё Ильичё Ермаков загэя дро кабинето, то ром одой уже сыс. Отродынэпэс лаче мануша, посыкадынэ лэскэ дром. Удыкхтя ромэс, буркнул:

– А, ада ту, бродо…

Ром ничи на пхэндя. Бэштя ко боко паш скаминд про стуло.

Секретарё райкома Ивано Дмитриевичё Ерёмин встрениндя преседателёс сабнаса. Выгэя скаминдэстыр, протырдыя васт.

– Г’ара, Тимофеё Ильичё на дыкхтямпэс… А тумэ екх екхэс разве на джинэн? – посыкадя якхэнца прэ ромэс.

Пригэяпэ председателёскэ тэ дэл васт ромэскэ.

– Набут.

Ром ничи, потасадя лэскэ васт.